2 Kronik 15 - Labib An Kreol Seselwa

Lerwa Asa I Anmenn Reform

¹ Lespri Bondye ti sezi Azarya, garson Oded.

² I ti al kot lerwa Asa pour dir li: Asa ek tou pep Zida ek Benzamen! Ekout mwan byen. SENYER i avek zot osi lontan ki zot avek li. Si zot rod li, zot ava trouv li, si zot abandonn li, li osi pou abandonn zot.

³ Pandan lontan, bann Izraelit pa'n konn vre Bondye, ni annan pret pour ansenny zot; zot pa ti konn lalwa.

⁴ Me, dan zot maler, zot in tourn ver li e i'n les zot trouv li.

⁵ Dan sa lepok, dimoun pa ti kapab deplas an sekirite. Ti annan en kantite dezord partou dan bann pei.

⁶ En pei ti kraz en lot pei, en lavil ti kraz en lot lavil, Bondye ti sekwe zot par tou bann kalite maler.

⁷ Me zot, montre zot for. Pran kouraz, akoz zot zefor pou ganny rekonpanse.

⁸ Apre ki lerwa Asa ti'n antann sa bann parol profet Azarya, garson Oded, i ti repran kouraz pour detri tou bann zidol degoutan, dan bann rezyon Zida ek Benzamen antye, dan tou bann lavil ki i ti'n pran dan rezyon montanny Efraim e dan bann lavil ki i ti'n kaptire. I ti repar lotel SENYER ki ti devan lantre tanp SENYER.

⁹ I ti rasanble zabitan Zida ek Benzamen, e ti annan bokou ki ti sorti dan Efraim, Manase, Simeon; en gran kantite Izraelit ti zwenn avek zot, ler zot ti'n remarke ki SENYER, son Bondye ti avek zot.

¹⁰ Zot tou, zot ti rasanble dan Zerizalenm, dan trwazyenm mwan, dan kenzyenm lannen renny Asa.

¹¹ Sa zour, zot ti ofer SENYER sakrifis bann zannimo ki zot ti'n kaptire: 700 bef ek 7,000 mouton.

¹² Dan en lalyans ki zot ti fer, zot ti promet SENYER, Bondye zot zanset, ki zot pou rod li avek tou zot leker ek zot et antye.

¹³ Zenn koman vye, zonm koman fanm ki pa tourn ver SENYER, Bondye Izrael, i merit lanmor.

¹⁴ Zot ti pret serman byen for e avek gran lazwa, zot ti sonn tronpet, ek korn.

¹⁵ Pep Zida antye ti aklanm sa lalyans, akoz zot ti'n fer li avek tou zot leker; zot ti retourn ver SENYER avek tou zot volonte e SENYER in les zot trouv li. SENYER ti donn zot repo, lo tou kote.

¹⁶ Lerwa Asa ti menm retir dinyite Maaka, son gran manman, koman larenn mer, akoz i ti'n fer en stati degoutan pour Asera. Asa ti detri sa zidol, kraz li, e bril li dan vale Sedron.

¹⁷ Asa ti met tou son leker dan servis Bondye. Malgre sa, bann landrwa sakre pa ti disparet dan Izrael.

¹⁸ Asa ti fer anmenn dan tanp Bondye tou bann lofrann ki son papa e li menm ti'n konsakre: Lor, larzan ek bokou lezot lobze.

¹⁹ Ti nepli annan lager ziska trannsenkyenm lannen renny Asa.