2 Kronik 13 - Labib An Kreol Seselwa

Abiya, Lerwa Rwayonm Zida

¹ Dan dizwityenm lannen renny Zeroboanm, Abiya ti vin lerwa rwayonm Zida.

² I ti lerwa dan Zerizalenm pandan 3 an. Son manman ti apel Mikaya, fiy Ouriel ki sorti Gibea. Abiya ti pe lager kont Zeroboanm.

³ Abiya ti al dan lager avek 400,000 meyer gerye; zot tou, bann konbatan elit. Zeroboanm ti met li dan formasyon lager kont li, avek 800,000 vayan gerye.

⁴ Alor, Abiya ti mont lo oter Zemaraim, dan montanny Efraim, e depi lao, i ti kriye: Ekout mwan, Zeroboanm ek tou bann Izraelit!

⁵ Zot pa konnen ki SENYER, Bondye Izrael, in donn David ek son desandans pour touzour, tronn Izrael atraver en lalyans ki personn pa kapab kase?

⁶ Me Zeroboanm, garson Nebat, ki ti dan servis Salomon, garson David, ti revolte kont son met.

⁷ Me sa bann zans bonnaryen, bann bandi ki ti avek li, ti pli for ki Roboanm, garson Salomon. Roboanm ki ti ankor zenn e san leksperyans, pa ti kapab reziste zot.

⁸ Aprezan zot dir: Nou pou opoz rwayonm ki SENYER in konfye avek bann desandan David. Zot annan en gran larme e zot annan osi avek zot angiz bondye bann zenn bef annor ki Zeroboanm ti'n fabrike pour zot.

⁹ Pa zot in sas tou bann pret SENYER, bann garson Aaron, ek bann levit e ranplas zot par bann pret parey lezot nasyon i fer? Nenport ki, ki vin avek en toro ek set bouk, ti kapab vin pret en dan servis sa ki pa Bondye.

¹⁰ Me kanta nou, SENYER i nou Bondye, e nou pa'n abandonn li; bann pret, desandan Aaron, avek bann levit, zot la pour servi SENYER.

¹¹ Tou le bomaten e tou le swar, zot bril bann sakrifis konplet ek lansan aromatik pour SENYER; zot depoz dipen lo latab annor pir e sak swar zot alim portlanp annor avek son bann lalanp. Nou, nou fer sa ki SENYER in ordonn nou, me zot, zot in abandonn li.

¹² Bondye li menm i nou sef. Son bann pret avek zot tronpet i pare pour soufle lapel lager kont zot. Pep Izrael! Pa bezwen lager kont SENYER, Bondye zot zanset; zot pa pou ganny laviktwar.

¹³ Antretan, Zeroboanm ti'n anvoy en group gerye deryer pozisyon Zida, pour mont en latak. Alor, larme Zida ti trouv li pe fer fas, par devan e par deryer, avek larme Izrael.

¹⁴ Kan larme Zida ti remarke ki zot oblize konbat lo de fron, devan ek deryer, zot ti kriy ver SENYER e bann pret ti soufle zot tronpet.

¹⁵ Bann gerye Zida ti kriy laklamasyon lager. Sa menm moman, Bondye ti bat Zeroboanm ek tou son larme, ki ti rekile devan Abiya ek bann gerye Zida.

¹⁶ Bann gerye Izraelit ti sove pour esey sape, me Bondye ti livre zot dan lanmen bann gerye Zida.

¹⁷ Abiya ek son larme ti ganny en gran laviktwar lo zot: 500,000 vayan gerye ti ganny masakre.

¹⁸ Konmsa ki bann Izraelit ti ganny kraze. Bann Zideen ti ranport laviktwar, akoz zot ti apiy lo SENYER, Bondye zot zanset.

¹⁹ Abiya ti kontinyen pourswiv Zeroboanm e pran sa bann lavil: Betel avek son bann vilaz dan zalantour; Yesana avek son bann vilaz dan zalantour; Efronn avek son bann vilaz dan zalantour.

²⁰ Pandan tou letan ki Abiya ti lerwa, Zeroboanm pa ti zanmen reganny son pouvwar. Finalman, SENYER ti tap li, e i ti mor.

²¹ Kanta Abiya, i ti vin pli for. I ti annan li 14 fanm, ki ti fer li 22 garson ek 16 fiy.

²² Tou lezot aksyon Abiya, tou sa ki i'n fer e dir, in ganny anrezistre dan liv Souvenir Profet Ido.