2 Kronik 12 - Labib An Kreol Seselwa

Lerwa Lezip I Atak Rwayonm Zida

¹ Kan Roboanm ti'n solidman etabli son pouvwar e i ti'n vin for, i ti abandonn lalwa SENYER, e Izrael antye ti osi abandonn SENYER.

² Dan senkyenm lannen ki Roboanm ti lerwa, Sisak, lerwa Lezip, ti atak Zerizalenm, akoz Izrael pa ti'n reste fidel anver SENYER.

³ I ti monte sorti Lezip, avek 1,200 kales lager, 60,000 kavalye e en gran kantite gerye ki personn pa ti kapab konte: Libyen, Soukit, ek Nibyen.

⁴ Sisak ti kaptir bann lavil fortifye dan rwayonm Zida, e i ti ariv ziska Zerizalenm.

⁵ Alor, profet Semaya ti al war Roboanm ek bann sef dan rwayonm Zida. Anmezir ki Sisak ti pe aprose, zot tou, zot ti rasanble dan Zerizalenm. I ti dir zot, “La sa ki SENYER i deklare: Parey zot in abandonn mwan, mwan osi mon'n abandonn zot dan lanmen Sisak.”

⁶ Bann sef Izrael ek lerwa ti rekonnet zot tor e zot ti dir, “SENYER i zis.”

⁷ Kan SENYER ti war ki zot in imilye zot, i ti dir avek Semaya, “Akoz zot in rekonnet zot tor, mon pa pou detri zot. Mon pou donn zot en sans sape, e mon pa pou les Zerizalenm sibir mon lakoler par lentermedyer Sisak.

⁸ Pourtan, Sisak pou fer zot vin son bann lesklav. Alor, zot ava war diferans ant servi mwan e servi lezot lerwa.”

⁹ Alor Sisak, lerwa Lezip, ti atak Zerizalenm. I ti pran tou bann trezor: Sa ki ti dan tanp SENYER ek sa ki ti dan pale rwayal, menm bann boukliye annor ki Salomon ti'n fer.

¹⁰ Roboanm ti ranplas zot par bann boukliye an bronz ki i ti fer fabrike e remet avek bann zofisye ki gard lantre pale.

¹¹ Sak fwa ki lerwa ti al dan tanp SENYER, bann gerye ti eskort li avek sa bann boukliye; apre, zot ti retourn bann boukliye dan zot plas.

¹² Letan ki Roboanm ti'n imilye li devan SENYER, lakoler SENYER ti kalme kont li e i pa ti detri li konpletman. Annefe, kondisyon ti ase bon dan Zida.

Lafen Renny Roboanm

¹³ Roboanm ti vin lerwa dan Zerizalenm laz 41 an. I ti etabli li solidman koman lerwa pandan 17 an, dan Zerizalenm, lavil ki SENYER ti'n swazir parmi tou bann tribi Izrael, pour li montre son prezans. Manman Roboanm ti en Amonit ki ti apel Naama.

¹⁴ Roboanm ti fer sa ki mal; i pa ti servi SENYER avek tou son leker.

¹⁵ Tou bann aksyon Roboanm, depi premye ziska dernyen, in ganny anrezistre dan Liv Profet Semaya ek vizyoner Ido. Roboanm ek Zeroboanm ti toultan pe lager.

¹⁶ Roboanm ti mor e ti ganny antere dan lavil David. Son garson Abiya ti vin lerwa apre li.