2 Kronik 11 - Labib An Kreol Seselwa

Roboanm, Lerwa Zida

¹ Kan Roboanm ti ariv Zerizalenm, i ti rasanble pep Zida ek tribi Benzamen: 180,000 meyer gerye, pour al lager kont rwayonm Izrael, pour li retourn rwayonm Roboanm anba son kontrol.

² Me Bondye ti koz avek profet Semaya:

³ Dir Roboanm, garson Salomon, lerwa pep Zida e pep Izrael dan teritwar Zida ek Benzamen:

⁴ La sa ki SENYER i deklare: Zot pa pou monte pour al lager. Zot pa pou lager kont zot bann frer! Sakenn, retourn se li, akoz se mwan ki'n fer sa arive. Alor, zot ti obei parol SENYER. Zot ti retourn se zot parey SENYER ti'n dir.

⁵ Roboanm ti etabli li dan Zerizalenm e i ti fer konstri bann lavil fortifye dan Zida:

⁶ Betlehenm,

⁷ Bet-Sour, Soko, Adoulanm,

⁸ Gat, Maresa, Zif,

⁹ Adoraim, Lakis, Azeka

¹⁰ Sora, Ayalonn, ek Hebron, bann lavil fortifye ki ti dan teritwar Zida ek Benzamen.

¹¹ Roboanm ti ranforsi miray sa bann lavil. I ti nonm bann komandan e met anplas rezerv manze, delwil ek diven.

¹² I ti osi plas bann gran boukliye ek bann lans dan tou sa bann lavil pour fer zot pli for. Konmsa, Roboanm ti gard teritwar Zida ek Benzamen anba son pouvwar.

Pret ek Levit I Ralye dan kote Zida

¹³ Bann pret ek bann levit ti sorti partou kote dan Izrael pour zot ralye dan kote Roboanm.

¹⁴ Bann levit ti abandonn zot lakour ek zot propriyete pour vin etabli zot dan teritwar Zida ek Zerizalenm, akoz Zeroboanm ek son bann garson ti anpes zot egzers zot fonksyon pret pour SENYER.

¹⁵ Zeroboanm ti swazir son bann prop pret pour bann landrwa sakre pour servi bann fo bondye dan laform bouk ek toro ki i ti'n fabrike.

¹⁶ Me ti annan osi bann ki ti sorti dan diferan tribi Izrael, bann ki ti'n deside servi SENYER, Bondye Izrael avek tou zot leker, pour swiv bann levit. Zot ti vin Zerizalenm pour ofer sakrifis pour SENYER, Bondye zot zanset.

¹⁷ Sa ti fer rwayonm Zida vin pli for e zot ti ankouraz Roboanm, garson Salomon, pandan sa 3 an; zot ti swazir pour swiv legzanp lerwa David ek Salomon.

Lafanmir Roboanm

¹⁸ Roboanm ti marye avek Mahalat, fiy Yeremot, garson David. Son manman ti apel Abihail, fiy Eliab ki ti garson Zese.

¹⁹ Mahalat ti ganny trwa garson: Yeous, Semarya ek Zahanm.

²⁰ Apre, Roboanm ti remarye avek Maaka fiy Salomon ki ti ganny: Abiya, Atai, Ziza, ek Selomit.

²¹ Roboanm ti kontan Maaka, fiy Absalon plis ki tou lezot son bann fanm marye ek bann menazer. Annefe, i ti annan 18 fanm marye, ek 60 fanm menaz. I ti fer 28 garson ek 60 fiy.

²² Roboanm ti swazir Abiya, garson Maaka, koman sef parmi son bann frer, akoz i ti annan lentansyon fer li vin lerwa dan son plas.

²³ I ti azir avek disernman, e plas lezot son bann garson en pe partou dan bann lavil fortifye dan teritwar Zida ek Benzamen. I ti fourni zot avek bokou provizyon e swazir en kantite fanm pour zot.