2 Kronik 1 - Labib An Kreol Seselwa

Salomon I Demann Bondye Lasazes

¹ Salomon, garson David, ti vin en lerwa for dan son rwayonm. SENYER, son Bondye, ti avek li e fer li vin en tre gran lerwa.

² Salomon ti rasanble pep Izrael: I ti apel bann sef 1,000 ek bann sef 100, bann ziz, ek tou sef fanmir dan pep Izrael.

³ Salomon, ansanm avek tou pep ki ti'n rasanble, ti mont dan landrwa sakre Gabaon, kot Latant Rankont Bondye ki Moiz, serviter SENYER ti fer dan dezer.

⁴ Me Kof Lalyans Bondye ti Zerizalenm, dan en latant ki lerwa David ti'n fer ler i ti retourn avek li sorti Kiryat-Yearim.

⁵ Kanta lotel an bronz ki Besalel, garson Ouri ek pti zanfan Hour ti fer, i ti ganny plase devan Latant Rankont. La ki lerwa Salomon ek tou lepep ti rasanble pour konsilte SENYER.

⁶ Salomon ti mont lo lotel pour ador SENYER e ofer sakrifis; i ti ofer 1,000 zannimo koman sakrifis konplet.

⁷ Sa swar, Bondye ti aparet avek Salomon. I ti dir li, “Demann sa ki ou anvi, mon ava donn ou.”

⁸ Salomon ti reponn Bondye, “Ou'n touzour montre ou fidelite anver mon papa, David e ou'n fer mwan vin lerwa dan son plas.

⁹ Aprezan, SENYER Bondye, akonpli ou promes ki ou'n fer avek mon papa David. Ou menm ki'n etabli mwan koman lerwa lo en pep ki osi nonbre ki lapousyer later.

¹⁰ Alor, donn mwan lasazes ek konnesans pour mwan kapab gouvern ou pep. Lekel ki kapab gouvern ou pep, en pep osi gran?”

¹¹ Bondye ti dir Salomon, “Akoz sa ki ou dezir dan ou leker, ou pa'n demann larises, ni bann byen, ni loner, ni lanmor ou bann lennmi; ou pa'n ni menm demann en long lavi, me ou'n demann lasazes ek konnesans pour ou kapab gouvern mon pep lo ki mon'n etabli ou koman lerwa,

¹² alor, mon pou donn ou lasazes ek konnesans. Mon pou osi donn ou larises, bokou byen ek loner, plis ki okenn lerwa avan ou in kapab gannyen, ni okenn lerwa ki pou vin apre ou.”

Pwisans ek Larises Lerwa Salomon

¹³ Alor, Salomon ti kit landrwa sakre Gabaon, kot i ti ete devan Latant Rankont, pour al Zerizalenm. I ti renny lo pep Izrael.

¹⁴ Salomon ti rasanble bann kales lager, ek zot kavalye: 1,400 kales lager ek 12,000 kavalye. I ti plas zot dan bann lavil e kot lerwa dan Zerizalenm.

¹⁵ Lerwa ti fer ki larzan ek lor dan Zerizalenm ti vin konmsi ros, e sed ti an si gran kantite, ki i ti parey sikomor dan Sefela.

¹⁶ Salomon ti enport seval sorti Lezip ek Silisi.

¹⁷ I ti osi enport kales lager sorti Lezip pour 600 pyes larzan e en seval pour 150 pyes larzan. Zot ti osi anmenn seval pour bann lerwa Hitit ek Siri.