1 Zan 1 - Labib An Kreol Seselwa

Parol Lavi

¹ Nou pe anons zot Parol lavi ki ti egziste depi o konmansman, ki nou'n tande, e ki nou'n war avek nou prop lizye. Nou'n kontanple li e nou'n tous li avek nou lanmen.

² Annefe, lavi in aparet, nou'n war li, nou rann temwannyaz e nou anons zot lavi eternel, ki ti kot son Papa e ki i'n revel avek nou.

³ Tou sa ki nou'n war e tande, nou'n osi anons zot, pour ki zot osi, zot ava ini avek nou. Annefe, nou an kominyon avek Bondye, nou Papa e avek son Garson, Zezi-Kri.

⁴ Nou ekri zot sa pour ki nou lazwa i vin konplet.

Bondye I Lalimyer

⁵ La mesaz ki nou'n tande sorti kot Zezi-Kri e ki nou'n anons zot: Bondye i lalimyer; dan li napa okenn fernwanr.

⁶ Si nou dir ki nou ini avek li, e anmenmtan nou pe viv dan fernwanr, nou pe koz manti e nou pa pe pratik laverite.

⁷ Me si nou pe mars dan lalimyer parey li menm i dan lalimyer, alor, nou pe viv ini avek kanmarad, e disan Zezi, son Garson, i pirifye nou avek tou pese.

⁸ Si nou pretann ki nou san pese, nou pe anbet nou lekor e laverite pa dan nou.

⁹ Si nou konfes nou pese, Bondye ki fidel e zis, pou pardonn nou nou pese e pirifye nou kont tou lenzistis.

¹⁰ Si nou dir ki nou napa pese, nou fer Bondye pas pour en manter e son parol pa dan nou.