1 Timote 3 - Labib An Kreol Seselwa

Bann Dirizan dan Legliz

¹ Sa parol i sir: Si en dimoun i swete ganny plas dirizan dan Legliz, i pe anvi en fonksyon nob.

² En dirizan dan Legliz i devre en zonm san okenn repros, mari en sel fanm, modere dan tou, rezonnab, respektab, kontan donn lospitalite, kapab byen ansennyen.

³ Fodre pa ki i en bwarer, ni vyolan, me ki i annan en karakter dou, kontan lape, e pa kontan larzan.

⁴ I devre kapab byen diriz son lakour, e gard son bann zanfan dan lobeisans ek respe.

⁵ Annefe, si en dimoun pa konn diriz son prop lakour, ki mannyer i pou kapab pran swen Legliz Bondye?

⁶ Fodre pa ki i en nouvo konverti, akoz i riske gonfle avek lorgey e ganny kondannen parey dyab.

⁷ Anplis, i devret en zonm ki ganny byen respekte par bann non-kretyen. Konmsa, personn pa ava dir dimal lo li, e i pa ava tonm dan bann pyez dyab.

Bann Dyak

⁸ Bann dyak osi, zot devret serye e annan en sel parol. Fodre pa ki zot kontan bwar, ni kontan gen malonnet.

⁹ Avek en konsyans kler, zot devre reste dan laverite lafwa ki'n ganny revele.

¹⁰ Fodre premyerman teste zot, e si napa okenn repros kont zot, zot ava kapab travay koman dyak.

¹¹ Bann fanm osi, zot devret serye, e pa abitye koz dimal lo lezot. Zot devre modere e fidel dan tou.

¹² Bann dyak, zot devre annan en sel fanm e kapab byen diriz zot bann zanfan ek zot fanmir.

¹³ Bann dyak ki fer byen zot travay ava ganny onore. Zot ava kapab koz avek bokou lasirans lo lafwa dan Zezi-Kri.

Revelasyon Laverite

¹⁴ Mon pe ekri ou sa let, me avek lespwar vin war ou byento.

¹⁵ An tou ka, si mon tarde, ou ava konnen ki mannyer fodre konport ou dan lafanmir Bondye, savedir dan Legliz Bondye ki vivan, ki soutenir e protez laverite.

¹⁶ Sertennman, ki mister nou lafwa i gran: I'n paret dan laform imen. I'n ganny zistifye par Lespri. Bann lanz in war li. I'n ganny anonse parmi bann nasyon. Atraver lemonn bokou in krwar dan li, i'n ganny anleve dan laglwar Bondye.