1 Tesalonisyen 4 - Labib An Kreol Seselwa

Lavi ki Fer Plezir Bondye

¹ Anfen, mon bann frer ek ser! Zot in aprann avek nou, koman zot devre konport zot pour fer plezir Bondye. Zot pe fer li deza; me esey fer pli byen ankor.

² Zot konn byen bann lansennyman ki nou'n donn zot sorti kot Senyer Zezi.

³ Annefe, lavolonte Bondye, se ki zot vin sen; ki zot prezerv zot kont limoralite.

⁴ Mon demande ki sakenn parmi zot i konn swazir en fanm pour li menm e ki zot viv dan sentete e loner.

⁵ Pa les zot ganny dominen par bann move dezir parey bann ki pa konn Bondye.

⁶ Personn pa devre fer ditor son prosen, ni tronp son frer dan sa zafer, akoz Senyer i pini bann aksyon parey. Nou'n deza averti zot lo sa size.

⁷ Bondye pa'n apel nou pour viv dan limoralite, me dan lasentete.

⁸ Pour sa rezon, sa enn ki rezet en tel lansennyman pa rezet en zonm, me Bondye ki donn li son Lespri Sen.

⁹ Konsernan lanmour parmi frer, i pa neseser ki personn i ekri zot lo sa size. Annefe, zot in deza ganny ansennyen par Bondye li menm, pour kontan kanmarad.

¹⁰ Dayer, zot deza pe kontan tou bann frer dan Masedwann antye. Me nou demann zot, frer ek ser, pour fer plis ankor.

¹¹ Fer tou pour viv anpe e okip zot prop zafer. Travay avek zot prop lanmen, parey nou'n deza demann zot.

¹² Konmsa, bann ki pa krwayan ava annan respe pour zot, e zot pa ava bezwen depann lo personn.

Retour Nou Senyer

¹³ Mon bann frer ek ser! Nou pa oule ki zot reste dan linyorans konsernan bann ki'n mor, pour ki zot pa sagren parey bann ki napa lesperans.

¹⁴ Annefe, nou krwar ki Zezi in mor e in resisite. Nou osi krwar ki Bondye pou anmenn avek Zezi, tou bann ki'n mor an krwayan dan li.

¹⁵ Annefe, dapre lansennyman Senyer, la sa ki nou deklare: Nou ki pou ankor vivan kan Senyer pou retournen, nou pa pou pas avan sa bann ki'n mor.

¹⁶ Annefe, kan sinyal pou ganny donnen avek lavwa en larkanz, e son tronpet Bondye, Senyer li menm pou desann sorti dan lesyel, e bann ki'n mor dan Kris pou resisite an premye.

¹⁷ Apre, nou ki ankor vivan, nou pou ganny anleve e rasanble ansanm avek zot dan nyaz, pour rankontre Senyer dan lezer. Konmsa, nou pou touzour avek Senyer.

¹⁸ Alor, konsol kanmarad avek sa bann parol.