1 Tesalonisyen 2 - Labib An Kreol Seselwa

Travay Pol dan Tesalonik

¹ Mon bann frer ek ser! Zot konn tre byen zot menm, ki vizit ki nou ti fer kot zot pa ti initil.

² Zot osi konnen ki, avan nou ti vin kot zot, nou ti ganny ensilte e maltrete dan lavil Filipi. Malgre en gran lopozisyon, Bondye ti donn nou kouraz pour anons zot Bonn Nouvel.

³ Annefe, mesaz ki nou delivre pa baze ni lo lerer ni lo rezon imoral. E nou pa pe rod tronp personn.

⁴ Me Bondye in teste nou pour konfye nou son Bonn Nouvel. Nou pa prese pour fer plezir zonm, me pour fer plezir Bondye ki war dan fon nou leker.

⁵ Zot konnen ki nou pa'n zanmen servi bann parol flater. Bondye i nou temwen, nou pa'n esey tronp zot avek larzan.

⁶ Zanmen nou'n rod loner avek personn, ki swa avek zot, oubyen avek lezot dimoun. Pourtan, koman zapot Kris, nou ti ava'n kapab enpoz lo zot.

⁷ O kontrer, nou'n montre labonte parmi zot. Nou ti azir parey en manman ki pran swen son bann zanfan.

⁸ Akoz nou lafeksyon pour zot, nou ti pare pour anons zot non selman Bonn Nouvel Bondye, me osi donn nou prop lavi pour zot, akoz nou lanmour pour zot i gran.

⁹ Mon bann frer ek ser! Zot rapel sertennman nou travay ek nou lafatig: Pandan ki nou ti pe anons zot Bonn Nouvel, nou ti travay aswar koman lizour, pour ki nou pa vin en traka pour personn.

¹⁰ Zot temwen, e Bondye osi, ki nou konportman anver zot bann krwayan ti pir, zis e san repros.

¹¹ Zot konnen ki nou ti ansenny zot, ankouraz sakenn zot koman en papa i ankouraz son bann zanfan.

¹² Nou'n ankouraz zot, konsey zot e ensiste pour ki zot anmenn en lavi ki fer plezir Bondye. Annefe, li menm ki'n apel zot pour antre dan son Rwayonm e partisip dan son laglwar.

¹³ Nou pa arete remersye Bondye pour en lot rezon: Kan nou ti anons zot Parol Bondye, zot ti ekoute e aksepte li, pa koman en parol zonm, me koman Parol Bondye tel ki i ete, e ki aktif dan zot, bann krwayan.

¹⁴ Annefe, frer ek ser! Zot in pas parey bann Legliz dan Zide ki pour Bondye e ki krwar dan Kris Zezi. Annefe, parey sa bann Legliz in soufer dan lanmen bann Zwif, zot osi, zot in soufer menm persekisyon par zot prop zans.

¹⁵ Sa bann dimoun ki'n met anmor Senyer Zezi ek bann profet, zot in osi persekit nou. Sa pa'n fer plezir Bondye. Pour sa rezon, zot in vin lennmi tou dimoun.

¹⁶ Annefe, zot in esey anpes nou anons avek bann ki pa Zwif sa mesaz ki pou sov zot. Konmsa, zot in kontinyen ranpli zot avek pese e zot in menm depas limit. Ensi, lakoler Bondye in finalman tonm lo zot.

Pol I Anvi Revwar bann Tesalonisyen

¹⁷ Mon bann frer ek ser! Nou ti bezwen separe avek zot pour en pti moman, fizikman me pa dan leker. Me nou ti telman anvi revwar zot, ki nou'n fer tou sa ki nou ti kapab.

¹⁸ Nou ti deside retourn kot zot. Mwan Pol, plizyer fwa, mon'n esey fer li. Me Satan in anpes nou.

¹⁹ Annefe, zis zot ki nou lesperans, nou lazwa ek nou kouronn ki rann nou fyer devan nou Senyer Zezi, kan i pou retournen.

²⁰ Wi! Zot ki nou laglwar ek nou lazwa.