1 Samyel 31 - Labib An Kreol Seselwa

Lanmor Sail

¹ Bann Filisten ti lager kont pep Izrael ki ti bezwen sove pour zot sape e bokou bann zonm Izrael ti ganny touye lo montanny Gilboa.

² Bann Filisten ti pourswiv byen pre Sail ek son bann garson; zot ti touy Zonatan, Abinadab ek Malki-Soua, bann garson Sail.

³ Konba ti viz ver Sail; bann tirer fles ti reisi ganny Sail, e bles li seryezman.

⁴ Sail ti dir son porter zarm, “Tir ou lepe, e touy mwan, pour ki bann Filisten non sirkonsi pa touy mwan, oubyen boufonn mwan.” Me son porter zarm pa ti aksepte; i ti per en kantite. Alor, Sail ti pran son prop lepe, e zet li lo la.

⁵ Ler porter zarm ti war ki Sail ti'n mor, li osi i ti zet son lekor lo son lepe, e i ti mor avek li.

⁶ Sail ti mor ansanm avek son trwa garson, son porter zarm ek son bann zonm; zot tou ti mor menm zour.

⁷ Ler serten bann zabitan Izrael lo en kote vale ek bann lo lot kote larivyer Zourden ti tande ki larme Izrael ti'n sove e ki Sail ek son bann garson ti'n mor, zot osi, zot ti abandonn zot lavil e sove. Bann Filisten ti vin etabli zot dan sa bann lavil.

⁸ Lannmen, bann Filisten ti vin depouy bann mor. Zot ti dekouver lekor Sail ek son trwa garson ki ti'n mor lo montanny Gilboa.

⁹ Zot ti koup latet Sail, e pran son bann zarm. Apre, zot ti anvoy bann mesaze atraver pei Filisten, anons sa nouvel dan tou bann tanp zot bondye etranze e parmi popilasyon.

¹⁰ Zot ti depoz bann zarm Sail dan tanp Astarte, e kros son kadav anpandan avek miray Bet-Seann.

¹¹ Ler bann zabitan Yabes-Galaad ti tande sa ki bann Filisten ti'n fer avek Sail,

¹² bann zonm vayan ti mars tou lannwit ziska Bet-Seann. Zot ti fer desann lekor Sail ek son bann garson depi miray Bet-Seann, retourn Yabes, e bril zot.

¹³ Zot ti pran tou bann lezo e anter anba en pye tamaris dan Yabes. Zot ti fer en zenn pandan set zour.