1 Samyel 24 - Labib An Kreol Seselwa

David I Eparny Lavi Sail

¹ Kan Sail ti retournen sorti pourswiv bann Filisten, zot ti dir li ki David i dan dezer Angedi.

² Sail ti swazir 3,000 zonm elit, parmi Izrael antye. I ti al rod David ek son bann zonm ziska anfas avek Ros kabri sovaz.

³ I ti ariv kot bann park mouton ek kabri ki ti obor semen e kot ti annan en kavern. Sail ti antre pour fer son bezwen. David ek son bann zonm ti dan fon sa kavern.

⁴ Bann zonm David ti dir li, “Ozordi, sa zour in arive ki Bondye ti dir: Mon pou livre ou lennmi dan ou lanmen e ou ava fer avek li, sa ki ou oule.” David ti leve e dousman, i ti koup en bout rob Sail.

⁵ Me apre sa, son leker ti konmans bat vit, akoz i ti'n koup rob Sail.

⁶ I ti dir son bann zonm, “Zanmen mon pou met lanmen lo mon senyer; zanmen mon pou komet en tel aksyon lo sa zonm ki'n resevwar lonksyon SENYER, akoz, li menm ki'n ganny lonksyon SENYER.”

⁷ Par sa bann parol, David ti kalme son bann zonm e anpes zot atak Sail. Sail ti sorti dan kavern e kontiny son semen.

⁸ Apre, David ti sorti dan kavern e kriy deryer Sail, “Mon senyer, lerwa!” Sail ti vir deryer e war David; David ti bese ziska ater, devan li.

⁹ David ti dir Sail, “Akoz ou sa bann dimoun ki dir: David pe rod fer ou dimal?

¹⁰ Gete ou menm: Ozordi, SENYER ti'n abandonn ou dan mon lanmen, la dan sa kavern. I annan ki ti dir mwan touy ou, me mon pa'n fer li. Mon ti dir: Non, mon pa pou poz lanmen lo mon met, akoz in resevwar lonksyon SENYER.

¹¹ Gete! Get bout ou rob dan mon lanmen, ou kapab rekonnet e war ki mon napa move lentansyon ni anvi revolte kont ou. Mon pa'n komet sa krim kont ou; pourtan, ou pe rod mwan pour pran mon lavi.

¹² SENYER ki ava sa ziz ant ou ek mwan; SENYER ki pou vanz pour mwan kont ou; me mwan mon pa pou lev mon lanmen kont ou.

¹³ Parey en vye proverb i dir: Mesanste i sorti kot bann malfeter. Alor, mwan, mon pa pou lev mon lanmen kont ou.

¹⁴ Lekel ki lerwa pep Izrael in sorti pour atake? Ou pe pourswiv lekel? En lisyen mor! En pis!

¹⁵ SENYER i ava rann lazistis; i ava ziz ant ou ek mwan; li menm i ava gete, i ava pran mon defans; i pou delivre mwan dan ou lanmen.”

¹⁶ Ler David ti'n fini dir Sail sa bann parol, Sail ti dir, “Eski sa i vreman ou lavwa, mon garson David?” Sail ti plere asodlarm.

¹⁷ I ti dir David, “Ou pli bon ki mwan, ou'n fer mwan dibyen, tandis ki mwan, mon'n fer ou dimal.

¹⁸ Ou'n montre ozordi ki mannyer ou'n byen azir anver mwan; ou pa'n touy mwan alor ki SENYER ti'n livre mwan dan ou lanmen.

¹⁹ Sa enn ki zwenn son lennmi, eski i les li kontiny trankilman son semen? SENYER ava rekonpans ou pour sa ki ou'n fer pour mwan ozordi.

²⁰ Aprezan, mon konnen ki ou pou vin lerwa e ki rwayonm Izrael pou reste dan ou lanmen.

²¹ Alor, fer sa serman devan SENYER, ki ou pa pou detri mon desandans apre mwan, e ki ou pa pou detri non mon fanmir.”

²² David ti fer sa serman avek Sail. Apre, Sail ti retourn se li. David ti retourn dan son landrwa kasyet.