1 Samyel 21 - Labib An Kreol Seselwa

David I Sove

¹ David ti al Nob, kot pret Ahimelek ki ti vin rankontre David an tranblan. I ti dir li, “Akoz ou tousel? Akoz napa personn avek ou?”

² David ti reponn pret Ahimelek, “Lerwa in donn mwan en lord: Pa dir personn sa misyon ki mon'n konfye ou, ek lord ki mon'n donn ou. Mon'n donn randevou avek mon bann zenn garson pour zwenn mwan dan tel e tel landrwa.

³ Aprezan, ki ou annan pour mwan manze? Donn mwan senk dipen oubyen sa ki ou kapab.”

⁴ Pret ti reponn David, “Mon napa dipen ordiner, i annan zis dipen sakre, a kondisyon ki ou bann zonm pa'n sorti avek fanm.”

⁵ David ti reponn pret, “Byen sir, i defann sorti avek fanm, ler mon lo en misyon. Zarm bann zennzan i konsakre pour en lekspedisyon ordiner; pour pli bon rezon, ozordi zot in ganny konsakre pour sa misyon spesyal.”

⁶ Alor, sa pret ti donn David dipen sakre akoz ti napa lot dipen eksepte dipen sakre, ki ti'n ganny retire devan SENYER, pour ranplas li par dipen fre, menm zour.

⁷ Me, enn bann zofisye dan pale Sail ti la sa zour. I ti pe akonpli son devwar relizye devan SENYER. I ti en Edomit ki ti avek Dog. I ti sef bann berze Sail.

⁸ David ti dir Abimelek, “Eski ou annan en lans ouswa en lepe isi? Mon pa'n anmenn ni mon lepe, ni mon zarm, akoz misyon lerwa ti irzan.”

⁹ Sa pret ti reponn, “Lepe Golyat, sa Filisten ki ou ti touye dan vale Terebent, i la, anvlope dan lenz, deryer lefod; si oule, pran sanmenm, akoz napa lot isi.” David ti dir, “I ava bon, donn mwan.”

David Kot Filisten Gat

¹⁰ David ti ale, e sa zour i ti sov lwen avek Sail. I ti ariv kot Akis, lerwa Gat.

¹¹ Bann serviter Akis ti dir li, “Sa pa David, lerwa pei? Eski pa lo David ki zot ti sante e danse: Sail in touy son bann mil, me David in touy son bann dizenn milye?”

¹² David ti pran sa bann parol tre serye, e i ti per Akis, lerwa Gat.

¹³ I ti fer konmsi i fou parmi zot e fer bann ekstravagans. I ti fer bann mark lo bann batan laport e les son labav koule dan son labarb.

¹⁴ Alor, Akis ti dir avek son lantouraz, “Zot war byen ki sa zonm i fou! Akfer zot in anmenn li kot mwan?

¹⁵ Eski mon napa ase fou isi pour ki zot anmenn en lot, devan mwan? En tel zonm pou kapab antre dan mon lakaz?”