1 Rwa 7 - Labib An Kreol Seselwa

Konstriksyon Pale

¹ Salomon ti osi konstri son prop lakaz; i ti pran 13 an pour konplet li.

² I ti konstri lakaz ki i ti apel Mezon Lafore Liban ki ti mezir 50 met longer, 25 met larzer, e 15 met oter. Sa lakaz ti ganny konstri lo kat ranze kolonn an sed. Ti annan bann baro sed, poze lo bann kolonn.

³ Par lao, i ti kouver avek en plafon an sed, poze lo 45 kolonn, 15 dan sak ranze.

⁴ Ti annan trwa ranze lankadreman lafnet avek bann lafnet vizavi kanmarad lo trwa nivo.

⁵ Tou bann laport ek lafnet ti annan lankadreman kare avek bann lafnet lo trwa nivo, vizavi kanmarad.

⁶ Apre, Salomon ti konstri Lasal Kolonn ki ti mezir 25 met longer e 15 met larzer; i ti form en lavarang avek bann kolonn ek son ovan devan.

⁷ Salomon ti osi konstri Lasal Tronn, kot i ti asiz pour rann zizman: Lasal Zizman. Tousala, ti ganny rekouver avek sed depi anba ziska plafon.

⁸ Lakaz kot Salomon ti reste, ti dan en lot lakour en pe pli retire, konstri lo menm stil. Salomon ti osi konstri en lakaz parey sa enn, pour son fanm, fiy Faraon.

⁹ I ti servi bann ros spesyal, taye lo mezir, koupe avek lasi lo de kote, anndan deor, depi fondasyon ziska kornis; par deor, i ti al ziska grannkour tanp SENYER.

¹⁰ Fondasyon osi ti fer avek bann ros spesyal, bann gro ros, taye lo mezir, bann ki ti mezir kat met e senk met longer.

¹¹ Poze par lao, ti annan bann ros spesyal, taye lo mezir ek bann poto sed.

¹² Toultour grannkour, ti annan trwa ranze ros taye avek en ranze poto sed. Lakour enteryer tanp SENYER ek son lavarang ti parey.

Responsabilite Hiranm

¹³ Lerwa Salomon ti anvoy al sers Hiranm.

¹⁴ Hiranm ti garson en vev dan tribi Neftali; son papa ti en Tiryen ki ti en travayer bronz. Hiranm osi ti en bon travayer entelizan ki ti posed en gran konnesans dan teknik travay bronz. I ti vin kot Salomon e i ti fer tou sa bann travay.

¹⁵ I ti fer de kolonn an bronz ki ti mezir nef met oter e sis met toultour; dezyenm kolonn ti parey.

¹⁶ I ti osi moul de kornis an bronz pour plas lo latet bann kolonn; sak kornis ti mezir de met edmi oter.

¹⁷ I ti osi fer bann kordon trese an girlann pour bann kornis ki ti lo latet kolonn; set pour sak kornis.

¹⁸ I ti osi fer dekorasyon dan laform grenad an de ranze, pour kouver kornis ki ti lo latet kolonn; i ti fer parey pour tou le de.

¹⁹ Lo sak kornis ki ti lo latet kolonn lavarang, ki ti de met oter, ti annan bann flerdelis.

²⁰ I ti plas 200 grenad toultour, lo sak kornis ki ti lo latet kolonn, pre avek bann dekorasyon, la kot i ti gonfle.

²¹ I ti plas sa de kolonn devan lavarang tanp; kolonn ki ti adrwat ti apel Yakin e kolonn agos ti apel Boaz.

²² Lo latet sa bann kolonn ti annan dekorasyon dan laform en flerdelis. Konmsa ki konstriksyon sa kolonn ti ganny konplete.

Basen an Bronz

²³ Apre, i ti fer en gran basen an bronz ki ti mezir senk met dyamet, de met edmi oter e 15 met toultour.

²⁴ Anba son rebor, ti annan en dekorasyon dan laform kalbas. Zot ti par dis, lo sak 50 santimet lo de ranze; zot ti kol ansanm avek basen pour form en sel pyes.

²⁵ Sa basen ti'n ganny poze lo 12 bef. Trwa ti get kote Nor; trwa ti get kote Was; trwa ti get kote Sid e trwa ti get kote Les. Basen ti ganny poze lo zot e zot deryer ti lo kote anndan basen.

²⁶ Lepeser basen ti larzer en lanmen; son bor ti parey bor en lakoup, dan laform en flerdelis. I ti pran anviron 80,000 lit.

²⁷ Hiranm ti fer 10 sipor an bronz. Sak sipor ti mezir de met longer, de met larzer e en met edmi oter.

²⁸ La ki mannyer sa bann sipor ti ganny konstri: I ti par pano e bann pano ti ganny plase dan bann montan.

²⁹ Lo sa bann pano, dan son montan ti annan dekorasyon dan laform lyon, bef ek seriben. Lo bann montan par lao e par anba bann lyon ek bef, ti annan girlann anpandan.

³⁰ Sak sipor ti annan kat larou an bronz avek laks an bronz. Sa bann laks ti ganny fikse lo bann sipor dan kat kwen. Tou sa bann sipor ti'n ganny koule ansanm pour form en sel avek bann girlann lo kote.

³¹ Lo kote lao, ti annan en louvertir ron ki ti depas par 50 santimet e form en pyedestal ki ti 75 santimet fonder. Sa morso ki ti depas son bann dekorasyon, ti kare, pa ron.

³² Son kat larou ti'n ganny fikse anba bann pano e bann laks ti'n ganny koule ansanm, pour form en sel pyes. Bann larou ti mezir 75 santimet dyamet,

³³ e ti'n ganny konstri parey larou saret: Laks, son bor, reyon, son roulman, tou ti'n ganny koule ansanm e ti form en sel pyes.

³⁴ Sa kat pyedestal, fikse lo kat kwen ti form en sel pyes avek montan sipor.

³⁵ Dan son parti anler, ti annan en serk 25 santimet larzer ki ti form louvertir; son ponnyen ek pano ti an bronz e ti form en sel pyes.

³⁶ Bann ponnyen ek bann pano ti ganny grave avek bann seriben, lyon, brans palm, e avek bann girlann toultour.

³⁷ Tou le 10 sipor ti ganny konstri parey: Menm metal, menm mezir, menm laform.

³⁸ Hiranm ti konstri 10 pti basen an bronz. Sak basen ti mezir de met oter e ti pran anviron 1,600 lit. I ti poz en basen lo sakenn sa 10 sipor.

³⁹ I ti plas senk sipor avek zot basen lo kote drwat tanp e senk lo kote gos. I ti plas sa gran basen lo kote drwat tanp, ver Sides.

⁴⁰ Hiranm ti fini tou travay ki lerwa Salomon ti'n konfye li pour tanp SENYER. I ti osi fer bann pti basen, lapel ek bol,

⁴¹ de kolonn, de kornis lo latet bann kolonn, de dekorasyon lasenn pour kouver sa de kornis lo latet kolonn,

⁴² 400 grenad ki al dan lasenn dekorasyon, de ranze grenad pour sak lasenn, pour kouver sa de kornis lo latet kolonn.

⁴³ I ti osi fer sa 10 sipor avek sa 10 basen ki vin lo sipor,

⁴⁴ son gran basen ek son 12 bef ki vin anba gran basen.

⁴⁵ Tou bann resipyan: Basen, lapel, bol, ti an bronz poli.

⁴⁶ Lerwa ti fer fonn e koul zot dan later ki dan laplenn ant Soukot ek Sartann, dan rezyon vale Zourden.

⁴⁷ Salomon ti fer konstri tou sa bann lobze an si gran kantite, ki zot pa ti kapab evalye pwa bronz, ki ti'n ganny servi.

⁴⁸ Salomon ti fer fabrik tou bann lobze ki ti dan tanp SENYER: Lotel annor, latab annor kot zot depoz dipen ki ganny ofer devan Bondye;

⁴⁹ bann portlanp annor pir, plase devan Lasal Tre Sen, senk lo kote drwat, e senk lo kote gos; bann fler, bann lalanp ek bann tennywar annor;

⁵⁰ bann bol, bann tennywar, bann basen, pla pour lasann, brazye; tou ti annor pir; bann gon annor pour laport Lasal Tre Sen pour laport dan lantre tanp.

⁵¹ Alor, tou travay ki Salomon ti'n fer pour tanp SENYER ti'n konplete. Salomon ti anmenn tou bann lobze annarzan, annor ki son papa David ti'n konsakre, e depoz zot dan tanp SENYER.