1 Rwa 21 - Labib An Kreol Seselwa

Akab I Pran Plantasyon Rezen Nabot

¹ Apre sa bann levennman, la sa ki ti arive: Nabot, en zabitan Zizreel, ti annan en plantasyon rezen Zizreel, pre avek pale Akab, lerwa Samari.

² En zour, Akab ti dir Nabot, “Donn mwan ou plantasyon rezen pour mwan fer en zarden legim, akoz i pre avek mon lakaz. An esanz, mon ava donn ou en meyer plantasyon. Si ou prefere, mon ava donn ou son valer annarzan.”

³ Me Nabot ti dir Akab, “Bondye pa pou kontan si mon donn ou patrimwann mon bann zanset.”

⁴ Akab ti retourn kot li ankoler, mekontan, akoz sa ki Nabot, sa zabitan Zizreel ti'n dir li: Mon pa pou donn ou patrimwann mon bann zanset. I ti al alonze lo son lili, vir son figir dan kwen e refize manze.

⁵ Son fanm Zezabel ti vin war li. I ti dir li, “Akoz ou pe fer lakoler? Akoz ou pe refize manze?”

⁶ I ti reponn, “Mon'n esey koz avek Nabot, en zabitan Zizreel. Mon ti dir li: Donn mwan ou plantasyon rezen, e mon ava pey ou avek larzan oubyen si ou prefere, mon ava donn ou en lot plantasyon annesanz. I ti reponn mwan: Mon pa pou donn ou mon plantasyon rezen.”

⁷ Zezabel, son fanm, ti dir li, “Pa ou ki lerwa lo Izrael? Leve, manze e rann ou leker zwaye; mwan, mon pou donn ou plantasyon rezen ki pour Nabot, sa Zizreelit.”

⁸ Alor, i ti ekri plizyer let lo non Akab, e poz sele Akab lo la, e anvoy kot tou bann ansyen ek bann dimoun enportan dan lavil kot Nabot ti reste.

⁹ Dan sa bann let i ti'n ekri: Proklanm en zenn e met Nabot antet pour diriz lasanble.

¹⁰ Met de zonm bonnaryen an fas avek li, ki ava akiz li: Ou'n modi Bondye ek lerwa. Apre, anmenn li deor e saboul li avek ros ziska ki i mor.

¹¹ Bann zonm lavil kot Nabot i sorti, bann ansyen ek bann dimoun enportan ki ti reste dan sa lavil, ti fer parey Zezabel ti'n demann zot; parey ti'n ekri dan sa bann let.

¹² Zot ti proklanm en zenn e demann Nabot prezid lasanble.

¹³ De zonm san moralite ti asiz an fas avek li; zot ti akiz Nabot an prezans lepep. Zot ti dir, “Nabot in modi Bondye ek lerwa.” Alor, zot ti anmenn li deor lavil, e zot ti saboul li avek ros ziska ki i ti mor.

¹⁴ Apre, zot ti anvoy dir Zezabel, “Nabot in ganny saboule ek ros, in mor.”

¹⁵ Ler Zezabel ti'n antann ki Nabot in ganny touye avek ros, i ti dir Akab, “Leve, pran posesyon plantasyon rezen Nabot, ki sorti Zizreel e ki ti refize vann ou; Nabot i nepli vivan, i'n mor.”

¹⁶ Ler Akab ti'n antann ki Nabot ti'n mor, i ti al dan plantasyon rezen Nabot sa Zizreelit, pour pran posesyon.

Eli I Anons Pinisyon Akab ek Zezabel

¹⁷ SENYER ti koz avek Eli, sa Tisbit. I ti dir li,

¹⁸ “Desann! Al rankontre Akab, lerwa Izrael ki Samari. I dan plantasyon rezen Nabot ki i'n al pran posesyon.

¹⁹ Dir li: La sa ki SENYER i deklare: La kot lisyen i'n lis disan Nabot, zot pou osi lis ou prop disan.”

²⁰ Akab ti dir Eli, “La ou'n trouv mwan, mon lennmi!” Eli ti dir li, “Mon'n trouv ou akoz ou'n kontan fer tou sa ki depler SENYER.

²¹ La mon pou anmenn maler lo ou; mon pou fer ou disparet, mon pou detri tou bann zonm dan fanmir Akab, lesklav ek zonm lib parmi pep Izrael.

²² Mon pou tret ou fanmir parey mon'n tret fanmir Zeroboanm, garson Nebat, parey lafanmir Basa garson Ahiya, akoz ou'n provok mon lakoler, e akoz ou'n fer Izrael komet pese.

²³ Konsernan Zezabel, la sa ki SENYER in deklare: Lisyen pou manz Zezabel pre avek bann miray lavil Zizreel.

²⁴ Sa enn dan fanmir Akab ki mor dan lavil, lisyen pou manze; sa enn dan son fanmir ki mor dan lakanpanny, zwazo pou manze.”

²⁵ Personn pa ti ganny otan plezir pour depler SENYER ki Akab; son fanm Zezabel ki ti enstig li.

²⁶ I ti komet bann aksyon degoutan e ador bann zidol, parey bann Amorit ki Bondye ti detri devan pep Izrael.

²⁷ Kan Akab ti antann sa bann parol, i ti desir son lenz, met lenz dey lo li e i ti zennen. I ti dormi dan sa lenz dey e mars dousman.

²⁸ SENYER ti koz avek Eli, sa Tisbit. I ti dir li,

²⁹ “Eski ou'n war ki mannyer Akab in imilye li devan mwan? Akoz in imilye li devan mwan, mon pa pou fer sa bann maler tonm lo li pandan son vivan; me pandan renny son garson ki mon pou fer maler tonm lo son fanmir.”