1 Rwa 18 - Labib An Kreol Seselwa

Eli ek Abdyas

¹ Apre en bon pe letan, dan trwazyenm lannen lasesres, SENYER ti koz avek Eli. I ti dir li, “Al prezant ou devan Akab; mon pou anvoy lapli lo later.”

² Alor, Eli ti al prezant li devan Akab. Lafanmin ti terib dan Samari.

³ Akab ti apel Abdyas, sef dan pale. Abdyas ti en zonm ki ti annan gran respe pour SENYER.

⁴ Kan Zezabel ti masakre bann profet SENYER, Abdyas ti pran 100 profet e kasyet zot par group 50 dan en kavern kot i ti nouri zot avek dipen ek delo.

⁵ Akab ti dir Abdyas, “Travers pei kot i annan bann sours delo ek bann landrwa kot larivyer in sek; kekfwa nou ava kapab trouv zerb e sov lavi nou bann seval ek bann bourik, e konmsa nou pa pou bezwen touy bann zannimo.”

⁶ Alor, zot ti partaz pei ant zot pour fer zot lekspedisyon. Akab ti al dan en direksyon li tousel e Abdyas ti al dan lot direksyon li tousel.

⁷ Abdyas ti ankor dan semen, Eli ti vin rankontre li. Abdyas ti rekonnet li e prostern devan li. I ti dir, “Ou sa, mon senyer, Eli?”

⁸ Eli ti reponn, “Wi mwan menm! Al dir ou met, Eli i isi.”

⁹ Abdyas ti demande, “Ki pese mwan ou serviter, mon'n komet, pour ki ou anvoy mwan dan lanmen Akab pour mwan ganny touye?

¹⁰ Par SENYER ou Bondye ki vivan, napa en nasyon, ni en pei kot mon senyer Akab pa'n anvoy rod ou. Ler ti ganny dir ki ou pa la, i ti fer sa nasyon oubyen sa rwayonm fer serman ki vreman zot pa'n war ou.

¹¹ Aprezan ou dir mwan: Al dir ou senyer ki Eli i isi.

¹² Kan ki mon pou kit ou, lespri SENYER pou pran ou e anmenn ou, mon pa konnen kote; ler mon ava al fer mon rapor avek Akab, i pou touy mwan akoz i pa'n war ou, menm si mon annan gran respe pour SENYER depi mon lanfans.

¹³ Zot in raport ou, mon senyer, sa ki mon ti fer ler Zezabel ti masakre bann profet SENYER; ki mannyer mon ti kasyet 100 zonm parmi bann profet SENYER, par group 50 dan kavern, e ki mannyer mon'n nouri zot avek dipen ek delo?

¹⁴ Aprezan ou dir: Al dir ou senyer ki Eli i isi. I pou touy mwan.”

¹⁵ Eli ti dir, “Par SENYER liniver ki vivan, mwan son serviter, ozordi, mon pou prezant mwan devan Akab.”

Eli Devan Akab

¹⁶ Abdyas ti al zwenn Akab e fer li son rapor. Alor, Akab ti al rankontre Eli.

¹⁷ Kan i ti war Eli, Akab ti dir li, “Ou ki pe anmenn maler dan Izrael?”

¹⁸ Eli ti reponn, “Pa mwan ki anmenn maler lo Izrael, me ou, avek tou lafanmir ou papa, akoz zot in abandonn bann komannman SENYER pour al swiv bann Baal.

¹⁹ Aprezan, fer rasanble pep Izrael antye. Rasanble zot lo montanny Karmel, ansanm avek sa bann 450 profet Baal ek sa 400 profet Asera ki Zezabel i nouri.”

Eli ek bann Profet Baal lo Montanny Karmel

²⁰ Alor, Akab ti apel pep Izrael antye, e rasanble bann profet lo montanny Karmel.

²¹ Eli ti apros lepep. I ti dir zot, “Ziska kan zot pou koup de kote. Si SENYER i Bondye, swiv li, me si Baal ki Bondye, swiv li.” Personn pa ti reponn.

²² Answit, Eli ti dir lepep, “Mwan, mon'n reste sel profet SENYER, tandis ki Baal i annan 450 profet.

²³ Donn nou de toro; zot ava swazir en toro pour zot, koup li an morso e met li lo dibwa me pa alim dife.

²⁴ Zot ava envok non ou bondye e mwan, mon ava envok non SENYER. Sa enn ki ava reponn par dife, li menm Bondye.” Lepep ti reponn, “Dakor!”

²⁵ Apre, Eli ti dir bann profet Baal, “Swazir en toro pour zot e prepar li premye, akoz i annan bokou zot; envok non zot bondye me pa alim dife.”

²⁶ Zot ti pran sa toro ki zot ti'n gannyen e zot ti prepar li. Zot ti envok Baal depi bomaten ziska midi: “Baal! Reponn nou.” Me pa ti annan okenn lavwa, ni repons. Zot ti sote otour lotel ki zot ti'n fer.

²⁷ Ver midi, Eli ti gognard zot, “Kriy pli for! Pa i en bondye? Kekfwa i okipe, i pe vwayaze, oubyen i pe dormi e fodre revey li.”

²⁸ Zot ti kriy tre for; zot ti sizle zot lekor avek lepe ek lans dapre zot koutim, ziska ki disan ti koule lo zot.

²⁹ Midi ti'n pase, zot ti konmans profetize ziska ler lofrann sakrifis apremidi. Me ti napa ni lavwa, ni repons, ni okenn siny latansyon.

³⁰ Apre, Eli ti dir lepep antye, “Apros pli pre avek mwan.” Lepep ti rasanble. Eli ti repar lotel SENYER ki ti'n ganny detri.

³¹ I ti pran 12 ros, pour sa 12 tribi, bann garson Zakob avek ki SENYER ti adres son parol: Ou pou apel Izrael.

³² Avek sa bann ros, i ti konstri en lotel pour SENYER. I ti fer en transe otour lotel ki kapab pran anviron 14 lit legren.

³³ I ti aranz dibwa lo la, koup sa toro an morso e plas li lo dibwa.

³⁴ Apre i ti dir, “Ranpli kat barik avek delo e vers lo sakrifis e lo dibwa.” I ti dir, “Fer ankor en dezyenm fwa.” Zot ti fer li en dezyenm fwa. I ti dir ankor, “Fer en trwazyenm fwa.” Zot ti fer li en trwazyenm fwa.

³⁵ Delo ti koule otour lotel e ranpli bann transe.

³⁶ Kan ti ler pour ofer sakrifis, profet Eli ti avanse. I ti dir, “SENYER, Bondye Abrahanm, Izaak e Izrael! Tou dimoun ava konnen ozordi, ki se ou Bondye dan Izrael; ki mwan ou serviter e ki tou sa ki mon'n fer, se lo ou parol.

³⁷ Reponn mwan SENYER, reponn mwan, pour ki sa pep i konnen ki se ou SENYER ki Bondye, ou ava fer zot leker retourn kot ou.”

³⁸ Alor, dife SENYER ti desann, e bril sakrifis konplet, dibwa, ros, ek later e fer sek delo ki ti dan transe.

³⁹ Kan zot ti'n war sa, pep antye ti prosternen e dir, “SENYER, li menm ki Bondye! SENYER li menm ki Bondye.”

⁴⁰ Eli ti dir zot, “Sezi sa bann profet Baal; pa les en sel sove.” Zot ti atrap sa bann profet; Eli ti anmenn zot kot larivyer Kisonn kot i ti egorz zot.

Eli I Anons Lapli

⁴¹ Eli ti dir Akab, “Monte, al manze e bwar, akoz mon antann tapaz lapli.”

⁴² Alor Akab ti monte pour al manze e bwar. Eli ti mont lo montanny Karmel; i ti prostern li ater, son latet ant son de zenou.

⁴³ I ti dir son serviter, “Monte! Al get dan direksyon lanmer.” Sa serviter ti monte e gete. I ti dir, “Napa nanryen.” Eli ti anvoy li ankor set fwa.

⁴⁴ Setyenm fwa, serviter ti dir, “Mon war en pti nyaz groser lanmen en zonm pe monte sorti dan lanmer.” Eli ti dir, “Monte, al dir Akab: Prepar ou kales e desann, pangar lapli i aret ou.”

⁴⁵ Lesyel ti vin deplizanpli, sonm avek nyaz ek divan. Gro lapli ti konmans tonbe. Akab ti desann e al Zizreel.

⁴⁶ Lanmen SENYER ti lo Eli ki ti ser son sang en otour son leren; i ti taye devan Akab ziska lantre lavil Zizreel.