1 Rwa 17 - Labib An Kreol Seselwa

Profet Eli I Anons Lasesres

¹ Eli, ki ti sorti Tisbit, enn bann zabitan Galaad, ti dir Akab, “Par SENYER Bondye Izrael ki vivan, mwan son serviter mon dir ou: Dan bann lannen ki pe vini, pou napa laroze, ni lapli ziska ler mon dir.”

Eli kot Larivyer Kerit

² SENYER ti dir Eli,

³ “Kit sa landrwa, al ver Les e kasyet ou pre avek larivyer Kerit ki vizavi larivyer Zourden.

⁴ Ou ava bwar delo larivyer; mon'n donn lord bann korbo pour anmenn manze pour ou laba.”

⁵ Eli ti ale e fer parey SENYER ti'n ordonnen: I ti al enstal li pre avek larivyer Kerit vizavi larivyer Zourden.

⁶ Bann korbo ti anmenn dipen ek lavyann bomaten e aswar osi dipen ek lavyann. I ti bwar delo larivyer.

⁷ Me, apre en serten letan, sa larivyer ti sek akoz lapli pa ti'n tonbe dan pei.

Eli kot Vev Sarepta

⁸ Alor, SENYER ti koz Eli,

⁹ “Leve, al Sarepta, ki dan rezyon Sidon, e reste laba. Mon'n donn lord en vev laba pour nouri ou.”

¹⁰ Eli ti leve e al Sarepta. Letan i ti ariv devan laport lavil, ti annan en vev ki ti pe ranmas dibwa. Eli ti dir li, “Anmenn mwan en pe delo pour mwan bwar.”

¹¹ Letan i ti pe ale, Eli ti apel li ankor e dir li, “Anmenn osi en morso dipen.”

¹² I ti reponn, “Par SENYER, ou Bondye ki vivan, mon napa nanryen ki'n kwi; mon annan zis en ponnyen lafarin dan en bol e en pe delwil dan en po. La mon pe ranmas detrwa morso dibwa pour prepar keksoz pour manze, mwan ek mon garson; apre sa, nou ava mor.”

¹³ Eli ti dir li, “Pa bezwen per, al fer parey ou'n dir. Selman, fer en pti galet avan e anmenn kot mwan; apre, ou ava fer pour ou ek ou garson.

¹⁴ Annefe, la sa ki SENYER, Bondye Izrael i deklare: Lafarin pa pou manke dan bol, e po delwil pa pou vid, ziska zour ki SENYER i anvoy lapli lo later.”

¹⁵ I ti ale e fer parey Eli ti'n dir li; pandan en bon letan, i ti ganny dekwa manze, pour li ek son fanmir.

¹⁶ Lafarin pa ti fini dan sa bol, e po delwil pa ti zanmen vid, parey SENYER ti'n dir par lentermedyer Eli.

¹⁷ En pe letan apre, garson sa fanm, ki ti'n resevwar Eli kot li, ti tonm malad. Son maladi ti sitan grav ki i ti mor.

¹⁸ I ti dir Eli, “Ki ou annan kont mwan, profet Bondye? Eski ou'n vin se mwan pour mel dan mon zafer e koz lanmor mon garson!”

¹⁹ I ti reponn, “Donn mwan ou garson.” I ti pran li dan lebra son manman e anmenn li dan son lasanm dan letaz e depoz li lo son lili.

²⁰ Eli ti priy SENYER. I ti dir: SENYER, mon Bondye, akoz ou'n anvoy maler lo sa vev ki'n resevwar mwan se li e fer son garson mor?

²¹ Apre, i ti alonz lo sa garson an trwa fwa e adres SENYER sa lapriyer: SENYER, mon Bondye, mon sipliy ou, rann sa zanfan son souf lavi!

²² SENYER ti ekout Eli; souf lavi sa zanfan ti retourn dan li e i ti reviv.

²³ Eli ti pran sa zanfan e desann anba dan lakaz avek li e rann li avek son manman. I ti dir, “Gete, la ou garson; i vivan.”

²⁴ Sa fanm ti dir Eli, “Aprezan mon konnen ki ou vreman en profet Bondye, e ki Parol Bondye ki ti sorti dan ou labous i laverite.”