1 Rwa 16 - Labib An Kreol Seselwa

¹ SENYER ti koz avek profet Yehou, garson Hanani, lo size Baasa:

² Mon'n tir ou dan lapousyer e mon'n elev ou pour etabli ou sef mon pep Izrael. Ou'n azir parey Zeroboanm, e ou'n fer mon pep Izrael tonm dan pese, e ou'n provok mon lakoler avek zot bann pese.

³ Mon pou tret ou fanmir parey mon ti tret fanmir Zeroboanm, garson Nebat. Mon pou detri lafanmir Baasa.

⁴ Tou manm ou fanmir ki mor dan lavil pou ganny devore par lisyen, e tou sa ki mor dan lakanpanny pou ganny devore par zwazo.

⁵ Tou bann aksyon Baasa, tou sa ki i'n fer, son bann aksyon brav, in ganny ekri dan liv Listwar bann Lerwa Izrael.

⁶ Basa ti al rezwenn son bann zanset e ganny antere Tirsa. Son garson Ela ti vin lerwa dan son plas.

⁷ Parol SENYER ti ganny adrese par lentermedyer Yehou, garson profet Hanani, pour Baasa ek son fanmir, akoz bann keksoz ki i'n fer pour depler SENYER e provok son lakoler. I ti'n azir parey lafanmir Zeroboanm; osi akoz i ti'n detri lafanmir Zeroboanm.

Ela, Lerwa Izrael

⁸ Dan vennsizyenm lannen renny Asa, lerwa Zida, Ela, garson Baasa, ti vin lerwa lo Izrael, dan Tirsa; i ti renny pandan 2 an.

⁹ Zimri, komandan lanmwatye bann kales lager Ela, ti revolte kont li. I ti'n bwar e soule kot Arsa, sef dan lakaz Tirsa.

¹⁰ Zimri ti antre, touy li e renny dan son plas. Sa ti ariv dan vennsetyenm lannen renny Asa, lerwa Zida.

¹¹ De ki i ti'n vin lerwa e mont lo tronn, i ti touy tou manm lafanmir Baasa. I pa ti les en sel sirvivan mal parmi son fanmir, ni paran, ni zanmi.

¹² Zimri ti detri lafanmir Basa antye dapre parol ki SENYER ti'n prononse kont Baasa par lentermedyer profet Yehou,

¹³ akoz tou bann pese Baasa, ek pese son garson Ela, ki zot ti'n komet e ki zot ti'n fer Izrael komet, e provok lakoler SENYER, Bondye Izrael par zot bann Zidol.

¹⁴ Tou bann aksyon Ela, tou sa ki i'n fer, in ganny ekri dan liv Listwar bann Lerwa Izrael.

Zimri, Lerwa Izrael

¹⁵ Dan vennsetyenm lannen renny Asa, lerwa Zida, Zimri ti renny set zour dan Tirsa. Lepep ti'n pran pozisyon kont Gibetonn, en teritwar Filisten.

¹⁶ Lepep ki ti pe kanpe, ti antann dir ki Zimri in fer en konplo e in touy lerwa. Alor, sa menm zour dan kan, pep Izrael ti met Omri komandan larme, e fer li vin lerwa pep Izrael.

¹⁷ Alor, Omri ti mont Gibetonn avek pep Izrael e zot ti anserkle Tirsa.

¹⁸ Kan Zimri ti remarke ki lavil ti'n ganny pran, i ti antre dan pale rwayal e met dife; i ti mor dan dife.

¹⁹ Sa ti arive akoz bann pese ki i ti'n komet, bann aksyon ki ti depler SENYER, parey Zeroboanm ti'n fer, e pour bann pese ki i ti'n komet e fer Izrael komet.

²⁰ Tou bann aksyon Zimri ek bann konplo ki i ti'n fer, in ganny ekri dan liv Listwar bann Lerwa Izrael.

Omri, Lerwa Izrael

²¹ Alor, pep Izrael ti'n ganny diviz an de parti; lanmwatye ti swiv Tibni, garson Ginat pour fer li vin lerwa, e lot lanmwatye ti swiv Omri.

²² Me bann ki ti swiv Omri, ti pli for ki bann ki ti swiv Tibni, garson Ginat. Tibni ti mor, Omri ti vin lerwa.

²³ Dan trantwityenm lannen renny Asa, lerwa Zida, Omri ti vin lerwa pep Izrael, pour 12 an, apre ki i ti'n renny 6 an, dan Tirsa.

²⁴ I ti aste montanny Samari pour 6,000 pyes larzan avek Semer. I ti konstri en lavil fortifye ki i ti apel Samari, dapre non Semer, ki ti propriyeter sa montanny.

²⁵ Omri ti fer sa ki depler SENYER. I ti fer plis ki tou bann ki ti avan li.

²⁶ I ti fer parey Zeroboanm, garson Nebat, dan bann pese ki i ti fer Izrael komet e provok lakoler SENYER, Bondye Izrael, par zot bann zidol.

²⁷ Leres bann aksyon Omri, sa ki i'n fer ek kouraz ki i'n montre, in ganny ekri dan liv Listwar bann Lerwa Izrael

²⁸ Omri ti al rezwenn son bann zanset e i ti ganny antere Samari; Akab son garson, ti vin lerwa dan son plas.

Akab, Lerwa Izrael

²⁹ Dan trantwityenm lannen renny Asa, lerwa Zida, Akab, garson Omri, ti vin lerwa lo Izrael. Akab, garson Omri, ti renny lo Izrael pandan 22 an dan Samari.

³⁰ Akab, garson Omri, ti fer sa ki depler SENYER plis ki tou sa ki ti avan li.

³¹ Konmsi pa ti ase pour li komet bann pese parey Zeroboanm, garson Nebat, i ti marye avek Zezabel, fiy Et-Baal, lerwa Sidonit; i ti al kot Baal e ador li.

³² I ti konstri en lotel an loner Baal, dan tanp Baal ki i ti'n konstri dan Samari.

³³ Akab ti osi konstri en poto sakre pour Asera. I ti fer en kantite keksoz pour provok lakoler SENYER, Bondye pep Izrael, plis ki tou bann lerwa Izrael avan li.

³⁴ Dan son lepok, Hiel, en zabitan Betel, ti konstri Zeriko. I ti poz fondasyon sa lavil, ki ti kout lavi son lene garson, Abiranm, e i ti enstal bann laport lavil ki ti kout li lavi Segoub, son dezyenm garson, dapre parol ki SENYER ti'n dir par lentermedyer Zozye, garson Noun.