1 Rwa 15 - Labib An Kreol Seselwa

Abiyanm, Lerwa Zida

¹ Dan dizwityenm lannen renny lerwa Zeroboanm, Abiyanm, garson Nabat, ti vin lerwa Zida.

² I ti renny pandan 3 an dan Zerizalenm. Son manman ti apel Maaka, fiy Abisalonm.

³ I ti komet tou sa pese ki son papa avan li ti komet; i pa ti vreman fidel anver SENYER son Bondye, parey son papa David.

⁴ Sepandan, akoz David, SENYER son Bondye ti donn li en garson koman en lalanp dan Zerizalenm. Konmsa, lafanmir rwayal pa pou tennyen dan Zerizalenm.

⁵ David ti'n fer sa ki byen devan SENYER. Pandan tou son lavi, i pa ti detourn li kont son bann komannman, sof sa ki i ti fer kont Iri, sa Hitit.

⁶ Ti toultan annan lager ant Roboanm ek Zeroboanm pandan tou zot lavi.

⁷ Tou leres bann aksyon Abiyanm ek tou sa ki i'n fer, in ganny ekri dan liv Listwar bann Lerwa Zida. Ti annan lager ant Abiyanm ek Zeroboanm.

⁸ Abiyanm ti al rezwenn son bann zanset e ganny antere dan lavil David. Asa, son garson, ti renny dan son plas.

Asa, Lerwa Zida

⁹ Dan ventyenm lannen renny Zeroboanm, lerwa Izrael, Asa ti vin lerwa Zida.

¹⁰ I ti renny pandan 40 an dan Zerizalenm. Son manman ti apel Maaka, fiy Abisalonm.

¹¹ Asa ti fer sa ki ti drwat devan SENYER, parey son papa David.

¹² I ti fer disparet bann prostitye sakre dan pei e retir tou bann zidol ki son bann zanset ti'n fer.

¹³ I ti osi aras Larenn Mer son granmanman Maaka son tit, akoz i ti'n fer en stati pour Asera. Asa ti demoli sa zidol e bril li kot larivyer Sedron.

¹⁴ Me, i pa ti detri bann landrwa sakre, menm si pandan tou son lavi, son leker ti senser anver SENYER.

¹⁵ I ti plas dan tanp SENYER bann lobze ki son papa ti'n konsakre pour Bondye, ek bann diferan lobze annarzan e annor, ki li menm ti'n konsakre pour Bondye.

Lalyans avek Aranm Kont Izrael

¹⁶ Ti annan lager ant Asa ek Baasa, lerwa Izrael, pandan tou zot lavi.

¹⁷ Baasa, lerwa Izrael, ti atak Zida, e i ti konstri lavil Rama pour bar semen Asa, lerwa Zida.

¹⁸ Asa ti pran tou lor ek larzan ki ti reste dan trezor tanp SENYER ek tou trezor dan pale lerwa. I ti konfye sa avek son bann zofisye pale. Apre, Asa ti anvoy zot kot Benn-Hadad, garson Tabrimonn, garson Hezionn, lerwa Lasiri ki ti reste Damas, avek sa mesaz:

¹⁹ Annou fer en lalyans ant ou ek mwan, parey ti annan ant ou papa ek mon papa. Mon'n anvoy ou kado lor ek larzan. Al kas lalyans avek Baasa, lerwa Izrael, pour li kit mon teritwar.

²⁰ Benn-Hadad ti ekout parol Asa e i ti anvoy bann sef son larme atak bann lavil Izrael e pran Iyonn, Dann, Abel-Bet-Maaka ek rezyon Kineret, ansanm avek pei Neftali antye.

²¹ Ler Baasa ti antann sa, i ti aret konstriksyon Rama e i ti al reste Tirsa.

²² Alor, lerwa Asa ti demann pep Zida antye, san okenn eksepsyon, pour anmenn tou bann ros ek tou dibwa ki Baasa ti pe servi pour konstriksyon Rama. Lerwa Asa ti servi tousala pour konstri Geba, dan teritwar Benzamen ek Mispa.

²³ Tou leres bann aksyon Asa, son lafors ek tou sa ki i'n fer, bann lavil ki i'n konstri, tousala, in ganny ekri dan liv Listwar bann Lerwa Zida. Me dan son vye zour, Asa ti malad son lazanm.

²⁴ I ti al rezwenn son bann zanset e ganny antere dan lavil son papa, David. Yozafat son garson ti vin lerwa dan son plas.

Nadab, Lerwa Izrael

²⁵ Nadab, garson Zeroboanm, ti vin lerwa lo Izrael pandan dezyenm lannen renny Asa, lerwa Zida. I ti renny lo Izrael pandan 2 an.

²⁶ I ti fer sa ki depler SENYER; i ti azir parey son papa, e komet menm pese ki i ti fer Izrael tonm ladan.

²⁷ Baasa, garson Ahiya, dan lafanmir Isakar, ti mont en konplo kont li, e pandan ki Izrael ti pe anserkle Gibetonn, en lavil Filisten, Baasa ti asasin lerwa Nadab.

²⁸ Baasa ti touy Nadab pandan trwazyenm lannen renny Asa, lerwa Zida, e i ti renny dan son plas.

²⁹ Pandan ki i ti lerwa, i ti detri lafanmir Zeroboanm antye. I pa ti les personn trankil, ziska ki i ti'n masakre zot tou, dapre parol ki SENYER ti'n dir par lentermedyer son serviter Ahiya, en Silonit.

³⁰ Tousala ti arive akoz pese ki Zeroboanm ki ti komet e pese ki i ti fer Izrael tonm ladan; akoz i ti osi provok lakoler SENYER, Bondye pep Izrael.

³¹ Tou leres bann aksyon Nadab, tou sa ki i'n fer, in ganny ekri dan liv Listwar bann Lerwa Izrael.

³² Pandan tou zot lavi, ti annan lager ant Asa ek Baasa lerwa Izrael.

Baasa, Lerwa Izrael

³³ Pandan trwazyenm lannen son renny, Asa, lerwa Zida, Baasa garson Ahiya, ti vin lerwa lo Izrael, dan Tirsa. I ti renny pandan 24 an.

³⁴ I ti fer sa ki depler SENYER, e azir parey Zeroboanm e komet menm pese ki i ti fer Izrael tonm ladan.