1 Rwa 14 - Labib An Kreol Seselwa

Lafen Renny Zeroboanm

¹ Dan sa lepok, Abiya, garson Zeroboanm ti tonm malad.

² Zeroboanm ti dir son fanm, “Leve, degiz ou, pour ki personn pa rekonnet ki ou fanm Zeroboanm, e mont Silo. Ahiya, sa profet ki ti dir mwan ki mon pou vin lerwa lo sa pep, i reste laba.

³ Anmenn avek ou dis dipen, en pe gato ek en po dimyel, e al kot li. I ava dir ou ki pou arive avek nou garson.”

⁴ Fanm Zeroboanm ti fer sa ki son mari ti'n dir li: I ti leve, al Silo e antre kot Ahiya. Ahiya pa ti war kler; son lizye ti nepli bon akoz lavyeyes.

⁵ SENYER ti dir Ahiya, “Fanm Zeroboanm pe vin war ou konsernan son garson ki malad. Ou konnen ki ou pou dir li. Sa fanm pou fer li pas pour en lot dimoun.”

⁶ Koman Ahiya ti antann lepa sa fanm, ki ti pe antre, i ti dir, “Antre fanm Zeroboanm. Akoz ou fer ou pas pour en lot dimoun? Mon annan en move nouvel pour ou.

⁷ Al dir Zeroboanm: La sa ki SENYER, Bondye pep Izrael i deklare: Mon'n elev ou parmi lepep e mon'n etabli ou koman sef mon pep Izrael.

⁸ Mon'n aras rwayonm dan fanmir David, e mon'n donn ou. Me ou pa'n fer parey mon serviter David, ki ti gard mon bann komannman, swiv avek tou son leker, e fer tou sa ki drwat, pour fer mwan plezir.

⁹ Ou, ou'n azir pli mal ki tou sa bann ki ti avan ou. Ou'n provok mon lakoler an fabrikan bann bondye etranze ek zidol an metal; ou'n rezet mwan.

¹⁰ Pour sa rezon, mon pou anvoy maler lo fanmir Zeroboanm, mon pou detri tou zonm, lesklav koman zonm lib dan Izrael; mon pou balye e fer disparet fanmir Zeroboanm konpletman, parey salte.

¹¹ Tou manm lafanmir Zeroboanm ki mor dan lavil, pou ganny manze par lisyen e sa ki mor dan lakanpanny, pou ganny devore par zwazo.” SENYER ki pronons sa parol:

¹² Ou! Retourn se ou. Koman ou pou met lipye dan lavil, sa zanfan pou mor.

¹³ Izrael antye pou lamante e anter li. Zis li dan lafanmir Zeroboanm ki pou ganny met dan en tonbo, akoz dan lafanmir Zeroboanm zis li tousel ki SENYER, Bondye Izrael, in trouv keksoz bon e ki fer li plezir.

¹⁴ Apre, SENYER pou swazir pour li en lerwa dan Izrael; i pou detri lafanmir Zeroboanm. Deza, sa pe arive!

¹⁵ SENYER pou frap Izrael. I pou parey en tiz ki balanse dan delo; i pou aras Izrael dan sa bon teritwar ki i'n donn son bann zanset, e i pou dispers li lo lot kote larivyer Efrat, akoz zot in provok lakoler SENYER avek bann ros sakre ki zot in fer.

¹⁶ SENYER pou abandonn Izrael akoz pese Zeroboanm e pese ki i'n fer Izrael komet.

¹⁷ Fanm Zeroboanm ti retourn se li. I ti ariv Tirsa. Koman i ti poz lipye devan laport, son garson ti mor.

¹⁸ Zot ti anter li e Izrael antye ti fer lamantasyon, dapre parol ki SENYER ti'n dir par lentermedyer son serviter, profet Ahiya.

¹⁹ Leres bann aksyon Zeroboanm, mannyer ki i ti fer lager e koman i ti rennyen, in ganny ekri dan liv Listwar bann Lerwa Izrael.

²⁰ Zeroboanm ti renny pandan 22 an. I ti ganny antere avek son bann zanset. Apre son lanmor, son garson Nadab ti vin lerwa dan son plas.

Roboanm, Lerwa Zida

²¹ Roboanm, garson Salomon, ti renny lo Zida. I ti annan 41 an ler i ti vin lerwa, e i ti renny 17 an dan Zerizalenm, lavil kot SENYER ti'n swazir parmi tou teritwar bann tribi Izrael pour plas son non. Son manman ti apel Naama, en Amonit.

²² Zabitan Zida ti fer sa ki mal devan SENYER; zot ti provok son zalouzi plis ki okenn son bann zanset, par bann pese ki zot ti'n fer.

²³ Zot osi, zot ti etabli bann landrwa sakre avek bann ros pilye ek poto sakre lo sak montanny e anba sak pye dibwa avek feyaz.

²⁴ Ti annan menm bann prostitye sakre dan pei. Zot ti imit bann pratik degoutan bann nasyon ki SENYER ti'n sase devan Izrael.

²⁵ Dan senkyenm lannen lerwa Roboanm, Sisak, lerwa Lezip, ti atak Zerizalenm.

²⁶ I ti pran bann trezor dan tanp SENYER e osi dan pale lerwa. I ti pran tou. I ti pran tou bann boukliye annor ki Salomon ti'n fer.

²⁷ Pour ranplas zot, lerwa Roboanm ti fer bann boukliye an bronz ki i ti met anba responsabilite bann gard ki vey lantre pale rwayal.

²⁸ Sak fwa ki lerwa ti al dan tanp SENYER, bann gard ti anmenn bann boukliye, e apre retourn avek dan zot plas.

²⁹ Tou leres bann aksyon Roboanm, tou sa ki i'n fer, in ganny ekri dan liv Listwar bann Lerwa Zida.

³⁰ Ti toultan annan lager ant Roboanm ek Zeroboanm.

³¹ Roboanm ti mor e ganny antere avek son bann zanset dan lavil David. Son manman ti apel Naama, en Amonit. Abiyanm, son garson, ti vin lerwa dan son plas.