1 Rwa 13 - Labib An Kreol Seselwa

En Profet I Entervenir Betel

¹ Lo lord SENYER, en profet Bondye sorti Zida ti ariv Betel, pandan ki Zeroboanm ti pe ofer lansan lo lotel.

² Sa zonm ti kriy kont lotel par lord SENYER. I ti dir: Lotel! Lotel! La sa ki SENYER i deklare: En garson pou ne dan fanmir David; i pou apel Zozyas. I pou ofer koman sakrifis lo lotel, bann pret, ki servi dan landrwa sakre, ki bril lansan. Menm lezo bann et imen pou ganny brile lo ou.

³ Sa menm zour, i ti donn en siny: La siny konmkwa SENYER ki'n koze: Lotel pou fann an de, e lasann ki lo la pou fannen.

⁴ Kan lerwa Zeroboanm ti'n antann sa ki profet Bondye ti'n dir kont lotel Betel, i ti lev son lanmen lo lotel e kriye: Atrap sa zonm. Me sa lanmen ki i ti'n leve kont sa zonm, ti paralize, de sort ki i pa ti kapab bes li lo son kote.

⁵ Lotel ti fann an de e lasann ki ti lo la, ti fannen dapre siny ki profet Bondye ti'n anonse, dapre parol SENYER.

⁶ Lerwa ti dir sa profet Bondye, “Sipliy SENYER ou Bondye pour ki mon lanmen i geri.” Sa profet Bondye ti priy SENYER, e lanmen lerwa ti geri e i ti retourn parey avan.

⁷ Lerwa ti dir sa profet Bondye, “Vin avek mwan dan lakour; ou ava manz keksoz e mon ava donn ou en kado.”

⁸ Me sa profet Bondye ti dir lerwa, “Menm si ou donn mwan lanmwatye ou rwayonm, mon pa pou al kot ou. Mon pa pou manz ou dipen, ni bwar ou delo,

⁹ akoz mon'n ganny sa lord sorti kot SENYER: Ou pa pou manz dipen, ni bwar delo, ni retourn par menm semen ki ou'n vini.”

¹⁰ Alor, i ti retourn par en lot semen, e i pa ti pran menm semen ki i ti'n vin Betel.

Dezobeisans Profet

¹¹ Ti annan en vye profet ki ti reste Betel. Enn son bann garson ti rakont li tou sa ki sa profet Bondye ti'n fer Betel sa zour e bann parol ki i ti'n dir lerwa.

¹² Zot papa ti demann zot, “Dan ki direksyon i'n ale?” Sa bann garson ti'n war ki semen profet Bondye ki ti sorti Zida, ti'n pran.

¹³ I ti dir son bann garson, “Sel mon bourik.” Alor, zot ti sel son bourik e i ti mont lo la.

¹⁴ I ti swiv profet Bondye e i ti war li pe asiz anba en gran pye dibwa. I ti demann li, “Ou menm profet Bondye ki sorti Zida?” I ti dir, “Wi, mwan menm!”

¹⁵ Alor, i ti dir li, “Vin manz avek mwan dan lakour.”

¹⁶ I ti dir li, “Mon pa kapab retourn avek ou, ni antre kot ou, ni manze, ni bwar delo avek ou, isi.

¹⁷ Akoz, dapre parol ki SENYER in dir mwan: Ou pa pou manze, ni bwar delo laba, ni retourn par semen ki ou'n vini.”

¹⁸ I ti dir li, “Mwan osi mon en profet parey ou; en lanz ki ti dir mwan dapre parol SENYER: Anmenn li se ou pour ki i manz en pe e bwar en pe delo.” Me i ti pe manti avek li.

¹⁹ Alor, i ti retourn avek sa profet. I ti manze e bwar delo kot li.

Lanmor Profet Bondye

²⁰ Letan zot ti pe asiz atab, parol SENYER ti adres avek sa vye profet;

²¹ i ti kriy avek profet Bondye ki ti'n sorti Zida, “La sa ki SENYER i deklare: Akoz ou'n dezobei parol SENYER, e ki ou pa'n gard komannman ki SENYER, ou Bondye in donn ou;

²² akoz ou'n retournen, manze e bwar delo, dan sa landrwa ki mon ti'n dir ou pa pou ni manze, ni bwar delo, ou kadav pa pou ganny antere dan latonm ou bann zanset.”

²³ Apre ki i ti'n manze e bwar, i ti sel bourik sa profet ki i ti'n anmennen.

²⁴ Letan i ti pe ale, i ti zwenn en lyon dan semen e sa lyon ti touy li. Son lekor ti ganny zete dan semen, tandis ki sa bourik ek sa lyon ti reste debout lanmenm, akote lekor.

²⁵ Tou dimoun ki ti pas par la ti war lekor ater lo semen ek sa lyon pe debout obor lekor. Zot ti vin rakont tou dimoun dan lavil kot sa vye profet ti reste.

²⁶ Kan sa profet ki ti'n fer li retournen ti antann sa, i ti dir, “Sa profet Bondye ki dezobei parol SENYER. Alor, SENYER in livre li avek lyon ki'n touy li e kraz son lezo dapre parol ki SENYER ti'n dir li.”

²⁷ I ti dir son bann garson, “Sel mon bourik.” Zot ti sel son bourik.

²⁸ I ti ale e trouv lekor sa zonm lo semen e sa bourik ek lyon ki ti pe debout akote. Sa lyon pa ti'n manz ni son lekor, ni sa bourik.

²⁹ Sa profet ti ranmas lekor sa profet Bondye, plas li lo son bourik e retourn avek li dan lavil pour organiz selebrasyon e anter li.

³⁰ I ti depoz lekor dan son prop tonbo, e zot ti sant en lamantasyon: Maler lo ou, mon frer!

³¹ Apre ki zot ti'n anter lekor, sa profet ti dir son bann garson, “Kan mon mor, anter mwan dan sa menm tonbo kot sa profet Bondye in antere; depoz mon lezo akote son lezo.

³² Annefe, mon sir ki sa parol SENYER ki i ti kriye kont lotel Betel e kont tou bann lakaz dan landrwa sakre dan lavil Samari, pou realize.”

³³ Malgre tousala, Zeroboanm pa ti abandonn son move semen. I ti swazir ankor bann pret pour bann landrwa sakre parmi lepep, nenport ki ti anvi vin pret dan bann landrwa sakre.

³⁴ Sa ti pese lafanmir Zeroboanm. Pour sa rezon ki i'n ganny detri e i'n disparet konpletman lo later.