1 Rwa 11 - Labib An Kreol Seselwa

Bann Fot Salomon

¹ An plis ki fiy Faraon, lerwa Salomon ti kontan bokou fanm etranze: Bann fanm Moabit, Amonit, Edomit, Sidonit ek Hitit,

² sa bann nasyon ki SENYER ti'n dir avek pep Izrael: Ou pa pou annan okenn relasyon avek zot, ni zot avek ou, akoz zot pou sertennman detourn ou leker, pour al kot zot bondye. Me Salomon ti atase avek zot par lanmour.

³ Parmi son bann fanm, ti annan 700 prenses, 300 menazer; son bann fanm ti detourn son leker.

⁴ Annefe, dan lavyeyes Salomon, son bann fanm ti detourn son leker ver lezot bondye, e son leker pa ti antyerman pour SENYER son Bondye, parey leker son papa David.

⁵ Salomon ti al ador Astarte, en bondye bann Sidonit, ek Milkonm, bondye degoutan bann Amonit.

⁶ Alor, Salomon ti fer sa ki mal devan SENYER e i pa ti akonpli lavolonte SENYER parey son papa David.

⁷ Alor Salomon ti konstri en landrwa sakre pour Kemok, bondye degoutan bann Amonit, lo montanny, anfas avek Zerizalenm.

⁸ I ti fer parey pour tou son bann fanm etranze, ki ti bril lansan e ofer sakrifis pour zot bondye.

⁹ SENYER ti ankoler avek Salomon akoz son leker ti'n detournen avek SENYER, Bondye Izrael, ki ti'n aparet de fwa avek li,

¹⁰ e ki ti'n donn li lord spesifik konsernan sa bann keksoz ki fodre pa i al ver lezot bondye; me i pa ti obei lord ki SENYER ti'n ordonnen.

¹¹ Alor, SENYER ti dir Salomon, “Akoz ou'n deside azir konmsa, e ou pa'n obzerv mon lalyans ek mon bann regleman ki mon'n donn ou, mon pou pran rwayonm avek ou e donn li avek enn ou bann serviter.

¹² Me, akoz mon serviter, ou papa David, mon pa pou fer li pandan ki ou vivan; mon pou aras li dan lanmen ou garson.

¹³ Sepandan, mon pa pou pran rwayonm antye; mon pou kit en tribi avek ou garson, pour lanmour mon serviter David, e pour lanmour Zerizalenm ki mon'n swazir.”

Ladverser Salomon

¹⁴ SENYER ti soulev en lennmi kont Salomon: Hadad, en desandan rwayal Edomit.

¹⁵ Dan sa letan, David ti dan pei Edonm. Zoab komandan son larme ti'n monte pour anter bann ki ti'n ganny touye, ti touy tou bann mal dan Edonm.

¹⁶ Zoab ti reste la pandan sis mwan, ziska ki i ti'n ekstermin tou zonm dan Edonm

¹⁷ Dan sa lepok ki Hadad ti sove avek bann Edomit, bann serviter son papa. Hadad ti ankor en zanfan.

¹⁸ Zot ti'n kit Madyann e al Parann. La, zot ti pran bann zonm e ariv Lezip kot Faraon, lerwa Lezip, ki ti donn li lakaz, manze ek en morso later.

¹⁹ Faraon ti telman kontan Hadad ki i ti fer li marye avek ser son fanm, ser larenn Tapenes.

²⁰ Ser Tapenes ti ganny en garson pour li ki i ti apel Genoubat ki Tapenes ti sonny dan lakaz Faraon. Genoubat ti reste dan lakaz Faraon parmi son bann garson.

²¹ Depi Lezip, Hadad ti'n antann ki David ti'n mor, e ki Zoab, sef larme ti'n mor osi. Alor, Hadad ti demann Faraon, “Les mwan retourn dan mon pei.”

²² Faraon ti dir li, “Ki i mank ou isi kot mwan, pour ou ganny lanvi retourn dan ou pei?” I ti reponn, “Nanryen, me les mwan ale kan menm.”

²³ Bondye ti soulev en lot ladverser kont Salomon: Rezonn, garson Elyada, ki ti'n sove kot son met Adadezer, lerwa Soba.

²⁴ I ti'n rasanble en group zonm avek li, e vin sef en group, apre ki David ti'n masakre bann troup son met. Zot ti al Damas kot zot ti reste e fer li lerwa Damas.

²⁵ Anplis ki bann ravaz ki Hadad ti fer, Rezonn ti en lennmi Izrael pandan tou lavi Salomon; i ti ay Izrael e renny lo Lasiri.

Promes Bondye pour Zeroboanm

²⁶ Zeroboanm ti garson Nebat, en Efratit sorti Zereda; son manman ti en vev ki ti apel Zerouya. I ti en zofisye kot Salomon, me i ti lev son lanmen kont lerwa.

²⁷ La koman i ti revolte kont lerwa: Salomon ti pe konstri Milo e i ti pe repar sa trou dan miray lavil David, son papa.

²⁸ Zeroboanm ti en zennonm kapab, e ler Salomon ti remark son kapasite, i ti met li ansarz tou travay latas dan tribi Zozef.

²⁹ Kan Zeroboanm ti Zerizalenm, i ti rankontre profet Ahiya ki sorti Silo, lo semen, dan en lenz nef. Zot ti tousel dan lakanpanny.

³⁰ Ahiya ti atrap son lenz ki ti lo li e desir li an 12 morso.

³¹ I ti dir Zeroboanm: Pran dis morso pour ou; la sa ki SENYER Bondye pep Izrael i deklare: La, mon pe al desir rwayonm dan lanmen Salomon e mon pou donn ou dis tribi;

³² me mon pou retenir en tribi pour lanmour mon serviter David, e pour lanmour Zerizalenm, lavil ki mon'n swazir parmi tou bann tribi Izrael.

³³ Sa i akoz i'n abandonn mwan e i al ador Astarte, bondye bann Sidonit, Kemos bondye Moab, ek Milkonm bondye bann Amonit. I pa'n mars dapre mon volonte, i pa'n fer sa ki byen devan mwan pour gard mon lalwa ek komannman parey son papa David.

³⁴ Malgre sa, mon pa pou pran rwayonm antye dan son lanmen; mon pour gard li koman sef mon pep pandan tou son lavi, akoz mon serviter David ki mon ti swazir, ki ti gard mon bann komannman ek mon bann lalwa.

³⁵ Me mon pou aras rwayonm dan lanmen son garson, e mon pou donn ou dis tribi.

³⁶ Mon pou donn son garson en tribi, pour ki mon serviter David ava touzour annan en desandan ki renny devan mwan Zerizalenm, lavil ki mon'n swazir pour donn mon non.

³⁷ Mon pou swazir ou pour renny lo tou dapre ou dezir, pour ou vin lerwa pep Izrael.

³⁸ Si ou ekout tou sa ki mon ordonn ou, e ki ou mars dapre mon volonte, e fer sa ki byen an gardan mon bann lalwa ek mon bann komannman, parey mon serviter David, mon pou avek ou e mon pou etabli ou desandan byen ferm, parey mon'n fer pour David, e mon ava donn ou Izrael.

³⁹ Par kont, mon pou imilye desandans David, me sa pa pour touzour.

⁴⁰ Salomon ti esey touy Zeroboanm. Me Zeroboanm ti sov Lezip kot Sisak, lerwa Lezip, kot i ti reste ziska lanmor Salomon.

Lanmor Salomon

⁴¹ Leres bann aktivite Salomon in ganny ekri avek tou sa ki i'n fer ek son lasazes dan Liv Listwar Salomon.

⁴² Salomon ti renny lo pep Izrael pandan 40 an dan Zerizalenm.

⁴³ Apre, Salomon ti mor e ganny antere dan lavil son papa, David. Roboanm ti renny dan son plas.