1 Pyer 4 - Labib An Kreol Seselwa

Lavi ki'n Ganny Transformen

¹ Alor, akoz Kris in soufer fizikman, zot osi, zot devre annan sa menm konviksyon. Annefe, sa enn ki'n soufer fizikman, i'n fini avek pese,

² pour li viv leres son lavi, non pa dapre son dezir imen, me dapre lavolonte Bondye.

³ Annefe, pandan ase lontan, zot in viv parey bann etranze, dan vis, move dezir, lavi soular, bann parti bwar avek move aksyon ek ladorasyon zidol degoutan.

⁴ Aprezan, bann etranze i trouv sa drol, e kritik zot akoz zot nepli partisip dan sa bann move fason viv.

⁵ Me sa bann etranze pou bezwen rann kont zot aksyon avek sa enn ki'n pare pour ziz bann ki vivan ek bann ki'n mor.

⁶ Se pour sa rezon ki Bonn Nouvel ti ganny osi anonse avek bann ki'n mor, pour ki menm si zot i'n ganny zize fizikman koman imen, gras a Lespri, zot ava kapab viv lavi Bondye.

Bon Administrater pour Bondye

⁷ Lafen tou keksoz i pros. Pour sa rezon, viv en fason rezonnab avek en lespri vizilan pour zot kapab priye.

⁸ Avan tou, zot devre annan en gran lanmour pour kanmarad, akoz lanmour i akord pardon en kantite pese.

⁹ Pratik lospitalite ant zot san gronnyen.

¹⁰ Sakenn zot, koman en bon administrater, itiliz sa bann don spesyal ki Bondye in donn zot, pour fer dibyen lezot.

¹¹ Sa enn ki prese, i devre transmet Parol Bondye. Sa enn ki rann servis, i devre fer li avek lafors ki Bondye in donn li: Fodre ki dan tou, Bondye i ganny glorifye par Zezi-Kri, ki posed laglwar, lapwisans pour touzour! Amenn.

Soufer koman Kretyen

¹² Mon bann zanmi! Pa bezwen etonnen par bann gran soufrans ki zot pe pas ladan. Napa nanryen ekstraordiner dan sa ki pe ariv zot.

¹³ Okontrer, zot devre kontan ki zot pe partisip dan soufrans Kris. Konmsa, zot osi, zot ava ranpli avek lazwa, kan son laglwar ava ganny revele.

¹⁴ Si zot ganny maltrete akoz non Kris, zot devre ere, akoz Lespri laglwar, Lespri Bondye i repoz lo zot.

¹⁵ Ki personn parmi zot pa soufer koman en kriminel, oubyen en voler, en bandi, oubyen koman bann ki'n mel li dan zafer lezot.

¹⁶ Me, si en dimoun pe soufer akoz i en Kretyen, i pa devre onte. Okontrer, i devre plito rann glwar Bondye, akoz i kapab port sa non.

¹⁷ Annefe, ler i'n arive pour zizman konmanse, e se par pep Bondye ki i pou konmanse. Alor, si zizman Bondye i konmans par nou, ki pou arive avek sa bann ki refize krwar dan Bonn Nouvel Bondye?

¹⁸ Parey Lekritir i deklare: Si sa enn ki zis i ganny sove difisilman, ki pou arive avek sa enn ki annan en move lavi ek bann peser?

¹⁹ Alor, bann ki soufer dapre lavolonte Bondye, zot devre kontinyen fer sa ki byen, e met zot konfyans konpletman dan lavolonte Kreater ki touzour gard son promes.