1 Kronik 23 - Labib An Kreol Seselwa

David I Organiz Travay Bann Levit

¹ David ti'n vin byen vye, kan i ti etabli son garson Salomon koman lerwa Izrael.

² David ti rasanble tou bann sef Izrael, bann pret ek bann levit.

³ Bann levit, ki ti annan 30 an, an montan ti ganny konte; ti annan 38,000 zonm.

⁴ David ti dir, “Parmi zot 24,000 ava sirvey travay dan tanp; 6,000 ava travay koman administrater e ziz,

⁵ 4,000 koman portye e 4,000 pour loue SENYER avek bann lenstriman lanmizik ki'n ganny fabrike spesyalman pour sa.”

⁶ David ti organiz zot par group dapre bann garson Levi: Gersonn, Kehat ek Merari.

⁷ Bann garson Gersonn: Ladann ek Simei.

⁸ Bann garson Ladann: Premye Yehiel, apre Zetanm ek Zoel; trwa an tou.

⁹ Bann garson Simei; trwa an tou: Selomit, Hazyel ek Harann. Zot ti bann sef fanmir Ladann.

¹⁰ Simei ti annan ankor kat garson: Yahat, Ziza, Yeous ek Beria.

¹¹ Yahat ti premye e Ziza dezyenm; Yeous ek Beria ti napa bokou garson, alor, zot ti form en sel fanmir.

¹² Bann garson Kehat; kat an tou: Anmranm, Isar, Hebron ek Ouzyel.

¹³ Bann garson Anmranm: Aaron ek Moiz. Aaron ek son bann garson ti ganny konsakre pour servis tre sen, pour ofer lansan devan SENYER, pour ofisye pour li e pronons bann benediksyon lo son non, pour touzour.

¹⁴ Me bann garson Moiz, serviter Bondye, ti ganny konte parmi tribi Levi.

¹⁵ Bann garson Moiz: Gersonn ek Eliezer.

¹⁶ Garson Gersonn: Premye Sebouel.

¹⁷ Garson Eliezer: Rehabia; i pa ti annan ankor garson, me Rehabia ti annan bokou garson.

¹⁸ Garson Isar: Premye Selomit.

¹⁹ Bann garson Hebron: Premye Yeriya, dezyenm Amaria, trwazyenm Yahazyel e katriyenm Yekameanm.

²⁰ Bann garson Ouzyel: Premye Mise e dezyenm Yisiya.

²¹ Bann garson Merari: Mali ek Mousi. Bann garson Mali: Eleazar ek Kis.

²² Eleazar ti mor san ganny okenn garson, me zis bann fiy ki ti marye avek bann garson Kis.

²³ Bann garson Mousi: Mali, Eder ek Yeremot; trwa an tou.

²⁴ Sa ti bann desandan Levi dapre sef bann fanmir ki ti ganny konte, non par non. Zot ti sa bann, apartir 20 an, an montan, ki ti ganny anploye pour travay lo konstriksyon tanp.

²⁵ David ti dir, “SENYER Bondye Izrael in donn lape son pep Izrael, e i ava reste Zerizalenm pour touzour.

²⁶ Alor, bann Levit pa pou bezwen anmenn ankor sanktyer ek son bann lobze sakre pour son servis.”

²⁷ Dapre bann desizyon final David, sa ti kantite levit ki ti annan 20 an, an montan.

²⁸ Zot rol ti pour asiste bann garson Aaron dan servis lakaz SENYER; zot ti okip lakour ek bann lasal pirifikasyon tou bann lobze sakre e tou servis konsernan tanp.

²⁹ Zot ti osi okip dipen sakre ki ganny ofer devan Bondye. Zot ti prepar lafarin pour bann lofrann vezetal, bann galet san lelven, bann gato kwi lo plak ek lezot gato avek tou bann lenstriman ki servi pour mezire e pour peze.

³⁰ Zot ti bezwen prezan bomaten e aswar pour loue e glorifye SENYER,

³¹ e osi sak fwa ki sakrifis i ganny ofer, bann zour Saba, premye zour le mwan ek lezot zour lafet. Zot ti bezwen prezan sak fwa ki ti bezwen zot, dapre bann regleman pour servis SENYER.

³² Zot ti pran responsabilite sanktyer; zot ti fer preparasyon servis pour bann garson Aaron; e asiste bann garson Aaron zot bann frer dan servis tanp SENYER.