1 Kronik 20 - Labib An Kreol Seselwa

David I Pran Lavil Raba

¹ Lannen swivan, dan lepok kan bann lerwa i sorti pour al lager, Zoab ti sorti avek son larme e devaste bann teritwar Amonit e i ti al anserkle lavil Raba. Me David ti reste Zerizalenm. Zoab ti atak e detri lavil Raba.

² David ti pran kouronn ki ti lo latet bann stati ki ti bann bondye Amonit Milkonm. Sa kouronn ti pez plis ki 30 kilo lor, e ti annan en pyer presyez plase lo la. Zot ti plas sa kouronn lo latet David. Zot ti osi sezi en kantite lobze dan lavil e zot ti anmenn avek zot.

³ David ti deport tou bann zabitan lavil e met zot lo travoforse koman syer, tayer ros e kouper dibwa. I ti fer parey avek tou zabitan lezot lavil Amonit. Apre, David ti retourn Zerizalenm avek son larme.

Lager kont bann Filisten

⁴ Apre sa, lager ti deklare Gezer, kont bann Filisten. Alor, la Sibekai en Housatit, ti touy Sipai en desandan Refait, bann Filisten ti ganny imilye.

⁵ Dan en lot konba kont bann Filisten Elanann, garson Yair, ti touy Lami, frer Golyat ki sorti Gat ki ti anmenn en lans groser en silenn ki servi pour fer latwal lo la.

⁶ Dan en lot konba ki ti arive Gat, en solda lennmi ti en grander ekstraordiner. I ti annan sis ledwa lo sak lanmen ek sak lipye, 24 ledwa an tou; i ti osi en desandan zean Rafa.

⁷ I ti ensilte bann Izraelit. Alor, Zonatan, garson Simea, neve David, ti touy li.

⁸ Tousala, ti bann desandan zean ki sorti Gat. David ek son bann solda ti touy zot tou.