1 Kronik 19 - Labib An Kreol Seselwa

Laviktwar David lo Bann Amonit ek Bann Siriyen

¹ Apre, lerwa bann Amonit, ti mor e son garson ti vin lerwa dan son plas.

² David ti dir dan li menm: Mon pou byen tret Hanoun, garson Nahas, akoz son papa ti bon anver mwan. Alor, David ti anvoy bann mesaze prezant li son kondoleans pour lanmor son papa. Bann serviter David ti al kot Hanoun, dan pei Amonit, pour konsol li.

³ Me bann sef Amonit ti dir Hanoun: Eski ou krwar ki akoz David i anvi onor ou papa ki i'n anvoy son bann zans kot ou pour konsol ou? Pa plito pour gete, pour detrir, pour espyonn ou pei, ki i'n anvoy zot kot ou?

⁴ Alor, Hanoun ti pran bann serviter David e fer raz zot, fann zot lenz dan milye kot leren, e fer zot retournen.

⁵ Kan David ti ganny enformen sa ki ti'n arive konsernan son bann zonm, i ti anvoy zwenn zot, akoz son bann zonm ti onte. Lerwa ti fer dir zot: Reste Zeriko ziska ki zot labarb i ava repouse; apre zot ava retournen.

⁶ Kan bann Amonit ti realize ki zot ti'n fer en keksoz onte vizavi David, Hanoun ek bann Amonit ti anvoy 30 tonn larzan, bann kales lager avek son kavalye sorti dan rezyon Mezopotami, Maaka ek Soba.

⁷ Zot ti lwe 32,000 kales lager e lerwa Maaka avek son larme ki ti pe kanpe pre Medba. Bann Amonit ti mobiliz larme dan tou zot bann lavil pour lager.

⁸ Kan David ti antann sa, i ti anvoy Zoab kont zot avek tou son troup bann gerye.

⁹ Bann Amonit ti plas zot an ran batay dan lantre lavil, tandis ki bann lerwa ti reste apar, dan lakanpanny.

¹⁰ Kan Zoab ti war ki i ti devre fer fas avek de fron batay devan e deryer. I ti swazir bann meyer solda dan Izrael e plas zot an fas avek bann Siriyen.

¹¹ I ti plas son frer, Abisai, ansarz leres son bann zonm. Zot ti ganny plase an fas avek bann Amonit.

¹² Zoab ti dir avek son frer: Si bann Siriyen i pli for ki mwan, ou ava vin ed mwan, me si bann Amonit i pli for ki ou, mwan, mon ava vin ed ou.

¹³ Pran kouraz e annou montre nou pep ek bann lavil Bondye ki nou bann zonm kouraze, SENYER ava azir mannyer i war bon.

¹⁴ Zoab avek son larme ti avanse e atak bann Siriyen; me bann Siriyen ti forse sove.

¹⁵ Kan bann Amonit ti war ki bann Siriyen ti'n sove, zot osi, zot ti sove devan Abisai, frer Zoab. Zot ti antre dan lavil e Zoab ti retourn Zerizalenm.

¹⁶ Bann Siriyen ti war ki zot ti'n ganny bate par bann Izraelit. Zot ti anvoy mesaze kot bann Siriyen ki ti lo lot kote larivyer Efrat. Sofak, sef larme Hadadezer ti komandan an sef.

¹⁷ Kan David ti ganny lenformasyon, i ti rasanble larme Izrael antye, travers larivyer Zourden, avans ver zot e pozisyonn son larme anfas. David ti plas son larme dan lord konba e i ti atake.

¹⁸ Bann Siriyen ti sove devan larme Izrael e David ti touy 7,000 seval ki trenn kales e 40,000 gerye apye. I ti osi touy Sofak, sef zot larme.

¹⁹ Kan bann serviter Hadadezer ti remarke ki zot ti'n ganny bate par larme Izraelit, zot ti fer lape avek David e zot ti soumet avek li. Depi sa zour, bann Siriyen pa ti zanmen oule al ed bann Amonit ankor.