1 Kronik 18 - Labib An Kreol Seselwa

Bann Laviktwar David

¹ Apre, David ti bat bann Filisten e fer zot soumet avek li. I ti pran lavil Gat ek son bann vilaz, dan lanmen bann Filisten.

² I ti bat bann Moabit ki ti vin bann serviter David. Zot ti bezwen pey li taks.

³ David ti bat Hadadezer lerwa Soba, dan direksyon Hamat. Sa ti lepok ki Hadadezer ti pe al etabli son pouvwar ziska kot larivyer Efrat.

⁴ David ti sezi 1,000 kales lager, pran prizonnyen 7,000 kavalye, 20,000 solda apye; i ti gard pour li menm 100 per seval, me i ti koup zare tou lezot seval.

⁵ Kan bann Siriyen ki ti Damas ti sorti pour ed Hadadezer, lerwa Zoba, David ti touy 22,000 zonm parmi bann solda Siriyen.

⁶ David ti plas solda dan Damas. I ti fer bann Siriyen vin son bann serviter e fer zot pey li taks. SENYER ti donn laviktwar David partou kot i ti ale.

⁷ David ti pran bann boukliye annor bann serviter Hadadezer e anmenn Zerizalenm.

⁸ I ti osi sezi en gran kantite bronz ki ti dan Tibat ek Koun, bann lavil Hadadezer. Salomon ti servi sa bann materyo pour fabrik lanmer an bronz, bann kolonn ek bann vaz an bronz.

⁹ Kan Toou, lerwa Hamat, ti tande ki David ti'n bat larme antye Hadadezer, lerwa Zoba,

¹⁰ i ti anvoy son garson, Hadoranm kot lerwa David pour felisit li, akoz i ti'n lager e bat Hadadezer ki ti'n souvan fer lager avek Toou. I ti anvoy toudsort kalite lobze annor, annarzan e an bronz;

¹¹ David ti konsakre sa bann lobze pour SENYER, ansanm avek tou larzan ek lor ki i ti'n sezi avek bann pep Edonm, Moab, Amonit, Filisten ek Amalesit.

¹² Abisai, garson Zerouya, ti touy 18,000 Edomit dan Vale Disel.

¹³ I ti plas bann gerye dan pei Edonm e fer tou bann Edomit vin serviter David. SENYER ti donn laviktwar David partou.

¹⁴ David ti renny lo pep Izrael e i ti pas zizman avek drwatir lo tou son pep.

¹⁵ Zoab, garson Serouya, ti komandan larme; Zozafat garson Ahiloud ti portparol lerwa.

¹⁶ Sadok, garson Ahitoub ek Abimelek, garson Abiatar, ti pret; Savsa ti sekreter;

¹⁷ Benaya, garson Yoyada, ti komandan bann Keretit ek bann Peletit dan gard rwayal. Bann garson David ti bann premye reprezantan lerwa.