1 Kronik 16 - Labib An Kreol Seselwa

¹ Zot ti anmenn Kof Lalyans Bondye, e plas li dan latant ki David ti'n monte pour li. Zot ti ofer sakrifis konplet ek sakrifis lape devan Bondye.

² Kan David ti'n fini ofer sa bann sakrifis konplet ek sakrifis lape, i ti beni lepep lo non SENYER.

³ I ti distribye en morso lavyann ek pake rezen sek avek pep Izrael antye. Sakenn, zonm koman fanm, ti ganny en dipen ron, en gato dat ek en pake rezen.

⁴ David ti plas devan Kof Lalyans SENYER, en group levit ki ti an servis, pour selebre e loue SENYER, Bondye Izrael:

⁵ Asaf ti sef e akote li Zakari son asistan. Parmi, ti annan osi Yeyel, Semiramot, Yehiel, Matitia, Eliab, Benaya, Obed-Edonm, ek Yeyel. Zot ti responsab pour zwe laarp ek lir; Asaf ti bat senbal.

⁶ Pret Benaya ek Yahazyel ti sonn tronpet kontinyelman devan Kof Lalyans Bondye.

⁷ Sa zour, pour premye fwa, David ti donn Asaf ek son bann frer, responsabilite pour loue SENYER.

⁸ Remersye SENYER, proklanm son non! Fer bann nasyon konn son bann mervey!

⁹ Sant pour li, loue li avek lanmizik pour li! Rakont son bann mervey!

¹⁰ Rann glwar son non sen! Zot tou ki rod SENYER, rezoui!

¹¹ Tourn ver SENYER e rod son pwisans! Rod kontinyelman son prezans!

¹² Rapel son bann mervey ki i'n fer, Son bann gran keksoz ek bann zizman ki i'n anonse,

¹³ Desandans son serviter, Izrael son serviter, bann garson Zakob, ki i'n swazir!

¹⁴ Se li SENYER, nou Bondye; i egzers son zizman lo later antye.

¹⁵ Rapel ki son lalyans pour touzour, son parol ki i'n donnen pour mil zenerasyon;

¹⁶ Son lalyans ki i ti fer avek Abrahanm, son serman ki i ti fer avek Izaak.

¹⁷ I'n etabli li en lalwa pour Zakob, e en lalyans eternel pour Izrael.

¹⁸ I ti dir: Mon pou donn ou pei Kanaan, koman en patrimwann.

¹⁹ Zot ti ankor en pti ponnyen, san lenportans, e zot ti bann etranze dan pei.

²⁰ Zot ti eran, sorti kot en nasyon pour al kot en lot, sorti dan en rwayonm pour al dan en lot.

²¹ Me i pa ti les personn kraz zot. I ti averti bann lerwa lo zot size:

²² Pa tous bann ki mon'n konsakre, e pa fer ditor mon bann profet!

²³ Later antye! Sant an loner SENYER! Anons son delivrans zour apre zour.

²⁴ Proklanm son grander, parmi bann nasyon. Rakont son bann mervey, parmi tou bann pep!

²⁵ SENYER i gran e merit ganny loue. I pli terib ki tou lezot bondye.

²⁶ Tou bondye bann nasyon i bann zidol, Me SENYER ki'n kre lesyel.

²⁷ Laglwar ek mazeste i devan li; Pwisans ek lazwa i la kot i ete.

²⁸ Pep tou nasyon! Donn SENYER, Donn SENYER laglwar ek pwisans!

²⁹ Donn SENYER laglwar pour son non! Prezant li bann lofrann e antre dan son prezans! Prostern devan sentete SENYER ler i aparet!

³⁰ Later antye! Tranble devan li! Lemonn i reste ferm, i pa tranble.

³¹ Lesyel! Rezoui. Later! Selebre. Dir parmi bann nasyon: SENYER i lerwa!

³² Lanmer avek tou sa ki ladan, ronfle! Lakanpanny avek tou sa ki ladan! Rezoui!

³³ Alor, bann pye dibwa lafore ava sante avek lazwa devan SENYER, Akoz i pe vini pour ziz later.

³⁴ Loue SENYER, akoz i bon, e son fidelite i dire pour touzour!

³⁵ Dir osi: Sov nou, Bondye nou delivrans! Rasanble e sov nou parmi bann nasyon, pour ki nou selebre ou non sen, e ki nou pran plezir pour loue ou.

³⁶ Loue SENYER Bondye Izrael depi touzour, e pour touzour! Lepep antye ti dir: Amenn! Loue SENYER.

³⁷ Alor, David ti les Asaf ek son bann frer la devan Kof Lalyans SENYER pour ki zot ofisye kontinyelman, devan Kof Lalyans, dapre lord ki'n ganny etabli pour sak zour.

³⁸ Obed-Edonm, garson Yedoutoun ek Hosa, ansanm avek son 68 frer, ti servi koman portye.

³⁹ I ti osi kit pret Sadok ek son bann frer lezot pret, devan latant SENYER dan landrwa sakre ki dan Gabaon,

⁴⁰ pour ki zot ofer sakrifis devan SENYER lo lotel sakrifis konplet tou le bomaten e tou le swar devan SENYER, parey i'n ganny ekri dan lalwa SENYER ki i'n donn Izrael.

⁴¹ Avek zot, ti annan Hemann, Yedoutoun ek tou leres ki ti ganny swazir spesyalman pour selebre SENYER, akoz son lanmour i dire pour touzour.

⁴² Hemann ek Yedoutoun ti annan tronpet ek senbal avek lezot lenstriman lanmizik pour akonpanny kantik. Bann garson Yedoutoun ti servi koman portye.

⁴³ Apre, lepep antye ti al se zot e David ti retourn kot li pour beni son fanmir.