1 Kronik 15 - Labib An Kreol Seselwa

David I Retourn Kof Sakre Zerizalenm

¹ David ti konstri en lakaz pour li dan lavil David. I ti prepar en landrwa pour Kof Lalyans Bondye e i ti dres en latant pour met li.

² David ti dir, “Personn napa drwa anmenn Kof Lalyans Bondye eksepte bann levit, akoz zot ki SENYER in swazir pour touzour, pour anmenn Kof Lalyans SENYER e pour servi li.”

³ David ti rasanble pep Izrael antye Zerizalenm, pour transport Kof Lalyans SENYER dan son plas ki ti'n prepare pour li.

⁴ David ti rasanble bann garson Aaron ek bann Levit:

⁵ Parmi bann garson Kehat: Ouriel, koman sef, avek son bann frer; 120 an tou;

⁶ parmi bann garson Merari: Asaya koman sef, avek son bann frer; 220 an tou;

⁷ parmi bann garson Gersonn; Zoel koman sef, avek son bann frer; 130 an tou;

⁸ parmi bann garson Elisafann; Semaya koman sef, avek son bann frer; 200 an tou;

⁹ parmi bann garson Hebron; Elyel koman sef, avek son bann frer; 80 an tou;

¹⁰ parmi bann garson Ouzyel; Aminadab koman sef, avek son bann frer; 112 an tou.

¹¹ David ti apel bann pret, Sadok ek Abiatar, avek bann Levit, Ouriel, Asaya, Zoel, Semaya, Elyel, ek Aminadab.

¹² I ti dir zot, “Zot bann sef fanmir parmi bann Levit; pirifye zot ek zot bann frer pour zot kapab transport Kof Lalyans SENYER, Bondye Izrael, pour anmenn li dan sa landrwa ki mon'n prepare pour li.

¹³ Akoz zot pa ti la premye fwa, SENYER, nou Bondye in pini nou akoz nou pa'n pran ka avek li dapre son lord.”

¹⁴ Alor, bann pret ek bann levit ti pirifye zot pour anmenn Kof Lalyans SENYER, Bondye Izrael.

¹⁵ Bann levit ti anmenn Kof Lalyans Bondye lo zot zepol avek bann bar, parey Moiz ti'n ordonnen, dapre parol SENYER.

¹⁶ David ti donn lord bann sef Levit pour swazir bann santer parmi zot bann frer pour fer rezonnen bann lenstriman lanmizik tel ki, laarp, lir ek senbal koman siny rezouisans.

¹⁷ Alor, bann levit ti etabli zot dan zot fonksyon: Hemann, garson Zoel; parmi son bann frer, Asaf, garson Berekya; parmi bann garson Merari, zot bann frer, Etann, garson Kousaya;

¹⁸ avek zot, ti annan zot frer dan dezyenm ran: Zakari, Ben, Yaazyel, Semiramot, Yehiel, Ouni, Eliab, Benaya, Maaseya, Matitia, Eliflehou, ek Mikneya, avek bann portye Obed-Edonm ek Yeyel.

¹⁹ Parmi bann santer: Hemann, Asaf ek Etann pour bat bann senbal an bronz;

²⁰ Zakari, Aziel, Semiramot, Yehiel, Ouni, Eliab, Maaseya ek Benaya pour zwe laarp lo ton soprano;

²¹ Matitia, Eliflehou, Mikneya, Obed-Edonm, Yeyel ek Azazya avek bann lir, lo en ler pli grav, pour antrenn santer.

²² Kenaya, sef Levit, ti ansarz lanmizik, akoz i ti konpetan.

²³ Berekya ek Elkana ti portye pour Kof Lalyans.

²⁴ Bann pret Sebanya, Zozafat, Netaneel, Amasai, Zekarya, Benaya, ek Eliezer ti zwe tronpet devan Kof Lalyans Bondye. Obed-Edonm ek Yehiya ti osi portye pour Kof Lalyans.

²⁵ Avek lazwa, David ek bann ansyen parmi pep Izrael, ek bann sef 1,000, ti al sers Kof Lalyans SENYER kot lakaz Obed-Edonm.

²⁶ Avek sekour Bondye ki bann Levit ti transport Kof Lalyans SENYER; zot ti ofer set toro ek set mouton mal koman sakrifis.

²⁷ David ti met li en rob linenn, ensi tou ki bann Levit ki ti pe anmenn Kof Lalyans, bann santer ek Kenaya, sef lanmizik; David ti osi met en lefod fer avek latwal linenn.

²⁸ Alor, Izrael antye ti fer monte Kof Lalyans SENYER avek rezouisans avek rezonnman kor, tronpet, ek senbal, e avek lakonpannyman laarp ek lir.

²⁹ Ler Kof Lalyans SENYER ti ariv dan lavil David, Mikal, fiy Sail ti get par lafnet; i ti war lerwa David ki ti pe sote e danse, i ti santi laenn pour li, dan son leker.