1 Kronik 14 - Labib An Kreol Seselwa

Aktivite David dan Zerizalenm

¹ Hiranm, lerwa Tir, ti anvoy mesaze kot David, avek dibwa sed, mason ek sarpantye pour fer en lakaz pour li.

² David ti rekonnet ki SENYER in etabli li koman lerwa lo Izrael e ki son rwayonm ti'n vin pli renonmen akoz Izrael, son pep.

³ David ti pran ankor plizyer fanm dan Zerizalenm e i ti ganny ankor en kantite garson ek fiy.

⁴ La bann non son bann zanfan ki i ti gannyen Zerizalenm: Samoua, Sobab, Natan, Salomon,

⁵ Yibar, Elisoua, Elpelet,

⁶ Noga, Nefeg, Yafya,

⁷ Elisama, Beeliada ek Elifelet.

⁸ Kan bann Filisten ti tande ki David ti'n ganny konsakre koman lerwa lo Izrael, tou bann Filisten ti monte pour al rod li. Ler David ti aprann sa, i ti sorti pour al zwenn zot.

⁹ Bann Filisten ti arive e zot ti fer dega dan vale Refaim.

¹⁰ David ti konsilte Bondye, i ti demann li, “Eski mon pou mont kont bann Filisten? Eski ou pou livre zot dan mon lanmen?” SENYER ti reponn li, “Monte, mon ava livre zot dan ou lanmen.”

¹¹ Bann Filisten ti atak Baal-Perasim; David ti bat zot. I ti dir: Par mon lanmen, Bondye in fer en louvertir dan larme mon bann lennmi, konmsi en lafant ki'n ouver par lafors delo. Zot ti apel sa landrwa Baal-Perasim.

¹² Bann Filisten ti abandonn zot bondye la e David ti donn lord zet zot dan dife.

¹³ Bann Filisten ti fer dega ankor dan vale Refaim.

¹⁴ Kan David ti konsilte ankor Bondye, Bondye ti dir li, “Ou pa pou pourswiv zot; me fer letour e atak zot lo lot kote, vizavi bann pye dibwa.

¹⁵ Kan ou antann tapaz lepa lo bann pye dibwa, sorti e atake, akoz Bondye in sorti devan ou pour atak larme Filisten.”

¹⁶ David ti fer parey Bondye ti'n ordonn li e zot ti bat larme Filisten depi Gabaon ziska Gezer.

¹⁷ Renonmen David ti fannen dan pei antye e SENYER ti fer tou bann nasyon per li.