1 Kronik 13 - Labib An Kreol Seselwa

David I Anmenn Kof Sakre Zerizalenm

¹ David ti konsilte tou son bann sef 1,000, sef 100 e sak sef endividyelman.

² I ti anons devan lasanble Izrael antye: Si i paret bon pour zot e si SENYER, nou Bondye i aprouve, annou anvoy mesaze kot nou bann frer ki dan pei Izrael antye, kot bann pret ek bann levit dan bann lavil alantour, pour ki zot rasanble ansanm avek nou.

³ Annou fer retournen Kof Lalyans nou Bondye, akoz nou pa'n pran ka avek li, pandan lepok Sail.

⁴ Lasanble Izrael antye ti aksepte pour fer li, akoz tou dimoun ti war ki sa ti byen.

⁵ Alor, David ti rasanble Izrael antye depi Sihor, dan Lezip, ziska lantre Hamat, pour retourn Kof Lalyans sorti Kiryat-Yearim.

⁶ David avek Izrael antye ti mont Baala, setadir Kiryat-Yearim, ki ti pour Zida, pour fer retournen Kof Bondye, SENYER ki asiz lo son tronn par lao bann seriben, la kot son non i ganny envoke.

⁷ Zot ti transport Kof Bondye lo en saret nef depi lakaz Abinadab; Ouza ek Ahio ki ti pe anmenn sa saret.

⁸ David avek Izrael antye ti montre zot lazwa avek tou zot lafors devan Bondye; zot ti sante avek lakonpannyman lenstriman lanmizik: Lir, laarp, tanbouren, senbal ek tronpet.

⁹ Kan zot ti ariv Kidonn, landrwa kot zot bat legren, Ouza ti anvoy son lanmen pour atrap Kof Lalyans akoz bann bef ti'n glise.

¹⁰ SENYER ti ankoler kont Ouza e i ti pini li akoz i ti'n anvoy lanmen lo Kof Lalyans. Ouza ti mor la, devan Bondye.

¹¹ David ti dan en gran lafreyer akoz SENYER ti'n pini Ouza avek en tel satiman; ziska ozordi sa landrwa i apel Peres-Ouza.

¹² Sa zour, David ti per Bondye. I ti dir: Ki mannyer mon pou kapab anmenn Kof Lalyans Bondye kot mwan?

¹³ Alor, David pa ti anmenn Kof Lalyans se li, dan lavil David, me i ti anmenn li dan lakaz Obed-Edonm, en Gatit.

¹⁴ Kof Lalyans Bondye ti reste trwa mwan dan lakaz Obed-Edonm e SENYER ti beni lakaz Obed-Edonm avek tou sa ki i ti posede.