1 Kronik 12 - Labib An Kreol Seselwa

Bann Premye Zonm ki ti Swiv David

¹ La bann zonm ki ti vin kot David Siklag, lepok ki i ti pe kasyet akoz Sail, garson Kis: Zot ti parmi sa bann zonm brav ki ti dan son kote pandan lager.

² Ti annan bann tirer fles; zot ti kapab tir fles avek dart ek ros; zot ti servi lanmen gos ek drwat. Sa bann zonm ti sorti dan tribi Benzamen, dan lafanmir Sail:

³ Sef Ahiezer ek Yoas, garson Semaa, en zabitan Gibea. Ti annan osi Yezyel ek Pelet, garson Azmabet; Beraka ek Yeou, en zabitan Anatot.

⁴ Yismaya, en zabitan Gabaon, enn parmi sa bann zonm brav, en sef parmi sa group 30; Zeremi, Yahazyel, Yoanann, Yozabad, en zabitan Gedera,

⁵ Elouzai, Yeremot, Bealya, Semarya, Sefatya, en Harifit;

⁶ Elkana, Yisiya, Azarel, Yoezer ek Yasobeanm, en Koreit,

⁷ osi Yoela ek Zebadya, garson Yerohanm, en zabitan Gedor.

⁸ Parmi bann Gadit ti annan bann brav gerye ki ti al zwenn zot avek David dan bann fortifikasyon dan dezer. Zot ti bann zonm brav eksperyanse dan lager avek lans ek boukliye; zot figir ti parey figir lyon e zot ti rapid koman gazel dan montanny.

⁹ Ezer ti sef, Abdyas, son segon, Eliab trwazyenm;

¹⁰ Mismana katriyenm, Zeremi senkyenm,

¹¹ Atai sizyenm, Eliel setyenm,

¹² Yohanann wityenm, Elzabad nevyenm,

¹³ Zeremi dizyenm, Makbanai onzyenm.

¹⁴ Sa bann Gadit ti bann zofisye larme; enn ki pli pti dan en ran, ti vo plis ki 100, enn ki pli gran ti vo 1,000.

¹⁵ Sa ti bann zonm ki ti travers larivyer Zourden dan premye mwan, ler larivyer ti pe deborde e fer sove tou bann zabitan dan vale, dan Les e dan Was.

¹⁶ Serten parmi bann zonm dan tribi Benzamen ek Zida ti vin zwenn David dan bann fortifikasyon.

¹⁷ David ti sorti pour al zwenn zot. I ti dir, “Si zot in vin kot mwan pour lape, koman zanmi pour ed mwan, mon leker pou atase avek zot; me si zot trai mwan avek mon bann lennmi menm si mon pa'n fer nanryen de mal, Bondye nou zanset i war e i ava ziz zot.”

¹⁸ Alor lespri Bondye ti sezi Amasai, sef group 30. I ti dir: Nou avek ou, David! Nou dan ou kote, garson Zese! Lape i avek ou, e lape i avek tou bann ki sekour ou, akoz ou Bondye ki'n sekour ou. David ti resevwar zot e etabli zot koman bann zofisye son larme.

¹⁹ Serten bann zonm sorti dan tribi Manase ti zwenn lo kote David ler, ansanm avek bann Filisten, i ti al fer lager kont Sail. Me i pa ti ed zot akoz bann sef Filisten ti ganny konseye pour fer David ale. Zot ti dir: Nou krwar i pou abandonn nou pour al lo kote son sef Sail.

²⁰ Ler i ti retourn Siklag, bann zonm dan tribi Manase ti abandonn li: Adna, Yozabad, Yediael, Mikael, Yozabad, Elihou, Siltai, bann sef 1,000 dan tribi Manase.

²¹ Zot ti ed David kont bann group bandi, akoz zot ti bann zonm brav e zot ti komandan larme.

²² Tou le zour, bann zonm ti kontinyen vin zwenn avek David pour ed li, ziska ki i ti'n ganny en gran larme; zot ti parey en larme Bondye.

Troup David

²³ La non bann zonm avek larme ki ti al kot David Hebron, pour transfer larwayote Sail avek David parey SENYER ti'n ordonnen:

²⁴ Parmi bann zonm tribi Zida, 6,800 gerye, arme avek boukliye ek lans.

²⁵ Dan tribi Simeon 7,100 gerye brav.

²⁶ Dan tribi Levi, 4,600 gerye.

²⁷ Ensi ki Yoyada, sef fanmir Aaron, ki ti ganny akonpannyen par 3,700 gerye.

²⁸ Sadok, en zenn gerye brav avek 22 sef sorti dan son prop fanmir.

²⁹ Dan tribi Benzamen, kot Sail i sorti, 3,000 gerye; laplipar ti pe servi lafanmir Sail.

³⁰ Dan tribi Efraim 20,800 gerye, renonmen dan zot fanmir.

³¹ Bann demi tribi Manase 18,000 ki ti'n ganny swazir ekspreseman pour vin etabli David koman lerwa.

³² Dan tribi Isakar, 200 zofisye avek bann zonm ki ti anba zot komann, bann zonm ki ti konnen ki mannyer zize e kan Izrael i devre reazir.

³³ Dan tribi Zabilon, 50,000 gerye pare pour lager, ekipe avek tou bann zarm lager pour ed David avek determinasyon.

³⁴ Dan tribi Neftali, 1,000 komandan avek 37,000 zonm arme avek boukliye ek lans.

³⁵ Dan tribi Dann 28,600 zonm ti pare pour lager.

³⁶ Dan tribi Aser, 40,000 troup pare pour lager.

³⁷ Dan tribi Riben ek Gad e demi tribi Manase ki sorti lo lot kote larivyer Zourden, 120,000 zonm arme avek tou kalite zarm lager.

³⁸ Tou sa bann gerye, ti'n prepar zot dan batay. Zot ti ariv Hebron avek lentansyon pour etabli David koman lerwa Izrael antye; e tou leres pep Izrael ti'n determinen pour etabli David koman lerwa.

³⁹ Zot ti rasanble la avek David e pandan trwa zour zot ti manze e bwar akoz zot bann frer ti'n fer preparasyon pour zot.

⁴⁰ An plis, menm tou bann zabitan depi Isakar ziska Zabilon ek Neftali, ti anmenn dekwa manze lo bourik ek samo, lo mile ek bef: Lafarin, pake fig, rezen sek, diven, delwil, bef ek mouton, akoz Izrael ti dan lazwa.