1 Kronik 11 - Labib An Kreol Seselwa

David, Lerwa Izrael ek Zida

¹ Alor, Izrael antye ti rasanble Hebron devan David. Zot ti dir: Nou ou lezo ek ou disan.

² Dan lepase, menm kan Sail ki ti lerwa, ou ki ti nou sef e ki ti diriz Izrael dan lager e retourn avek zot. SENYER ou Bondye ti dir ou: Se ou ki berze mon pep, Izrael; e ou ava vin sef mon pep, Izrael.

³ Alor, tou bann ansyen dan Izrael ti vin Hebron kot lerwa e David ti fer en lalyans avek zot la, Hebron, devan SENYER e zot ti konsakre David koman lerwa Izrael, dapre parol SENYER atraver Samyel.

⁴ David avek pep Izrael antye ti al Zerizalenm ki ti osi apel Zebis, kot bann Zebizit ti reste.

⁵ Bann zabitan Zebis ti dir David, “Pa antre isi.” Me David ti pran posesyon fortifikasyon Siyon, setadir lavil David.

⁶ David ti dir, “Premye dimoun ki touy en Zebizit ava vin sef e komandan.” Zoab, garson Serouya ti mont premye pour atake. Alor i ti vin sef.

⁷ David ti reste dan fortifikasyon; alor, lavil ti ganny apele lavil David.

⁸ I ti konstri otour lavil depi Milo ek son alantour e Zoab ti rekonstri leres sa lavil.

⁹ David ti vin deplizanpli pwisan; SENYER liniver ti avek li.

Bann Konbatan David

¹⁰ La bann sef dan larme David ki ti donn li gran sipor dan son rwayonm, ansanm avek Izrael, pour fer li vin lerwa dapre parol SENYER konsernan Izrael.

¹¹ La lalis bann brav gerye David: Yasobeanm, garson Hakmoni, sef divizyon. Se li menm ki ti anvoy son lans e pers 300 zonm en sel kou.

¹² Apre li, Eleazar, garson Dodo, en Ahohit, enn parmi sa trwa brav.

¹³ Se li menm ki, avek David, ti al Pas-Danmin, kot bann Filisten ti'n rasanble pour lager. Ti annan la en morso later ranpli avek lorz kot lepep ti sove devan bann Filisten.

¹⁴ Me li, i ti debout la dan milye sa morso later pour defann; i ti ganny laviktwar lo bann Filisten. SENYER ti sov zot e donn zot en gran laviktwar.

¹⁵ Parmi 30 sef, trwa ti desann kot David, dan kap ros, dan kavern Adoulanm, letan bann larme Filisten ti pe kanpe dan vale Refait.

¹⁶ David ti dan en landrwa an sekirite, tandis ki larme Filisten ti Betlehenm.

¹⁷ David ti eksprim en gran dezir, “Lekel ki pou donn mwan delo ki sorti dan pwi ki pre avek baro Betlehenm pour bwar.”

¹⁸ Alor, sa trwa zonm brav ti penetre kan Filisten e tir delo dan pwi ki ti pre avek baro Betlehenm, e anmenn pour David. Me David pa ti oule bwar; i ti vid sa delo ater, devan SENYER.

¹⁹ I ti dir: Mon pa pou kapab fer sa, SENYER pa pou kontan. Eski mon kapab bwar disan sa bann zonm ki'n riske zot lavi? Akoz zot in riske zot lavi pour anmenn sa kot mwan. Alor, i pa ti bwar. La sa ki sa trwa zonm brav ti fer.

²⁰ Abisai, frer Zoab, ti sef parmi sa trwa zonm. Li menm ki ti pers sa 300 zonm avek son lans; sa ti donn li en renonmen parmi sa trwa.

²¹ I ti vin pli renonmen parmi sa trwa; i ti vin zot sef, zot pa ti ariv lo son nivo.

²² Benaya, garson Yoyada en zabitan Kabseel, en zonm brav ki'n fer en kantite gran keksoz. Li menm ki ti touy sa de gran gerye Moab. Li menm ki ti desann dan en trou pour touy en lyon, en zour ki lannez ti'n tonbe.

²³ I ti osi touy en Ezipsyen ki ti mezir de met edmi. Dan lanmen sa Ezipsyen ti annan en lans groser en silenn ki servi dan fabrikasyon latwal; Benaya ti atak li avek en baton e i ti sezi lans sa Ezipsyen, aras li e touy li avek son prop lans.

²⁴ Se sa bann keksoz ki Benaya, garson Yoyada ti fer; i ti fer en renonmen parmi sa trwa vayan gerye.

²⁵ I ti renonmen parmi sa group trant, me i pa ti reste parmi sa group trwa. David ti met li sef son gard personnel.

²⁶ Bann brav gerye ti: Asael, frer Zoab; Elanann, garson Dodo, en zabitan Betlehenm;

²⁷ Samot, en zabitan Harot; Heles en zabitan Pelon;

²⁸ Ira, garson Ikes, ki sorti Tekoa; Abiezer, ki sorti Anatot;

²⁹ Sibekai, en Housatit; Ilai en Ahohit;

³⁰ Maharai, en Netofatit; Heled, garson Baana, en Netofatit;

³¹ Itai, garson Ribai, en zabitan Gibea, en Benzamit; Benaya, en Piratonit;

³² Hourai, en zabitan Gaas; Abyel, en Arabatit;

³³ Azmabet, en Baharoumit; Eliaba, en Saalbonit;

³⁴ Bene-Hasenm, en Gizonit; Zonatan, garson Sakar, en Hararit;

³⁵ Ahianm, garson Sakar, en Hararit; Elifal, garson, Our;

³⁶ Hefer, en Mekeratit; Ahiya, en Pelonit;

³⁷ Hesro, en Karmelit; Naarai, garson Ezbai;

³⁸ Zoel, frer Natan; Mibar, garson Hagri;

³⁹ Selek, en Amonit; Narai, en Beerotit, porter zarm Zoab, garson Serouya;

⁴⁰ Ira, en Yitrit; Gareb, en Yitrit;

⁴¹ Ouri, en Hitit. Zabad, garson Ahlai;

⁴² Adina, garson Siza, en Ribenit, sef tribi Riben e avek li 30 gerye,

⁴³ Hanann, garson Maaka, e Zozafat, en Mitnit;

⁴⁴ Ouzia, en Asteratit; Sama ek Yeyel, garson Hotanm, en Aroerit;

⁴⁵ Yediael, garson Simri, ek Yoha, son frer, en Titsit;

⁴⁶ Eliel, en Maavit, Yeribai, ek Yosavya, bann garson Elnaanm ek Yitma, en Moabit;

⁴⁷ Eliel, Obed ek Yaasiel, en Mesobait.