1 Kronik 10 - Labib An Kreol Seselwa

Lanmor Lerwa Sail

¹ Bann Filisten ti pe lager kont Izrael. Bann gerye Izraelit ti sove devan latak bann Filisten; zot ti tonbe, blese anmor lo montanny Gilboa.

² Bann Filisten ti anserkle Sail ek son bann garson. Zot ti touy Zonatan, Abinadab ek Malki-Soua, garson Sail.

³ Lager ti konsantre lo Sail, bann tirer fles ti dekouver li e Sail ti tranble avek lafreyer.

⁴ Sail ti dir avek son porter zarm: Tir ou lepe e pik mwan; mon pa oule bann ki pa'n sirkonsi i touy mwan e abes mwan. Me son porter zarm ti refize; e i ti ganny en gran lafreyer. Sail ti pran son prop lepe; i ti zet li lo la e i ti mor.

⁵ Ler son porter zarm ti war ki Sail ti'n mor, li osi, i ti zet li lo son lepe e i ti mor.

⁶ Se konmsa ki Sail ek son trwa garson ti mor avek tou lafanmir rwayal anmenmtan.

⁷ Kan tou bann Izraelit ki ti dan vale ti war ki larme ti'n sove e ki Sail ek son bann garson ti'n mor, zot ti abandonn zot lavil e zot ti sove. Bann Filisten ti vin reste la.

⁸ Lannmen, ler bann Filisten ti vin depouy bann kadav, zot ti trouv lekor Sail ek son bann garson lo montanny Gilboa.

⁹ Zot ti depouy li e anmenn son latet ek son bann zarm. Zot ti anvoy mesaze atraver pei Filisten pour fann sa bon nouvel parmi zot bann zidol e parmi lepep.

¹⁰ Apre, zot ti depoz son bann zarm dan tanp zot Bondye e zot ti plas son latet dan tanp Dagon.

¹¹ Me ler bann zabitan Yabes-Galaad ti aprann tou sa ki bann Filisten ti'n fer avek Sail,

¹² tou bann vayan gerye ti leve, pran lekor Sail avek lekor son bann garson e anmenn zot Yabes. Zot ti anter zot bann lezo anba en pye dibwa e zot ti zene pandan set zour.

¹³ Sail ti mor akoz i pa ti fidel anver SENYER; i pa ti obei komannman SENYER. I ti'n osi al konsilte lespri bann mor.

¹⁴ I pa ti konsilte SENYER, ki ti fer li mor e transmet larwayote avek David, garson Zese.