Ròmànì 14 - Mokpwe: Bakwery (New Testament)

Inyɛ̀ tɔ̀ mòtò a rzi kàyìrzɛ̀ e mbunda ya eni

¹ È emeyà hwatò hwa arzɛ ema lìlòkɛ̀ la awu lì ɔtɔ̀wù, e rzi keka lì tɔ̀wɔ na wɔ̀ lì hvòmɛ̀nɛ̀ hweŋge hweyà hwe arzɛ ema hwa lutelì nanù ema hwa àŋgàmɛ̀nɛ̀ lì gbeyà na hweŋge ema hwa rza àŋgàmɛ̀nɛ̀ ò lì gbeyà.

² Lìlòkɛ̀ la lòŋgò la hwatò lì hwa ŋgbelì e wònja ò lì laa tɔ̀ mamɛ, ndi hwatò ema lìlòkɛ̀ la awu lì rza imbamɛ hwa rza laa tɔ̀ ima yòma.

³ Hwàtò ema hwa làa tɔ̀ mamɛ, hwa rzi keka lì niya e wɔ̀ ema hwa rza làa wò làa à làa. Ndèŋgana hwatò hvɛ ema hwa rza làa lòŋgò la hwema hwa rzi kàyìrzɛ̀ hwatò ema hwa làa hwèèmà hwe arzɛ èhwanja Lohwɛ̀ a hwa emelì wɔ̀ hwa arzɛ.

⁴ O wa ò hwèlì ndi njɛnɛ, ò lì kàyìrzɛ̀ e mòkutu wà ama òhvɛhvɛ mòtò e? È rzàŋgò ya awu, yɔ ndi e tànɛyi lì òhwa ŋga hwa gbèyi gbamù, tɔ̀ hwa rza gbèyi gbamù. Ndi e ŋginyà ya ama e Rzaŋgò yɔ ndi e òŋgòwàna òŋgò mòkutu ò lì gbeyà gbamù.

⁵ Lòŋgò la hwatò hwa lùtèyà nanù ema ò hwèlì lòŋgò la hweyu ema hwe hwɛni wòlìtò lì aka hwenɛyi. Lòŋgò la hwatò hvɛ hwa lùtèyà ndi nanù ema hweyu hwe arzɛ hwe hwèlì ndi nyayi hvɔ̀kɔ. Inyɛ̀ tɔ̀ ima mòtò a wòwe nanù ema tɔ̀ mamɛ ema a lùtèlì e mò lɔ̀ɔnì.

⁶ Hwàŋga hwatò ema hwa lùtèyà nanù ema eyu yɔ̀kɔ e hwɛni wòlìtò lì aka hwehvɛhvɛ hweyu, hwa gbeyà ndi nanù ò lì ŋgbà e Rzàŋgò èluhwe. Hwàŋga ema hwa laa tɔ̀ mamɛ wɔ̀ hvɛ hwa gbeyà ndi nanù ò lì ŋgba e Rzàŋgò èluhwe èhwanja hwa ŋgba Lohwɛ̀ jeka lì hvòmɛ̀nɛ̀ mòŋgò mòlelì. Hwàŋga hwatò ema hwa kiya ò lì laa lòŋgò la hwema, hwa gbeyà ndi nanù ò lì ŋgba e Rzàŋgò èluhwe ndèŋgàna hwa ŋgba Lohwɛ̀ jeka.

⁷ I rza enje ndi ò lìni lòŋgɛ irzɔ hwitì, ndeŋgànɛ̀lɛ̀ i rza ŋwa ndi ò irzɔ hwiti mɛnɛ.

⁸ Irzɔ, i hwèlì tɛ ò lòŋgɛ, nanù òma i hwèlì ndi ò lòŋgɛ ò lì gbeyà mamɛ ema e Rzaŋgò ya arza. Ndèŋgànɛ̀lɛ̀ i ŋwelì tɛ, nanù ò ma i ŋwelì ndi ò lì lìŋgirzɛ e Rzàŋgò. O èŋgànɛ̀lɛ̀ rzɔ, tɔ̀ i hwɛ lòŋgɛ, tɔ̀ i ŋwa, i hwèlì ndi ò màà mà ama e Rzàŋgò.

⁹ Lìtìŋga ndèŋgàtɛ̀ Krirztò à mà ŋwa, rzi a hvùmùwà, rzi a hwɛ ò lòŋgɛ, aŋga nanù mɔ̀ à hwɛ e Rzàŋgò ya hwatò ema hwà mà ŋwɛɛ na hwatò ema hwa hwèlì lòŋgɛ.

¹⁰ Mamɛ ndèŋgàtɛ̀ ò kàyìrzɛ̀ wònyanyɔ̀ŋgɔ̀ e? Mamɛ ndèŋgàtɛ̀ ò niya wònyanyɔ̀ŋgɔ̀ e? Èhwanja irzɔ hwa arzɛ, i hwɛnì lì tɛ̀mɛ̀ ò wòrzò wò e kònda ya hwèkàyìrzèlèlì hwe ama Lohwɛ̀.

¹¹ È tìlahwì ò e kààtì ya Lohwà nanù ema, “Lohwɛ̀ a òhwi nanù ema, ò tɛ̀ɛ̀tɛ̀ɛ na òma imba na hwèlì lòŋgɛ, tɔ̀ ima mòtò a hwɛni lì nò rzumeya mawɔ̀ŋgɔ̀ŋgɔ ma eni ò rze, ndèŋgàna tɔ̀ ima mòtò a hwɛni lì nò eka nanù ema imba ndi na hwèlì Lohwɛ̀.”

¹² O èŋgànɛ̀lɛ̀ rzɔ, irzɔ hwa arzɛ i hwɛnì lì tɛ̀meya Lohwɛ̀ ò wòrzò, ò lì mò òhweyà mamɛ ya arzɛ ema irzɔ i ma gbeyɛ.

Mòtò a rzi gbeyà ŋmanyàŋgò wa eni a kpa

¹³ O èŋgànɛ̀lɛ̀ rzɔ, inyɛ tɔ̀ mɔ̀kɔ wa arzu a rza kàyìrzɛ̀ ɔ̀nɛyi. O ika ò ŋmèma mò aŋgɔ̀ nanù ema, ò rza gbeyà tɔ̀ eyà ema e gbeyà hwahvɛhvɛ hwatò hwa ayirzɛ mataŋgà mà awu tɔ̀ lì kpèeyà ò tenì ya wòhwe.

¹⁴ Nà òma na hwèlì mɔ̀kɔ na e Rzàŋgò Yerzù, hwe nò òkòlɛ̀ ò lì hwiya kɔ̀yi-kɔ̀yi nanù ema ò rza enje tɔ̀ mòlelì ema ò mɔ̀ ŋmìti mò rza rzaŋgɛ ò wòrzò wò ama Lohwɛ̀. Ndi ò hwèlì tɛ mòtò ema a lutelì nanù ema ò hwèlì mòlelì ema mò rza rzaŋgɛ ò wòrzò wò ama Lohwɛ̀, a rzi mò laa.

¹⁵ O tàtìrzɛ̀ tɛ ŋmanyàŋgò wa aŋgɔ̀ tɔ̀ e ndòmɛ ya aŋgɔ̀ ò mamɛ ema ò laa, nanù òma ò rza enje ò lì mò uŋmɛ̀lɛ̀ e ndìŋgɛ. O rzi gbeyà nanù ema mòlelì ema ò laa mò hvàŋge lòŋgɛ la e mòtò ema Krirztò a ŋwelɛlɛyi ò mbarza.

¹⁶ O rzi emeyà ema lìkànèyà ema ò òhvi nàa e mòtò ema lì lòkɛ̀ la eni lì imbami, lì gbèye mòtò a gbeye wòhwe, aŋga nanù hwatò hwa rza tanɛyi lì òhwa hweyà hwe wòhwe ò lì ò hvòmɛ̀nɛ̀.

¹⁷ Rzeketɛ lì laa la mòlelì na lì nyɔ la mimba ndi lì hwèlì wòlìtò ò lìkànèyà la ama Lohwɛ̀. Ndi hweyà ema hwe hwèlì wòlìtò hwe hwèlì ndi ò lì hwɛnɛ hwɛ̀ɛ̀mɛ̀ ema hwe enyòhwɛ̀nɛ̀ ò wòrzò wò ama Lohwɛ̀, ò lì hwɛ ò ɛ̀yɔ̀lɛ̀, nà ò mɔ̀nyɛ̀ŋgì ema Èlìŋgɛ̀ yà Wòtani e ŋgba.

¹⁸ O gbèelì tɛ Krirztò ò ene ŋgàna, ò emàyɛ̀lɛ̀hwɛ̀ òma Lohwɛ̀, ndèŋgànɛlɛ hwatò hvɛ hwa ò òhwa nanù ema ò ma gbeyà eyà ya gbamù.

¹⁹ O èŋgànɛ̀lɛ̀ inyɛ i hwɛ ndi ò lì atàkìrzɛ̀ ò lì keka lì gbeyà mamɛ ema e jànà ɛ̀yɔ̀lɛ̀ na ema hwe jò òŋgòwànà ò lì embɛ mɔ̀kɔ na ɔ̀nɛyi.

²⁰ Ène eyà ya mòlelì e rzi gbeyà ema ò hvàŋge èwòlò ema Lohwɛ̀ à mà gbeyɛ. Melelì me arzɛ me rzaŋgi ò wòrzò wa ama Lohwɛ̀. Ndi e hwèlì ndi lùurzè lì laa tɔ̀ ima mòlelì ema mò gbeyà ò hvɛhvɛ mòtò a unde ò wòhwe.

²¹ O lɔ̀wu nanù ema mòtò a rzi keka lì gbeyà eyà ema e tanɛyi lì gbeyà ŋmanyàŋgò wa eni ò lì ayirzɛ lìwawu. Nga e hwèlì ndi ò lì laa nyàmà, tɔ̀ lì nyɔ mimba tɔ̀ ò lì laa la ehvɛhvɛ yòma.

²² Tɔ̀ mamɛ ema e lòkɛ̀yì lì hvòmɛ̀nɛ̀ hwene hweyà e hwèlì ndi ò ìtììtènì ja anyu na Lohwɛ̀. Mònàmɛ̀ mò hwèlì na hwaŋga hwatò ema hwa rza òhvɛ irzɔ̀ni ò mèèmà me awu hwa gbèyi tɛ mamɛ ema hwa hwi nanù ema e hvòmɛ̀nɛ̀yi.

²³ Ndi tɔ̀ njɛnɛ ema a hwamɛyi nanù ema a rza àŋgàmɛ̀nɛ̀ lì laa lìtumba lɔ̀kɔ la mòlelì ndi à timba a mò laa, Lohwɛ̀ a òhwa nanù ema a gbèyi wòhwe èhwanja a rza gbeyànì lì lòkɛ̀ la eni ò lì gbeyà mamɛ ema a àŋgàmɛ̀nɛ̀yi lì gbeyà. Mòtò a gbèyi tɛ eyà ema a hwamɛyi nanù ema e hvòmɛ̀nɛ̀yi tɔ̀ e rza hvòmɛ̀nɛ̀ nanù ò ma à mà gbeyà wòhwe.