Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Yòwanìrzɛ̀ 1 - Mokpwe: Bakwery (New Testament)


Ìikɔ̀mi

1 Imba e mòtìmbèlì wà ŋmèmba ndi na tìli ene kààtì. Nà o tìleya ndi o wa e molànà ema Lohwɛ̀ a hvɔ̀rzì hwàanà hwa aŋgɔ. Nà o lìŋgàni na e jɔ̀kɛ̀, ndèŋganɛlɛ rzeketɛ imba mbiti mɛnɛ ndi na o lìŋgàni, ndèŋgànɛ̀lɛ̀ hwahvɛhvɛ hwatò hvɛ ema hwa hwi e jɔ̀kɛ̀ wɔ hvɛ hwa o lìŋgàni.

2 Nà e lìŋgàni ehwànja e jɔ̀kɛ̀ ema i hwi je e hwiya natɛ̀ɛ na o mòlìkɛ̀.

3 Inyɛ̀ Lohwɛ̀ è Tatɛ̀ nà Yerzù Krirztò ema à hwèlì è Ŋmanà wà ama Tatɛ̀, hwa jò ŋgbe è ndèli, hwa jò uŋmɛ̀lɛ̀ ììlì hwa jò kòmeyà ɛ̀yɔ̀lɛ̀, inyɛ hwa jò ŋgbe hwene hweyà nà oma ì lìya ò lì gbeyà hweyà hwe jɔ̀kɛ̀ nà lì lìŋgàna mɔ̀kɔ nà ɔ̀nɛyi.


Ja alìŋgànɛ̀yi mɔ̀kɔ na ɔ̀nɛyi ndèŋgànɛ̀lɛ̀ i lìŋgàne e jɔ̀kɛ̀

4 Nà ma oka mɔ̀nyɛ̀ŋgì rzayi, o lì hwiya nanù ema lòŋgo la aŋgɔ la hwàna hwa lìya lòŋgɛ ema lì kànɛyi na e jɔ̀kɛ̀, na oma Lohwɛ̀ Tatɛ̀ wa arzu à mà jo kànèyà nanù ema i gbeye.

5 O èŋgànɛ̀lɛ̀ rzɔ ìi nyàŋgo, na rza o tìleya ndi mbenda hvènya ndi e yɔ ema e ma hwɛ natɛ̀ɛ na o hwewòtelì, na o rzòrzòmeya nanù ema ja alìŋgànɛ mɔ̀kɔ na ɔ̀nɛyi.

6 Nànù ndi e ndìŋgɛ ya jɔ̀kɛ̀ e hwèlì, e hwèlì ndi nanù ema irzɔ i hwɛnì lì oŋgama imbenda ja ama Lohwɛ̀. Èŋge mbenda na oma inyɔ hwa arzɛ e ma hweye nàtɛ̀ɛ na o hwewòtelì, e hwèlì ndi nanù ema e àŋgàmɛ̀nɛ̀yi lì alìŋgànɛ mɔ̀kɔ na ɔ̀nɛti.

7 Hwàlùkèlì rzayì-rzayì hwa mà kpèeyà ò rze, hwatò ema hwa rza emeyà nanù ema Yerzù Krirztò à mà ŋyàahwa ò rze nàa mòtò wà hwènàmà. Tɔ̀ ima mòtò wà nanù à hwèlì ndi molùkelì ndèŋgàna è mɔ̀kɔ̀yèlì wà ama Krirztò.

8 È hwɛ rzɔ ndi ò lì aŋgòwa, è rzi jà lì hwɛ ema è wɔ̀lɛ̀nɛ̀ mamɛ yà arzɛ ema è mà tàkeyà. Ndi è hwɛnì lì lùwa etàŋgì yà anyu yà arzɛ.

9 Tɔ̀ ima mòtò ema à rza oŋgàmɛ̀ hwèokòlelì hwe ama Krirztò, rzìi à oŋgama ndi hwehvɛhvɛ hwèokòlelì nanù oma à rza enje nà Lohwɛ̀. Ndi tɔ̀ ima mòtò ema à oŋgama hwèokòlelì hwe ama Krirztò nanù oma à hwèlì nà è Tatɛ̀ nà è Ŋmanà wà eni.

10 Ò èŋgànɛ̀lɛ̀ rzɔ, tɔ̀ ima mòtò à è jɛ̀lɛ̀lɛ̀yi tɛ rzìi à è jàneyà hwèokòlelì ema hwe rza uwɛ̀lɛ̀lɛ̀yi ò mà Krirztò, è rzìi mò kpɛ̀lɛ̀ ò ndawò yà anyu tɔ̀ nà lì mò kàrzɛ nàa mɔ̀kɔ wà ŋmèmba.

11 Imba nà ohwa ndi nanù ehwànja, è mò kàrzɛ tɛ, è tìmba ndi mɔ̀kɔ wa eni o hweyà hwe wòhwe ema à gbeyà.


Yòwanìrzɛ̀ à ohwi jòòhwì jà lìrzùkù

12 Ò hwèlì hweyà rzayì-rzayì ema nà mà hwɛnɛ lì è ohweyà, ndi nà rza arze lì hwe tìla ò tenì yà ene kààti. Ndi nà àhvitɛ̀ nanù ema nà ò èhvɛhvɛ, aŋga nanù jò ò à ɛ̀nɛ̀nɛ̀ ò worzo nà worzo, aŋga nanù mɔ̀nyɛ̀ŋgì mò arzu mò ònda.

13 Hwàànà hwa è ndòmɛ̀ yà aŋgɔ ema è hvɔ̀rzɔ̀wì nà Lohwɛ̀, wɔ̀ hwa ò kɔ̀mi.

© 2022, CABTAL

ကြှနျုပျတို့နောကျလိုကျပါ:



ကြော်ငြာတွေ