1 Pètrò 5 - Mokpwe: Bakwery (New Testament)

Petolo a kòkòwɛ̀lɛ̀ hwatò ema hwa timbe ò ŋmèmba

¹ Imba nàa mòtìmbèlì mɔ̀kɔ wa anyu, na lìŋgàna lì ŋgba màyòwà o hwatò ema hwa e kànèyà. Nà hwèlì ndi mɔ̀kɔ ema nà mà ukeya o motàkà mo ama Krirztò. Èluhwe ema Lohwɛ̀ à mà uŋmɛ̀lɛ̀ Krirztò e no ukeya imba hvɛ. Nà e kòkòwɛ̀lɛ̀ nanù ema,

² e hwɛ ndi nàa hwà-ɔ̀ŋgelì hwa mɛ̀lɛ̀ŋgù o hwatò hwa ama Lohwɛ̀ ema hwa hwèlì o rze ya anyu. È hwa ɔŋgeya, rzeketɛ ema ehwànja e hwɛni lì hwa ɔŋgeya, ndi ehwànja e hwɛni nyɔ̀ŋgi o lì gbeyà nanù na oma Lohwɛ̀ a arza nanù ema e hwɛ. È gbeye èwòlò ya anyu e rzi hwɛ lì oŋgama mɔ̀rzɛ̀ŋgì ndi ehwànja e hwɛni mèèmà me lì e gbeyà.

³ È rzi gbeyàna ŋginyà o lì kànèyà hwaŋga hwatò ema hwa hwèlì o rze ya anyu, ndi e hwɛ embànelì o hwatò ema hwa hwèlì o rze ya anyu.

⁴ Aŋga nanù, e kìŋgɛ ya Hwà-ɔ̀ŋgèlì hwa mɛ̀lɛ̀ŋgù e jelì tɛ mɔ̀ à e ŋgba mòrzawèlì ema mo tuti. Moŋgo mòrzawèlì mo ò hwɛ natɛ̀ɛ na o mòlìkɛ̀.

⁵ Ŋgànà hvɔ̀kɔ hvɛ mɛnɛ, inyɔ hwatò ema e rzi rzɔ̀ mòkèka, e arzihwirzɛ o hwàmbaki hwa anyu. Inyɔ hwa arzɛ e arzìhwìrzɛ̀lɛ̀lɛ̀ mɔ̀kɔ na ɔ̀nɛyi, ehwànja e tìlahwì o e kààtì ya Lohwà nanù ema, “Lohwɛ̀ a teŋgɛ̀nɛ̀ hwatò ema hwa ohvi kumba ndi à uŋmɛ̀lɛ̀ ŋmèma mo gbamù o hwaŋga hwatò ema hwa arzihwirzɛ.”

⁶ Ya arzihwirzɛ inyɔ hwiti o rze ya e ŋginyà ya ama Lohwɛ̀, aŋga nanù mɔ̀ à e kàrzɛ o e hvonda ya eni ya gbamù ema e mo lɔ̀ɔ̀nì.

⁷ È mo hwɛmeya mètàkà me anyu me arzɛ o màà mà eni, ehwànja Lohwɛ̀ à mà wowa mètàkà me anyu nàa e ma eni.

⁸ Ya aŋgowe, e wowe hvonda. Mòkarzɛ̀ e mɔ̀kɔ̀yèlì wa anyu a hwèlì a ahwa ndi nàa njila ema e rzìŋga o lì arza njɛnɛ ema a tàawa.

⁹ È rzi emeyà nanù ema a e nìnè. Inyɛ̀ lì lòkɛ̀ la anyu lì imbame, ehwànja inyɔ e hwi nanù ema wònyànyàŋgo hwa anyu na indomɛ ja anyu hwa ama Krirztò o e rze ya arzɛ, wɔ hvɛ hwa hwèlì hwa takà na oma inyɔ hvɛ e hwèlì e takà.

¹⁰ È takà ndi meŋge mètàkà me rza inda. O mburza nanù, Lohwɛ̀ ema a ŋgba e ndèli ya arzɛ, mɔ̀ ŋmìti a e ŋgba tɔ̀ mamɛ ema e wɔ̀lɛnɛ. A gbeye ema a e ètìrzɛ̀ na lì e tɛmirzɛ gbamù. A hwèlì ndi Lohwɛ̀ ema e ndèli ya eni e lòŋgamɛnɛ tɔ̀ ima mòtò ndèŋgànɛ̀lɛ̀ eŋge ndèli e hwèlì o ihvonda ja arzɛ. Mɔ̀ ndi à e hvɔ̀rzì o lì luwa èluhwe ya eni ema e rza kuwa. Ndeŋgànɛ̀lɛ̀ ye e luwa ehwànja e hwèlì na Krirztò.

¹¹ Iŋginyà ja arzɛ ì hwèlì ndi è jà eni natɛ̀ɛ nà ò gbìndèyà. Inyɛ̀ wò lìya nanù.

Ìikɔ̀mi jà lìrzùkù

¹² Rzàyilarzi ndi à nò oŋgòhwàànì ò lì è tìleya òno ŋmanà kààtì. À hwèlì ndi nàa ŋmànyàŋgo wà ami ndèŋgànɛ̀lɛ̀ nà mò lòkɛ̀yi. Nà è tìlèlì ene kààti ò lì è embɛ, nà ò lì è òhweyà nanù ema hwene hweyà ema nà è tìlèlì hwe hwèlì ndi è ndèli yà jɔ̀kɛ̀ yà ama Lohwɛ̀. Yè è tɛ̀meyà gbamù.

¹³ Ŋmèmba mò mììtèlì ema mò hwèlì ò èkòmè ya Babìlɔ̀nì, ema Lohwɛ̀ à hvɔ̀rzì ema mè hwɛ è mà eni nà oma inyɔ hvɛ è hwèlì, mè omèlì ììkɔ̀mì, nanù mɛnɛ hvɛ nà Màkòrzì ema à gbèyi ndi nàa è ŋmanà wà ami ema nà wombi ò lìlòkɛ̀.

¹⁴ Tɔ̀ ima mɔ̀kɔ wa anyu arzàŋgànɛ̀lɛ̀ ɔ̀nɛyi o lì uŋmɛ̀lɛ̀ e ndìŋgɛ. Inyɛ̀ ɛ̀yɔ̀lɛ̀ e hwɛ na inyɔ hwatò hwa arzɛ hwa ama Krirztò.