1 Pètrò 4 - Mokpwe: Bakwery (New Testament)

Mòŋgɛ emà ma mà tikowahwɛ

¹ Kànatɛ Krirztò à mà take o hwehwɛ̀ɛlì hwe eni nàa mòtò wà hwènàmà o e nyàmà nyo, inyɔ hvɛ e àŋgàmɛ̀nɛ̀yi lì woŋgirzɛnɛ o lì luwa eŋge ŋgànà ya màlùtèyà mɛnɛ na à mà hwɛnɛ. Èhwànja tɔ̀ njɛnɛ ema a tàki o e nyàmà ya nyo ehwànja a hwèlì ndi e wa ama Yerzù, mɔ̀ à rza hwɛni hvɛ tɔ̀ eyà o lì gbeyàna wòhwe.

² O ene ŋgànà rzɔ, lì wòteyà naŋgɛ lòŋgɛ la anyu la ene rze lì hwɛni ndi lì hwɛ na oma Lohwɛ̀ àrzeyà rzeketɛ ema hweyà hwe rze hwe a e kànèyà.

³ Inyɔ e ma hvaŋga hvonda rzayi-rzayi o hvonda ema e ma aka, o lì gbeyà mamɛ ema hwatò ema hwa rza lòkɛ̀ Lohwɛ̀ hwa hvɔ̀rzì o lì gbeyà. Èŋge hvonda e ma aka. È mà lìya mòŋgɛ ma anyu o mòrzònje, e ma hwɛnɛ nyɔ̀ŋgi o mèèmà o lì gbeyà hweyà hwe wòhwe, e ma hwɛ lì nyɔ mììmbà o lì woma, e ma hwɛ lì aŋga indèma ema hwatò hwà mà hwɛ lì nyɔ mììmbà na lì woma rzìi hwa a gbeyà hweyà hwe wòhwe, ndèŋgànɛ̀lɛ̀ e ma hwɛ hvɛ lì kànɛlɛ̀lɛ̀ mahvɛhvɛ màlohwà.

⁴ Imbunda ema e ma hwɛ lì gbèyɛ̀nɛ hwene hweyà hwe wòhwe o hvonda ema e ma aka, hwa tàmi naŋgɛ o lì ɛnɛ nanù ema inyɔ e rza enje na wɔ̀ hvɛ o lì gbeyà hwene hweyà hwe ndɔ̀ki na mɔ̀lɔ̀kɔ̀rzɔ̀. Hweŋge hweyà ndi hwe gbèyi hwa e hwɛ̀nyɛ̀.

⁵ Ndi wɔ̀ hwa o tɛ̀mɛ̀ o hwèkayirzelì o worzo wo ama Lohwɛ̀ ema mɔ̀ à ambɛlɛlɛ o lì kàyìrzɛ̀ tɔ̀ ima mòtò. Mɔ̀ a kàyìrzɛ hwaŋga ema hwa hwèlì lòŋgɛ na e wɔ̀ ema hwà mà ŋwɛɛ.

⁶ O lìni lìtiŋga ɔndèŋgàtɛ̀ Ŋmɛ̀ndì mò Gbamù mo ma ohwahwɛlɛ hvɛ o tɔ̀ hwaŋga ema hwà mà ŋwɛɛ. Aŋga nanù tɔ̀ nɛ hwà mà hwa kàyìrzɛ̀ ema hwà mà hwɛ o lòŋgɛ anu rze, wɔ̀ hwa o ŋwa na oma tɔ̀ ima mòtò a ŋwaa, ndèŋgànà wɔ̀ hwa o hwɛ lòŋgɛ na oma Lohwɛ̀ a hwèlì lòŋgɛ.

È gbeyàne jàhwèyà ema Lohwɛ̀ a e ŋgbelì gbamù

⁷ Lirzuku la hweyà hwe arzɛ lì ma kombɛnɛ. È hwɛni lì àwòhvɛ̀lɛ̀, na lì aŋgowa, aŋga nanù e tànɛ lì kànɛ.

⁸ O lì aka hweyà hwe arzɛ, ya alìŋgànɛ mɔ̀kɔ na ɔ̀nɛyi kɔ̀yi-kɔ̀yi, ehwànja e ndìŋgɛ e hwànda wòhwe rzayi-rzayi.

⁹ È akàrzɛ̀nɛ̀yi mɔ̀kɔ na ɔ̀nɛyi e rzìi hwɛ lì àyèŋgòwɛ̀.

¹⁰ È hwɛ hwàgbèèlì hwa gbamù ndèŋgànɛ̀lɛ̀ e gbeyàne màahweyà ma anyu o lì oŋgowàna mɔ̀kɔ na ɔ̀nɛyi.

¹¹ Tɔ̀ ima mòtò ema à hwi lì ohwa gbamù inyɛ à ohwe ndi nàa à ohwa ndi è mbɔrzi ema è uwɛ̀lɛ̀lɛ̀yì ò mà Lohwɛ̀ mɔ̀ ŋmìti. Tɔ̀ njɛnɛ ema à oŋgowàna hwatò, inyɛ à gbeyàne ndi è ŋginyà ema Lohwɛ̀ à mò ŋgbelì. Jèka jò ò ŋgbààhwà Lohwɛ̀ lì hvomɛ̀nɛ̀ hweyà hwe arzɛ lì akeyà nà Yerzù Krirztò. Èluhwe yà arzɛ nà è ŋginyà yà arzɛ è hwɛ nà mɔ̀ ò gbìndèyà nà ò gbìndèyà. Inyɛ̀ wò lìya nanù!

Metaka ema hwànɔ̀ŋgèlì hwa ama Krirztò hwa luwa

¹² Ìi wònyamòwè kòkò, e rzi keka lì tàmà na lìkèkìrzɛ̀ lì ndɛnɛ ema lì e ùŋmànɛ̀lɛ̀ naŋgɛ. Ène eyà e rzi hwɛ eyà hvènya na inyɔ.

¹³ Ndi e hwɛni lì oka mɔ̀nyɛ̀ŋgì, nanù ema e tàka ndi nyayi hvɔ̀kɔ na oma Krirztò mɔ̀ hvɛ à mà tàke, aŋga nanù inyɔ e onda na màlìŋgo e hvonda ema Lohwɛ̀ a o wuluhwɛ èluhwe ya ama Krirztò.

¹⁴ È hwèlì tɛ nanù ema hwatò hwa e hwɛ̀nyɛ̀, ehwànja e hwèlì ndi hwatò ema e oŋgama Krirztò, nanù oma e lɔ̀yìrzɛ̀yi, ehwànja ŋmàye mo Èlìŋgɛ̀ ya ama Lohwɛ̀ mo hwèlì na inyɔ.

¹⁵ È hwèlì tɛ nanù ema e taka, e rza hwɛ ndi nanù ema ehwànja inyɔ e oŋwa hwatò, tɔ̀ ehwànja e ma ìhwa, tɔ̀ ehwànja e hwèlì ndi hwatò hwa wòhwe, tɔ̀ ehwànja e hwèlì ŋmalì o hweyà hwe hwatò.

¹⁶ Ndi e tàki tɛ ehwànja e hwèlì ndi hwànɔ̀ŋgèlì hwa ama Krirztò, e rzi keka lì oka tɔ̀ irzɔ̀ni. Ndi e eke Lohwɛ̀ nanù ema inyɔ e hwɛ̀lɛ̀hwɛ̀ ndi hwatò hwa ama Krirztò.

¹⁷ È hvonda e ma uka ema hwèkàyìrzèlèlì hwe hwɛni lì wòteyà ema Lohwɛ̀ a hwɛni lì wòteyà lì kàyìrzɛ̀ hwatò. Mɔ̀ a o wòteyà ndi o lì kàyìrzɛ̀ hwatò hwa eni. È hwèlì tɛ nanù ema Lohwɛ̀ a tanɛ tɛ lì jo wotàneya irzɔ ema i hwèlì hwatò hwa ama Krirztò, mamɛ e o hwɛ e mbàko ya hwaŋga hwatò ema hwa rza lòkɛ̀ɛ Ŋmɛ̀ndì mò Gbamù ema mo uwɛ̀lɛ̀lɛ̀yì o ma Lohwɛ̀ e?

¹⁸ Nà oma e tìlahwì o kààtì ya Lohwà nanù ema, “È hwèlì tɛ nanù ema e ambi ema hwatò ema hwa tɛmi ehve-ehve hwa rzùŋgàhwè, nɛ rzɔ yo ò hwɛ̀ɛ na hwaŋga hwatò ema hwa gbeyà wòhwe na hwaŋga ema hwa rza lòkɛ̀ Lohwɛ̀ e?”

¹⁹ O eŋgànɛ̀lɛ̀ rzɔ, hwaŋga ema hwa taka ehwànja e hwèlì ndi lì emeyà la ama Lohwɛ̀ nanù ema wɔ̀ hwa tàke, hwa ɛndɛ ndi o worzo ò lì gbeyà hweyà hwe gbamù, inyɛ hwa aŋgbɛ wɔ̀ hwiti o màà ma ama Lohwɛ̀ e mòwèkèlì hwa awu, mɔ̀ ema a gbèeyà tɔ̀ ima eyà ema a ohwi nanù ema a gbeyà.