1 Korintionan 4 - Papiamentu Bible 2013

Tarea di apòstel

¹ Konsiderá nos komo sirbidó di Kristu ku a keda enkargá pa instruí e plannan skondí di Dios.

² Loke ta eksigí di un sirbidó asina ta fieldat.

³ Di mi parti, no ta importá mi mashá si boso òf kualke korte hudisial humano husga mi. De echo, ami mes no ta husga mi mes!

⁴ Mi konsenshi ta limpi, pero esei no ta hasi mi inosente; ta Señor ta Esun ku ta husga mi.

⁵ P'esei no husga niun hende, promé ku e tempu indiká. Warda te ora Señor bini. E lo saka na kla loke ta skondí den skuridat i lo mustra e intenshonnan ku hende tin den su kurason. Kada ken lo haña e elogio ku e meresé, serka Dios.

⁶ Rumannan, den tur loke mi a bisa, mi a usa Apolo i mi mes komo ehèmpel, ya boso ta siña kiko e dicho: ‘No pasa límite di loke tin skibí’, ta nifiká. E ora ei niun hende lo no rebahá esun persona dor di kana buya ku un otro persona.

⁷ Ken a bisa ku boso ta superior? No ta Dios a duna boso tur loke boso tin? Di kon boso ta broma anto, komo si fuera no ta haña boso a haña tur loke boso tin?

⁸ Ya kaba boso tin tur kos ku boso mester, no? Boso ta riku kaba, no? Boso a bira rei, no? Nos sí no a yega dje leu ei ainda! Mara boso tabata ei, ya nos tambe ta tuma parti na boso reino.

⁹ Pasobra ta parse mi ku Dios a duna nos, ku ta apòstel, e último lugá: nos ta manera hende sentensiá na morto públiko. Nos a bira un espektákulo pa mundu henter, tantu pa hende komo pa angel.

¹⁰ Pa Kristu su kousa nos a bira loko, ma boso sí ta asina sabí den Kristu! Nos ta suak, esta fuerte boso sí ta! Boso ta kana risibí honor; nos nan ta despresiá!

¹¹ Te ku awor nos ta sufri di hamber i set, nos ta bisti paña lapilapi, kome wanta serka hende, kana dualu di un lugá pa otro

¹² i nos ta sofoká nos kurpa ku trabou pisá. Ora insultá nos, nos ta bendishoná. Ora persiguí nos, nos ta soportá.

¹³ Ora papia malu di nos, nos ta rospondé ku amabilidat. Te ainda ta trata nos manera e sushi di henter mundu, komo e kos di tira afó di henter humanidat!

¹⁴ Mi no ta skibi esaki pa pone boso kara na bèrgwensa, pero pa instruí boso manera mi yunan stimá.

¹⁵ Ounke boso por tin míles di instruktor den boso bida kristian, ta un tata so boso tin. T'ami ta boso tata den Kristu-Hesus, pasobra t'ami a proklamá e bon notisia na boso.

¹⁶ P'esei mes mi ta kurashá boso pa sigui mi ehèmpel!

¹⁷ Pa e motibu ei mi a manda Timoteo serka boso. E ta mi yu stimá i fiel den Señor; lo e rekordá boso riba e prinsipionan ku mi ta sigui den mi bida ku Kristu i ku mi ta siña hende den tur iglesia unda ku mi bai.

¹⁸ Algun di boso a bira mashá orguyoso, pasobra nan a kere ku mi no ta bin bishitá boso mas.

¹⁹ Ma si Señor pèrmití, mi ta bini pronto. E ora ei lo mi haña sa kiko e hendenan orguyoso akí por hasi, apart di papia!

²⁰ Pasobra reino di Dios no ta kuestion di palabra, ma di poder.

²¹ Kiko boso ta preferá? Pa mi bini ku pida palu pa bati boso òf ku un kurason yen di amor i dulsura?