Yoshua 14 - KITAABA WAAQA

¹ Tunini d'aala lafa ta qaallicha Eleazari jed'anifi Yoshua ilma Nunitifi jaaroleeni worra Israeliti mataa, lafa Kanaani keesati worra Israeliti qoode.

² Akuma AABBO Waaqi Musani jed'e, lafa gosa sagalitifi gosa Manase ta haga gari ta Yordanini ila adu hit'aani argatani.

³ Musani qara d'aala gosa lamaani taanifi gosa Manase ta gari ta Yordani gama jirtu, kenne; ammo gosa Lawiti d'aala tokole inkennineefi.

⁴ Worri Yusufu gosa lama, Manaseefi Efraimu. Musani gosa Lawiti lafa tokole d'aala inkennineefi ammo dirafi lafa horiini worraa, loonifi reeni ooltu, kenneefi.

⁵ Worri Israeli, akuma AABBO Waaqi Musani jed'e, lafa qoodate.

Aka dira Hebroni Kalebu kennani

⁶ Guyya toko jari toko, ka gosa Yuda, Gilgaliti Yoshuati d'ufe. Worri sunini nami toko, ka Kalebu ilma Yefune jed'ani, ka gosa Kenizi waan isaani jed'e, Atini waan AABBO Waaqi Kadesh-Barneati, namicha Waaqa ka Musa jed'ani kaani waan kiyyafi kanke jed'eeni imbeeta.

⁷ Gaafa hojattuuni AABBO Waaqa Musani Kadesh-Barnea keesa dooya lafa tanati na erge, ganni kiyya afurtama. Anini dubbi d'uga isatini deebie.

⁸ Worri gaafasi na woliini yae worra kenna sodaachise, ammo anini garaa tokooni AABBO Waaqa kiyyaa saalfad'e.

⁹ Waan anini akasi tolcheefi, Musani naa kakhate aka anaafi ilmaani tiyya lafa anini gubba deeme ch'ufa d'aala argannu.

¹⁰ Ammo amma laali, haga AABBO Waaqi dubbi tana Musani jed'e asi ganna afurtami shaniiti. Gaafasi gaafa gochiti Israeli lafa aloo keesa godaantu, ammalle AABBO Waaqi akuma kakhate ya haga gaafasiiti lubbu na bulche. Amma laali ganni kiyya saddeetami shani,

¹¹ anini arrale akuma gaafa Musani na erge kaani jaba. Anini ammalle lolaafi waan ch'ufaleeti, akuma duri kaani jaba.

¹² Duuba amma lafa gaareeni ta gaafa anaafi jari wahela kiyya waan isii Musati himne, ta AABBO Waaqi naa kakhate naa kenni. Nu gaafasi ya siti himne, aka worri gugurdaani d'ed'eerani, gosa Anaki, dira gugurda naaboni jaarate keesa tau. Hegeri AABBO Waaqi na woliini jiraate akuma inni jed'e kaani, anini worra arti keesaa baasa.

¹³ Jennaani Yoshuani Kalebu ilma Yefune eebise, dira Hebroni d'aala kenneefi.

¹⁴ Diri Hebroni haga arrale ka d'aloota Kalebu ilma Yefune ka gosa Keniziti, waan inni garaa tokooni AABBO Waaqa Israeliti saalfateefi.

¹⁵ Tana durati dira Hebroni sunini Arba jed'ani. (Arbaani kunini namicha gudda toko ka gosa Anaki.) Duuba eegi suni lafti sunini nagaya argatte.