Qaabacha Seera 3 - KITAABA WAAQA

¹ Duuba eege nu gaara lafa Bashani mirgaa godaanne jennaani, hayyu Oguni nama isaa ka lola fud'ate, fulla dira Edrei nu had'u d'ufe.

² Ammo AABBO Waaqi waan naani jed'e, Isa insodaatini anini isaafi nama isaa ka lolaatifi lafa isaa ch'ufa sii kenna. Akuma Sioni, hayyu Amori, ka lafa Heshboni mohate kaani tolchite, isaale tolchi.

³ Akanaani AABBO Waaqi hayyu Ogufi worra isaale ch'ufa harka keennati kenne nu worra hobaamne.

⁴ Ammalle nu yomsuni dira ch'ufa qamne, diri tokoleeni ka nu infud'atini injiru. Nu ch'ufa woltuma dira jaatama qamne — lafa Argobu, ta hayyu Oguni, ka Bashani, mohate.

⁵ Dira kana ch'ufa aka jaba olfageesani d'akhaani jaarani, balbala fullotifi waan isiini ch'ufanile, ammalle olla hedduti jira, ka ijaara jaba akasi suni inqamne.

⁶ Nu dira ch'ufa balleesine, d'iira, nad'eeni ijoolle ch'ufa akuma worra dira hayyu Sioni jed'ani ka Heshboni kaani, hobaamne.

⁷ Looni ch'ufa fud'anne, ammo dira sigisine daaraa tolchine biraa yaane.

⁸ Hojuma suni nu hayyoota Amori lamaani ira lafa galaana Yordanitini ilaboru ta galaana Arnoni haga gaara Hermoni ch'ufa fud'anne.

⁹ (Worri Sidoni gaara Hermonitiini Sirioni jed'a ammo worri Amori Seniri jed'a.)

¹⁰ Nu lafa hayyu Ogu ka Bashani ch'ufa fud'anne: dira gooro guba jiru lafa Gileaditifi ta Bashaniti, haga ilaboru dira Salekafi Edrei.

¹¹ (Gosa Refai keesa nami hafe hayyu Ogu. Sire isaa ta sibiilani mid'aasani, d'eerinni d'und'uma sagali, balinni d'und'uma afuri aka biima gaafasi gula. Sire suni haga arrale lafa gosa Amoni dira Raba keesaati dandaani argani.)

Gosa Yordanini ilaboru teetu

¹² Gaafa nu lafa suni fud'anne, anini lafa mirga dira Aroeri, ta d'aatu galaana Arnoni, ammalle lafa gaareeni ta Gileadi haga dira isii ch'ufa woliini, gosa Reubenitifi ta gaditi kenne.

¹³ Gosa Manase ta haga gariti lafa Gileadi ta hafte taanifi lafa Bashani ch'ufa, ta hayyu Oguni fide kenneefi. Akasi jechaani arda Argobu ch'ufa kenneefi jechu. (Lafa Bashanitini Refai jed'ani.

¹⁴ Yairini, ka gosa Manase, lafa Argobu, ta maqaani d'ibiini Bashani, haga seera Gershonitifi haga Maaka fud'ate. Inni ollowaani ch'ufa maqa ufi iti baase, haga arrale ollowaani suni ollowaani Yairi jed'ani.)

¹⁵ Anini balbala Makiri ta gosa Manase lafa Gileadi kenneefi.

¹⁶ Ammalle gosa Reubenitifi ta Gadi lafa Gileadi, haga bale Anoni, ta baleeni aka seera jiddu baatu, haga galaana Yaboki, ka seera Amoni, kenneefi.

¹⁷ Lafti worraa gama ila adutiini galaana Yordaniti ejite, galaana Galilaya ka mirga jiru iraa baate, galaana sooda ka bita gabuute, gaara Pisga ka ilaboru jalati ejite.

¹⁸ Anini hojja suni waan isaniini jed'e, AABBO Waaqi, waaqi keesani, ya lafa tana isanii kenne, aka isani d'aaltani: Worri keesani ka lola ha miha lolaa fud'ate, oboleyaani teesani ta Israeli dura yauti.

¹⁹ Ammo nad'eeni, ijoolle teesani, ammalle looni keesani (anini aka isaani looni heddu qabdani imbeekha) ha dira anini isanii kenne kaani keesati hafaniti,

²⁰ haga AABBO Waaqi oboleyaani teesani teeso, aka isanii kenne kennuufiti, worrileeni lafa suni, ta Yordanini gama, ta AABBO Waaqi kennuufi suni fud'atuti. Duuba isani nami ch'ufti, d'aala anini isaanii kenne taaniti deebitani.

²¹ Wonti anini gaafasi Yoshuani jed'e tana: Atini yayu waan, AABBO Waaqi kanke hayyoota tana lamaani tolche agarte; duuba akuma kana AABBO Waaqi lafa isani haatani fud'attani ch'ufa tolcha.

²² Worra ind'eetina, wonti akanatiifi AABBO Waaqi keesani isanii kalcha.

Aka Musa lafa Kanaani seenuu d'owani

²³ Anini gaafasi guddise Waaqa kad'ad'e waan jed'e,

²⁴ AABBO Waaqa, gudda, anini imbeekha aka wonti atini na garsiiftu kunini iti keeyacha waan gugurdo nama mamsiisa, ka atini takaa tana tolchitu. Waaqi tokoleeni, ka waan guddo mama aka atini tolchite kana tolchu, gubbaafi lafale injiru!

²⁵ AABBO Waaqa, galaana Yordani na taakisiisi, aka anini lafa gaareeni ta wo baaftu, ta gama suni jirtu taanifi gaareeni Lebanonile, argu.

²⁶ Ammo maro teesanifi AABBO Waaqi nati dallanne, nale ch'aqasu dide, waan naani jed'e, Laki ya geete, waan suni deebite maqa ind'aini!

²⁷ Beeni, fit'e gaara Pisga d'aqi, mirga, bita, ilaborutifi ila adule laali. Waan atinu gartu ch'ufa aka dansaa laali, wonti akanatiifi ato wonti feetu d'uftele atini galaana Yordani intaakitu.

²⁸ Yoshua, dubbi inni gula deemu male taani iti himi, garaafi herega isaa jabeesi; wonti akanatiifi inni lafa atini agarte taani biyya geese iti qubachiisa.

²⁹ Duuba nu bale dira Beth-Peori gamaa keesati hamne.