Qaabacha Seera 25 - KITAABA WAAQA

¹ Hojja nami lama jaaroleti woli himate jaaroleeni dubbi qorte, toko d'ugaa murte, kaani wollaala iti murte,

² duuba namicha wollaala iti murani, yo inni ule male, jaarsi dubbi mure kaani ufi durati gadi ch'ibsise garaa lafati gombise nama d'iibiini, D'aana jed'a. Haguma wollaala isaa gula isa d'aanu malani.

³ Dandaani maro afurtama d'aanani, ammo hagasi iraa indabarsina; yo hagasi ira d'aantani, nama keesani ya nama ch'ufa durati ch'eersitani.

⁴ Qotiyo hojja mid'aaniini d'aantani afaani inhid'ina.

Aka oboleesi oboleesa d'aalu

⁵ Yo oboleyaani lama, ta woliini teetu, toko ilma male due, niiti isaa nami ala d'ibiini infuud'iini; ha oboleesumani isaa sunini fuud'e niiti tolfate ilmaani iraa d'aluti.

⁶ Ilmi qara isiini d'altu ka d'iirsa isii ka due taha, aka gosa Israeli keesa maqa isaa badu d'owani.

⁷ Ammo yo oboleesi nama due sunini niiti suni fuud'u infeene, isiini ha gaara jaarole d'at'e, oboleesi d'iirsa kiyya ya na fuud'e maqa d'iirsa kiyya gosa Israeli keesa badu d'owu didde jette himattu.

⁸ Duuba jaaroleeni dira suni ha isa yaamte gaafatu. Yo inni jaarolele irati anini isi infuud'u jed'e dide,

⁹ niitiini oboleesi isaa ira due sunini ha jaarole dura d'ufte, kobe isaa toko faana baafte, hanch'ufa fuulati tufte waan jettuuni, Wonti namicha niiti oboleesa isaa d'aalu dide tolchani tana.

¹⁰ Duuba gosa Israeli keesa, worra isaa worra namicha kobe ira baasani kaani jed'ani yaamani.

Seera d'ibi

¹¹ Yo ato nami lama ka d'iira woldidu, niitiini toko d'iirsa kalchaa d'ufte namicha kaani nafa saala qabde,

¹² inahiinaafi harka iraa kuta.

¹³ Subba keesani keesa, d'akha haga haga ka toko ulfa toko sabla, ka woini biimani, innaqina.

¹⁴ Mana keesani keesale d'akha woini biimani, ka haga haga, ka toko gudda, ka kaani diqa, inqabaatiina.

¹⁵ Waan biimitani ch'ufa d'uga gula biima aka lafa AABBO Waaqi keesani isanii kennu keesati guyyaani keesani d'eeratu.

¹⁶ AABBO Waaqi nama waan hamtu tolche nama dabsu ch'ufa injibba.

Worra gosa Amaleki hobaasa jed'ani

¹⁷ Qaabad'a, waan worri gosa Amaleki gaafa isani lafa Misiri keesaa baatani isani tolche.

¹⁸ Worri sunini Waaqa insodaanne, tanaafi worri dudda duubani, ka isani dad'abi injirre, isani had'e, nama yau dad'abe isani jalaa hafe fit'e.

¹⁹ Tanaafi duuba eegi AABBO Waaqi keesani lafa ch'ufa isanii kenne, nyaapa isaani d'aatu jiru ch'ufa isani dura baase, lafa nagaya tolche, jabaad'a, worra gosa Amaleki ch'ufa hobaasa, aka deebiani maqa worra nami lafa irati inqaabanne. Dubbi tana inded'ina.