Mudhii Yohaannisii 8 - KITAABA WAAQA

¹ Ilmeeni Hoola beesisa torbeeso ch'absinnaani woniti ch'ufti gubbaa Ch'aqali jette ch'allifte haga nusa saa.

² Jennaani anini malaika torbaani ta Waaqa dura ejaanjitu arge; magalata torba worraa kennani.

³ Malaikaani eele hit'aana ta worqi harka qabdu d'ufte, fulla waan sorio irati qalani ejatte. Hit'aana heddu iti kennani, aka isiini kad'acha worra Waaqaati darte ammalle waan sorio irati qalani ta barch'uma guddinna dura ejitu, dura keetu.

⁴ Aari hit'aana aarsani kad'acha jara qulqullo woliini oli deeme, harka malaika fuula Waaqa dura ejitu keesa.

⁵ Jennaani malaikaani waan hit'aana iti aarsani fuute, ibida fulla waan sorio irati qalaniti nat'e lafa buufte. Mandiisufi iyanti lafa d'ufte, gubbaani angaate, lafti chochoote.

Magalata torba

⁶ Jennaani malaikaani torbaani ta magalata torba harkaa qabdu kurfoofte aka d'ooftu.

⁷ Malaikaani qara magalata ufi d'oofte. Bokaa d'akha roobufi ibidi ka d'iigaani wolkeesa makhame lafati jige. Qoodi sadeeso ka lafa gubate, qoodi sadeeso ka mukhaleeni gubate, buyuo dooti ch'ufa gubani.

⁸ Jennaani malaikaani lameeso magalata ufii d'oofte. Waan guddo gaara gudda ibidi iraa bobau fakaatu galaana keesa buusani. Qoodi sadii ka bisaani galaana d'iiga tahe.

⁹ Qoodi sadeeso ka waan bisaani keesa jira ch'ufti raawate, qoodi sadeeso ka hobolo bisaani keesa jirtu balleesani.

¹⁰ Jennaani malaikaani sadeeso magalata ufi d'oofte. Urjiini guddooni, ta aka ifse bobeetu, gubbaa gadi buute, qooda sadeeso ka galaanatiifi ka maddo ira buute.

¹¹ Maqaani urji suni Had'aa. Qoodi sadeeso ka bisaani had'ae, nami hedduuni ka bisaani suni d'uge raawate, waan guddo had'aniifi.

¹² Jennaani malaikaani afreeso magalata ufi d'oofte. Qooda sadeeso ka jiatifi ka urjile wa d'aani. Duuba akanaani qoodi sadeeso ka waan kana sadeeni ifse d'abe; qoodi sadeeso ka guyyatiifi ka halkanileeni ifsu dide.

¹³ Anini millannaani risa fago barisu arge, ka qonqo guddooni iye, Gaargala, gaargala, gaargala guddati lafa d'ufa hojja malaikaani sadeeni taani magalata ufi d'ooftu! jed'u d'agaye.