Jaallaboota 7 - KITAABA WAAQA

¹ Guyya toko Yerubaalini, yokhaani Gideonini isaafi nami isa woliini jiru ch'ufti, ganama lafaa kaani d'aatu maddo Harodi qubatani. Ollani Midiani bale keesa, worrani mirgaa, d'aatu gaara More jira.

² AABBO Waaqi waan Gideoni jed'e, Nami si woliini jiru muumme inqabu, anini dandae worra Midiani harka worrati inkennu. Hegeri worri kiyyibe waan jed'u, Numati harka keennani ufi baase jed'a.

³ Waan atini biyyaani jettu, Nami sodaatu ch'ufti ha galuti, nu arma gaara Gileaditi hamna. Jennaani nami kunki diddami lama gale, nami kunki kud'ani hafe.

⁴ Jennaani AABBO Waaqi waan Gideonini jed'e, Nami kanke ammalle muumme inqabu. Fulla bisaani worra geesi, anini achiti gargari sii baasa. Hojja anini, Nami kunini ha si woliini deemu jed'e, ha deemuti hojja anini, Nami kuni indeemini jed'e, inni ha tauti.

⁵ Gideonini gara bisaani worra geesa, AABBO Waaqi waan jed'eeni, Nama aka sare arabaani bisaani d'ugufi ka jilbifate bisaani d'uga gargari naa baasi.

⁶ Jennaani nami d'ibba sadi bisaani harkaani fuud'e aka sare arabaani d'uge; ammo worri kaani ch'ufti jilbifate d'uge.

⁷ AABBO Waaqi waan Gideonini jed'e, Nama d'ibba sadi ka aka sare bisaani d'ugeni isani baase worra Midiani harka keesaniti kenna. Nama kaani ch'ufaani gala jed'e.

⁸ Jennaani Gideonini worra Israeli ch'ufa galche nama d'ibba sadi ka woreegaafi magalata baatu male. Ollani Midiani bale keesa worra jala jira.

⁹ Halkani suni AABBO Waaqi waan Gideonini jed'e, Kai, olla suni had'i; anini yayu worra harka kanketiti kenne.

¹⁰ Ammo yo atini worra had'u sodaate, hojattu tante Pura fud'ad'u, ollati gadibua,

¹¹ duuba waan worri jed'u d'ageetani, garaa jabaatani worra haatani. Jennaani Gideonifi hojattuuni isaa Purani moga olla nyaapati dabrani.

¹² Worri Midianitifi ka Amalekitifi ka ilaboruleeni aka tuuta awaanisaa bale suni keesa ch'iisa; gaali worraleeni muumme inqabu, aka maansa afaani galaana jira.

¹³ Hojja Gideonini achini bahe, inni nama toko ka tae waan oobjate wahela isaati himu d'agaye. Wonti inni jechu jiru, Anini oobjuuni qit'a garbu toko, ka olla keennati gadi gangalate waaro toko d'ae, arge. Yo anini jed'e waaroni sunini qaarite lafati gombifamte.

¹⁴ Jennaani waheli isaa kaani waan jed'eeni, Oobjuuni tunini waan d'ibi ind'ooftu, goraade Gideoni ilma Yoashi ka gosa Israeli male! Waaqi yayu harka isaati worra Midianitifi duula keenna ch'ufa kenne.

¹⁵ Gideonini oobju namichi oobjateefi waan isiini d'ooftu d'agaye jennaani, jilbifate Waaqa kad'ate. Duuba duula Israeliti deebie waan jed'e, Kakaa! AABBO Waaqi yayu duula Midiani harka keesaniti kenne!

¹⁶ Inni duula isaa ka nama d'ibba sadi fulla saditi gargari qoode, nama ch'ufa magalatafi waan aka okhole, ifse keesa kaye, kenneefi waan jed'eeni,

¹⁷ Hojja anini moga ollatini bahe, aka dansa na laala, waan anini jed'u tolcha.

¹⁸ Hojja anaafi waheli kiyya magalata keenna d'oofnu, isanileeni keesani olla gama ch'ufa d'aa, dubbi tana lalaba, Nu ka AABBO Waaqatifi ka Gideoniti jed'a.

¹⁹ Gideonifi gumiini isaa nami d'ibba toko, ka halkani diquma wolqit'aini, eegi nami eeddo woljijire, moga olla d'ufani, duuba magalata d'aani waan aka okhole ka harka qabani ch'ach'absani,

²⁰ gumiini taani ta fulla lama jirtu akasuma tolchite. Nami ch'ufti ifse harka bitaachani qabate, magalata harka mirgichani qabate dubbi tana lalabe: Goraadeeni ta AABBO Waaqatifi ta Gideoniti jed'e!

²¹ Nami ch'ufti d'aatu olla suni fulluma ufi eje, jennaani duuli nyaapa ch'ufti wold'ae iyye baqate.

²² Ato jari Gideoni magalata ufi d'au, AABBO Waaqi duula nyaapa kaani wolti kaase, worri had'e woli balleese. Duuba worri gara Zarethani Serera baqate Beth-Shitani bahe, haga dira Beth-Mehola, ka d'aatu Tabathi.

²³ Jennaani gosa Naftalitifi ta Asheritifi ta Manase ch'ufa nama keesaa yaamani, worra Midiani suni reebani.

²⁴ Gideoni lafa gaareeni Efraimu ch'ufa keesa nama erge ka, koota worra Midiani had'a, galaana Yordanitifi laga haga dira Beth-Bara gahu taaku d'owa jed'u. Duuba jara Efraimu ch'ufa wolti yaamani galaana Yordanitifi laga haga Beth-Bara gahu achi geesani, aka worri nama taaku d'owu.

²⁵ Worri waaro hayyoota Midiani lamaani, Orebufi Zeebu qaqabe; Orebu fulla d'akha Orebuti ijeesani, Zeebu fulla daad'i iti mid'aasani ta Zeebuti ijeesani. Ammalle worra Midiani reebani mata Orebufi Zeebu, Gideonitini d'ufani, ka yo suni galaana Yordani gama ilaboru jiru.