Isaya 1 - KITAABA WAAQA

¹ Tunini daayya Isayaani, ilmi Amozii arge, ta waan Yudatifi ta Yerusalemu garsiiftu, gaafa Uziafi Yothamufi Ahazifi Hezekiani hayyoota Yudaa.

Aka Waaqi gumi ufii gorsu

² AABBO Waaqi waan jed'e, gubbafi lafa, dubbi tiyya ch'aqasa! Ijoolleeni anini gugurdise ya nati garagalte na didde.

³ Looni abba ufii imbeekhani, harreleeni gombo abba ufii imbeeti. Ammo gumiini tiyya ta Israeli na imbeetu worri woma tokole inhubatu.

⁴ Badi teesani, isani gosa ch'ubbiti dabditi hameennani yaatu! Ch'ubbu teesaniti gadi isani hirkisa! Isani yayu AABBO Waaqa qulqullo Israeli diddani, dudda iti garagaltani.

⁵ Isani maafi ammalle teetani na diddani! Isani gaargala hagasi ira argachu feetani? Ee Israeli, mataani keesani ya mamadae, garaafi qalbiini teesani fayya inqabdu.

⁶ Nafi keesani fulla tokoleeni fayya inqabu, haguma mata eje miilati eje, nafi keesani ch'ufti waan dirmamufi malaafi madaani bade. Mada tante qulqulleesani qorsa tokole ira kayani womaani inhinne.

⁷ Lafti teesani ya bade, dira keesani ch'ufa ya ibidi gube, ato isani agartanu nyaapi d'ufe lafa teesani fud'ate waan ch'ufa balleese ona tolcha.

⁸ Dira Yerusalemu ch'allati hafa, ka nyaapi marse had'uu jiru. Inni qarqaarsa d'abe, hoosa hojatu oobru zabibutifi yokhaani mana oobru bododa keesa jaarani fakaata.

⁹ Ato sila Waaqi guddaani nama gari hambisuu baate, Yerusalemu ya balleesani, akuma Sodomafi Gomora duri balleesani kaani.

¹⁰ Ee Yerusalemu, jara si mohatufi worri si keesa tauleeni worra Sodomafi Gomora fakaata. Dubbi AABBO Waaqaa ch'aqasa, waan Waaqi isani barsiisu d'agaya.

¹¹ Inni waan jed'u, Waan anini sorio isani naa baaftani tana jaalad'u seetani? Hooliyeeni isani naa baaftanifi d'ad'ani hori keesani gagaba ya nara dabre na lilise. Anini d'iiga Koromitiifi hooliyeetifi ka lalleesa ya dad'abe.

¹² Eenuti waan kana ch'ufa hojja kad'acha na dura d'uftani, kootani isaniini jed'e? Eenuti, koota Mana kiyya keesa yaa isaniini jed'e?

¹³ Sorio woma keesa injirre tana deebitani na ind'ufinaani. Ch'inch'a hit'aana isani naa aarsitani ya jibbe. Anini jila teesani ta baatitiifi Sabato teesaniifi woldeenna teesanile ya obsu dad'abe; waan kana ch'ufa ya ch'ubbuuni teesani t'ureesite.

¹⁴ Jila teesani ta baatitiifi jila d'ibi isani tolfatani ch'ufa injibba isiini, ya nati ulfaate, baachu dad'abe.

¹⁵ Yo isani harka nati oliqabattani na kad'attani anini isani illaalu. Ato isani haga feetani ch'ufa kad'attani, anini isani inch'aqasu wonti akanatiifi isani nama harka d'iigaati.

¹⁶ Qulqulleesa ufi d'iqa, ch'ubbu na durati tolchitani tana iraa deebia. Waan hamtu tolchitani kana lakisa

¹⁷ aka waan dansaa tolchitani barad'a. D'uga barbaada gula yaa, nama dabsani barbaada, ilmaani hiyyeeyi waan isii kennafi, nad'eeni hiyyeeyile dubbad'afi.

¹⁸ AABBO Waaqi waan jed'u, Koota, dubbi tana ilaala. Ato dabi keesani diimatele adi aka aanani tolchani, Ato inni aka male diimatele adi aka ch'aama tolchani.

¹⁹ Hojja isani naa saalfatani sagale dansa lafti baaftu nyaatani.

²⁰ Ammo yo isani na diddani aka hama woraanani dootani. Dubbi tana ana AABBO Waaqati jed'e.

Dira ch'ubbicha

²¹ Diri duri Waaqa jaalate saalfatuufi, ya aka sharmut'a tahe! Duri nama d'ugaati keesati gala, ammo amma tana, nama harka d'iiga ch'allati keesati hafe.

²² Ee Yerusalemu atini duri qarsi fakaata, ammo amma tana womaa keesa injirtu, duri daad'i dansa fakaata, ammo amma bisaani guraacha fakaata.

²³ Worri kanke gugurdaani nama d'ugaa dide hattu waheelchu: worri hojja ch'ufa gumbo jaalate waan nama ira nyaatu barbaada. Worri ilmaani hiyyeeyiti indubbatu, yokhaani nad'eeni hiyyeeyi dubbi isii jalaa inqabu.

²⁴ Tanaafi amma tana waan AABBO Waaqi guddaani Israeli jed'u ch'aqasa: Isani nyaapa kiyya, anini amma haalo isani fuud'a aka isani deebitani na ingaargalchine.

²⁵ Anini isaniti garagale, aka sibiila isani basse t'uri teesani ch'ufa isani iraa baasa.

²⁶ Anini worra isani fidufi ka isani gorsu, akuma duri isanii kenne kaani isanii kenna. Duuba Yerusalemule dira d'uga jabeesu, jed'aniini.

²⁷ Waan AABBO Waaqi d'uga qabuufi Yerusalemu baase ammalle nama keesa jiru, ka ch'ubbu iraa deebiule ch'ufa baasa.

²⁸ Ammo inni nama ch'ubbu tolche, ka isa didu, balleese, nama isa lakisu hobaasa.

²⁹ Isani waan duri mukha kad'attani oobru woyyoomsitaniifi ingaabitani.

³⁰ Isani akuma mukha gogu gogoddani, oobru bisaani d'abde taatani.

³¹ Akuma buuyo goddu qaanqeeni qabsiiftu, akasuma jari irre qabu huji ufii ta ch'ubbutiini badde, nami worra baddu d'owu injiru.