Henna 4 - KITAABA WAAQA

¹ AABBO Waaqi waan Musafi Harunini jed'e,

² Worra gosa Lawi ka balbala Kohathi, manafi balbala worra gula heda,

³ maqa nama d'iira ch'ufa, ka ganna sodomatifi shantama jiddu jiru, ka huji Waaro Woyyuma keesa hojachu dandau, t'aafa.

⁴ Wonti worri hojachu male, waan waan ch'ufa ira qulqullo qorqorachu male.

⁵ AABBO Waaqi ammalle dubbi tana Musani jed'e, Hojja godaanu geetani, Harunifi ilmaani isaa ha Waaro Woyyuma seenani, golla Sanduqa Wold'aqisa durati jiru iraa baasani, Sanduqani mamaraniti.

⁶ Ammalle worri ha golla d'iisisani irati mamare, woya bule gubati ballise, duuba kalcho baataniini keesa naquuti.

⁷ Worri ha woya bule mesa qit'a AABBO Waaqaa baasani ira kayani irati ballisuuti: ammalle mesa suni ira saanifi waan hit'aana keesati aarsanifi d'ameelafi muduunu daad'i Waaqaa baasani iti naqani ha d'ad'abaniti; ammalle qit'aani hojja ch'ufa mesa suni gubba jiraachu male.

⁸ Duuba ammalle waan kana ch'ufa ha woya diimtu irati ballisani, golla d'iisisani ira kaayani, kalcho baataniini keesa naqaniti.

⁹ Ammalle worri ha woya bule fuud'e, waan ifseeni ira ejitufi ifse isiitiifi qad'abefi saanifi waan d'ad'a iti naqani ch'ufa ira ballisuuti.

¹⁰ Worri ha waan suni ch'ufa golla d'iisisanini mamare waan aka sire ta baataniini ira kayuti.

¹¹ Ammalle waan aka mesa, ka worqi ha woya bule iti ballise, golla d'iisisani ira kaye, kalcho baataniini keesa naquuti.

¹² Duuba ammalle ha miha Fulla Qulqullo keesati hojatanini ch'ufa fuud'ani, woya buleeni mamarani, golla d'iisisani ira kayani waan aka sire ta baataniini ira kayani.

¹³ Ammalle ha waan mesa fakaata kaani, daara d'ad'ani iti jige, keesaa baasani, woya bule diimtu irati ballisaniti.

¹⁴ Duuba miha ch'ufa, ka huji soriotini tolchani, ha gubba kayaniti: daboola ibidati, hooko, bao, qori. Duuba ha golla d'iisisani ira kayani, kalcho baataniini iti naqaniti.

¹⁵ Hojja godaanani, worri balbala Kohathi ha d'ufe, waan qulqullo kana ch'ufa baatuti, ammo haga Harunifi ilmaani isaa huji tana ch'ufa kurfeesani hobaasaniti worri inqabatini. Worri balbala Kohathi waan qulqullo kana tokole intuqini, yo tuqani induani. Hujiini worra balbala Kohathi ta hojja Waaro Woyyuma godaansisani worri hojatu suni.

¹⁶ Eleazarini ilmi qaallicha Haruni, hujiini isaa aka Waarofi d'ad'a ifsetifi, hit'aanafi, mid'aani Waaqaa baasanifi d'ad'a muudatiifi waan Waaro keesa jira ka huji AABBO Waaqatini hojatani ch'ufa qorqoratini.

¹⁷ AABBO Waaqi waan Musafi Harunini jed'e,

¹⁸ Worra balbala Kohathi

¹⁹ fulla miha qulqullo kanati d'iaachu d'owa, aka worri indoone. Aka waan kana tahu d'owani Harunifi ilmaani isaa ha Waaro keesa seenani, nama ch'ufa huji isaa iti himani, waan inni baatu iti kennaniti.

²⁰ Ammo hojja worri Kohathi Waaro seene waan qulqullo qaaloleeni godaannaa kurfeesitu arge, indua.

Huji worra gosa Lawi ka balbala Gershoni

²¹ AABBO Waaqi waan Musani jed'e,

²² Worra gosa Lawi, ka balbala Gershoni, Manafi balbala worraa hedi,

²³ maqa nama d'iira ch'ufa, ka ganni isaa sodomafi shantama jiddu jiru, ka huji Waaro Woyyuma keesa hojachu dandau, t'aafi.

²⁴ Worri miha kana baachu male:

²⁵ Waarofi golla isii ka keesatifi ka alaatifi golla d'iisisani ka gubbati ballisanifi golla balbalatifi

²⁶ gollafi haada naabo ka Waarofi waan mesa fakaata ka sorio irati baasani marsufi golla fulla balbala naaboti kayani, ammalle waan waan kana ch'ufaani wolti naqanile. Worri waan waan kana male ch'ufa tolchu male.

²⁷ Musafi Harunini ha huji worri Gershoni, hojatufi ammalle waan Harunifi ilmaani isaa baad'a jed'aniini qorqorataniti.

²⁸ Hujiini worri balbala Gershoni Waaro keesa hojatu tana: Worri ha aka Ithamarini ilmi qaallicha Haruni, tolcha jed'uuni gula tolchuti.

Huji worra gosa Lawi ka balbala Merari

²⁹ Ammalle AABBO Waaqi waan Musani jed'e, Worra gosa Lawi, ka balbala Merari, manafi balbala worra gula hedi.

³⁰ Maqa nama d'iira ch'ufa ka ganni isaa sodomatifi shantama jiddu jiru, ka huji, Waaro Woyyuma keesa hojachu dandau t'aafi.

³¹ Worri miha kana baachu male: Utuba Waaro Woyyumatiifi waan ira dadagalchaniifi waan Waaroni ira ejitufi

³² kalchoofi, waan utubaani naabo ira ejaanjufi d'isafi haada naabo Waaro marsufi waan woltiini d'aabani ch'ufa. Nami ch'ufti waan iti kennani ka baatu qaba.

³³ Hujiini worri balbala Merari Waaro Woyyuma keesa hojatu tana: Worri ha aka Ithamarini ilmi qaallicha Haruni, tolcha jed'eeni gula tolchuti.

Henna gosa Lawi

^34-48 Dubbi AABBO Waaqa gula, Musafi Harunifi jaaroleeni gumi Israeli henna balbala gosa Lawi ta Kohathitifi Gershonitifi Merari tolchite. Worri henna kana manafi balbala worra gula tolche. Maqa nama d'iira ch'ufa, ka ganni isaa sodomafi shantama jiddu jiru, ka huji Waaro Woyyuma hojachu dandau, aka arma jalati t'aafani kana gula t'aafani. Kohathi 2,750 Gershoni 2,630 Merari 3,200 Ch'ufti wolti 8,580 q Balbala worraa Henna

⁴⁹ Akuma AABBO Waaqi Musani jed'e, nama ch'ufa t'aafani ammalle dubbi AABBO Waaqa ta Musati himani gula, nama ch'ufa huji inni hojate guutu male kennanifi ta qaalole hojatani yokhaani wa baatani.