Henna 31 - KITAABA WAAQA

¹ AABBO Waaqi waan Musani jed'e,

² Worra Midiani waan worri gumi Israeli tolcheefi haalo baasiifi. Eegi halo suni baafte indoota.

³ Duuba Musani waan biyyaani jed'e, Had'iisa kurfefad'a, aka Midiani haatani waan worri AABBO Waaqa tolche haalo baaftani.

⁴ Gosa Israeli ch'ufa keesa nama kunki toko duula erga.

⁵ Duuba nama kunki toko gosa ch'ufa keesa fohatani, nami kunki kud'ani lama, lola kurfae.

⁶ Musani worra kana ch'ufa had'iisa erge, ka Finehasini, ilmi qaallicha Eleazari, abba duula suni, ammalle ka inni miha Fulla Qulqullootifi magalata lola harkaa qabu.

⁷ Jennaani worri worra Midiani had'e, akuma AABBO Waaqi Musani jed'e, nama d'iira ch'ufa hobaasani,

⁸ hayyoota Midiani shananile woliini: maqaani hayyoota shanani suni tana: Evi, Rekemu Suri, Huri, Reba. Ammalle Balamu ilma Beorile ijeesani.

⁹ Worri Israeli nad'eenifi ijoolle Midiani ch'ufa boojie, loonifi ree worrale ch'ufa fud'atini, waan worri qabu ch'ufa saamani,

¹⁰ dirafi ollowaani worra ch'ufa gubani.

¹¹ Worri waan saamanifi ka boojiani suni ch'ufa, namafi saale,

¹² Musafi Eleazarifi gumi Israeli, ta diida Moabu, ka hojja arti ejani Yerikoni galaana Yordani gamaa, nama dura mullatuti worra duraani d'ufani.

Aka worri duula gale

¹³ Musafi Eleazarifi jaaroleeni gosa Israeliti mataa ch'ufti worraa baate duula yoyo fulla keesa yaate.

¹⁴ Musani abbooti duula ta nama kunki tokotifi nama d'ibba tokofati mata ta duula galteti dallane,

¹⁵ waan jed'eeni, Isani maanifi nad'eeni taana hambiftani?

¹⁶ Isani imbeetani, aka nami dubbi Balamu gula bahe lafa Peoriti AABBO Waaqa iraa biyya gorse balleese nad'eeni? Wonti ch'iisa d'ukuba hama kaani gumi AABBO Waaqatini d'ufe suniniti?

¹⁷ Tanaafi amma ijoolle d'iira ch'ufafi nad'eeni ch'ufa fit'a.

¹⁸ Ammo ijoolle dubra ch'ufa lakifad'a.

¹⁹ Isani nami nama ijeese yokhaani reefa qabate, haga bulti torba worra keesa alati gala. Guyya sadeesotifi ka torbeesole nama isani boojitanifi ufile qulqulleesa.

²⁰ Ammalle gaad'a nafa keesani ch'ufafi waan goga ira mid'aasanifi, waan rifeensa reetifi mukhaani mid'aasani ch'ufa qulqulleesa.

²¹ Qaallichi Eleazari waan jara duula galeeni jed'e, Kunini seera AABBO Waaqi Musaa kenne.

^22-23 Waan ibidi gubu indandeenne worqi taanaani, qarsi taanaani, sibiila diima taanaani, sibiila guraacha taanaani, saldaqa taanaani sibiila d'ibi taanaani, ibidaani qulqulleesu malani. Suni male, waan d'ibi ch'ufa ha bisaanini qulqulleesaniti.

²⁴ Guyya torbeeso woya teesani miich'ad'a; duuba isani qulqulluma teesaniti deebitani ollati dachaatani.

Aka waan boojiani qoodatani

²⁵ AABBO Waaqi waan Musani jed'e,

²⁶ Siifi Eleazarini jaarole gumi taani woliini, waan boojiani ch'ufa, namafi saale ch'ufa, hedu maltani.

²⁷ Waan boojiani ch'ufa fulla lamati gargari qooda, qooda toko jara duula d'aqe qooda, kaani gumi lakisa.

²⁸ Qooda duula suni keesa, d'iba shani keesa toko, nama taanaani, looni taanaani, harre taanaani, hoolafi laleesa taanaani, damoosa AABBO Waaqaa baasa.

²⁹ Damoosa suni ch'ufa qaallicha Eleazariti Kenna, ha inni AABBO Waaqa baasuti.

³⁰ Qooda gumi kaanile, shantama keesa toko, nama taanaani, looni taanaani, harre taanaani, hoolafi laleesa taanaani, fuud'a, worra Lawi ka huji Waaro Woyyuma harkaa qabu, kenna.

³¹ Musafi Eleazarini waan AABBO Waaqi jed'e tolchani.

^32-35 Tunini henna waan worri duula suni boojie, waan worri fud'ate male: hoolafi laleesa 675,000 looni 72,000, harreeni 61,000, dubra 32,000.

^36-40 Qoodi duula kennani kaani, hoolafi laleesi 337,500 tana keesa damoosi AABBO Waaqaa baasani 675; looni duulla qoodani 36,000, kana keesa damoosi AABBO Waaqaa baasani 72; harreeni duula qoodani 30,500 tana keesa damoosi AABBO Waaqaa baasani 61; ammalle dubarti worra duulati qoodani kunki kud'ani jaa tana keesa damoosi AABBO Waaqaa baasani 32.

⁴¹ Duuba Musani damoosa kana, ka AABBO Waaqaa baasani, qaallicha Eleazari kenne, akuma AABBO Waaqi Musani jed'e.

^42-46 Qoodi gumitifi ka worra duula kaani haguma taka: hoolafi laleesi 337,500, looni 36,000, dubarti 16,000.

⁴⁷ Qooda kana ch'ufa keesa Musani, shantama ch'ufa keesaa, namafi saale toko fuud'e, akuma AABBO Waaqi isaani jed'e, worra Lawi, ka huji Waaro Woyyuma harkaa qabu, kenne.

⁴⁸ Jennaani worri abbooti duula kaani gara Musa d'aqe

⁴⁹ waan jed'eeni, Nu worra keenna ka duula ch'ufa ya tohanne nami tokoleeni ka nu keesa d'abani injiru.

⁵⁰ Tanaafi nu amma faaya worqitiifi, waan irreefi harkati keeyatanifi, qube qabatifi, gurrale, yokhaani imule d'ufuniti jirra. Nu waan kana ch'ufa Lubbu teenna jenne AABBO Waaqaa baafna, aka inni nu qorqoratu.

⁵¹ Musafi qaallichi Eleazarini faaya worqi fud'atani.

⁵² Henni worqi ka abbootini duula baafte, ulfinni isii diquma kilo d'iba lama hanqata.

⁵³ Nami abbaa duula intahini waan boojie fud'ate.

⁵⁴ Duuba Musafi qaallichi Eleazarini worqi suni abbooti duula iraa fuud'ani Waaro Woyyumatiini d'ufani, aka AABBO Waaqi gumi Israeli qaabate qorqoratu.