Henna 27 - KITAABA WAAQA

¹ Ilmaani dubra ta Selofahadini, ilmi Heferi, ka ilma Gileadi, ka ilma Makiri ka ilma Manase ka ilma Yusufu d'ale tana; Mala, Noa, Hogla, Milka, Tirsa.

² Worri yae Musafi qaallu Eleazarifi jaarole taanifi gumi ch'ufa dura fulla balbala Waaro Woyyuma ejaanjani waan jed'ani.

³ Abbaani kenna ilma male lafa aloo keesati due. Inni worra goli Kora ka AABBO Waaqaani morke keesa injiru, ammo maruma daba ufitifi due.

⁴ Waan inni ilma inqamneefi maqa isaa Israeli keesa balleesani? Oboleyaani aabboo woliini qooda lafa ka nu d'aalu nu kenna!

⁵ Musani dubbi isaani AABBO Waaqa beesise,

⁶ duuba AABBO Waaqi waan jed'eeni,

⁷ Wonti dubriti Selofahadi kad'attu d'uga, Fiit'a abba isaani woliini qooda lafa kennifi aka worri waan isaa d'aalu.

⁸ Ammalle waan atini worra Israeli ch'ufaani jettu, Hojja nami ilma male due, ha dubarti isaa d'aaltuti.

⁹ Hojja inni dubrale inqamne oboleyaani isaa ha d'aaltuti.

¹⁰ Hojja inni oboleyaani Inqamne, oboleyaani abbaa isaa ha d'aaltuti.

¹¹ Hojja inni oboleyaani yokhaani abbaani isaaleeni oboleyaani inqamne, ha miilooni isaa aantiini d'aaltuti. Tunini ha worra Israeliti aadaafi seera taatuti, akuma anini AABBO Waaqi siti hime.

Aka Yoshua fulla Musa fohatani

¹² AABBO Waaqi waan Musani jed'e, Beeni, gaara Abarimu kori, lafa anini worra Israeliti kennu dawaad'i.

¹³ Eegi agarte, atinileeni, akuma oboleesi kanke Harunini due, doota.

¹⁴ Wonti akanatiifi isani lachu nani morkitani lafa aloo ta Sini keesati, gaafa gumiini ch'ufti Meribati nati gungumte, isani na d'aarefatani gumi ch'ufa durati na ch'eersitani (Meribani maddo Kadeshi lafa aloo ta Sini keesa.)

¹⁵ Jennaani Musani waan AABBO Waaqaani jed'e,

¹⁶ Ee AABBO Waaqa, ka lubbu nama ch'ufa harkaa qabdu, anini si kad'ad'a, nama gumi tanaani deeme

¹⁷ abbaa duula iti tahu tolchiifi, aka gumiini tante hooliya tissitu inqamne intaane.

¹⁸ AABBO Waaqi waan Musani jed'e, Yoshua ilma Nuni, nama jaba lubbu qabu, fuud'i, harka kanke mata isaa ira kayi.

¹⁹ Qaallicha Eleazarifi gumi ch'ufa dura d'aabi, worra ch'ufa durati isa eebisi, nama huji siraa fuud'u tolchi.

²⁰ Jabeenna kanke haga toko kennifi, aka gumiini Israeli ch'ufti isaa d'ageetu.

²¹ Inni ha qaallicha Eleazari gula deeme gorsa iraa fud'atu, qaallichileeni fed'i tiyya Urimu ira ha baratu. Kara kanani Eleazarini Yoshuafi gumi Israeli ch'ufa waan worri tahuu male garsiisa.

²² Musani akuma AABBO Waaqi isani jed'e tahe. Inni Yoshua qaallicha Eleazarifi guni ch'ufa dura d'aabe.

²³ Akuma AABBO Waaqi isani jed'e, Musani harka ufi mata Yoshua ira kaye eebise, nama huji isa iraa fuud'u isa tolche.