Henna 21 - KITAABA WAAQA

¹ Hayyuuni Aradi ka lafa Kanaani bitaa jiru, aka worri Israeli kara Atharimutini d'ufu d'ageennaani worra had'e ka gari boojie.

² Jennaani worri Israeli AABBO Waaqati kakhate waan jed'e, Hojja atini worra kana harka keennati kennite, nu dira worraa haane balleesine daara baamna.

³ AABBO Waaqi dubbi worraa d'agayeefi, worra Kanaani harka worrati kenne. Jennaani worri Israeli worraafi dira worraa had'e balleese, lafa suni Horma maqa baaseefi.

Bofa sibiila diimaa iraa mid'aasani

⁴ Worri Israeli gaara Hori biraa, kara galaana Diimati deemu, gula godaane aka lafa Edomu maru. Ammo karaati biyyiti obsa d'abde

⁵ Waaqafi Musati gungumte waan jette, Atini maanifi lafa Misiri keesaa nu baafte, lafa aloo tana ta liqimsafi bisaani inqamne keesati nu fit'a? Nu sagale hamtu tana ya dad'amne!

⁶ Jennaani AABBO Waaqi bofa had'aa hamtu qabu lafati buuse, bofi suni worra Israeli hedu nyaate, hobaase.

⁷ Duuba biyyiti Musati d'ufte waan jette, gaafa nu siifi AABBO Waaqati gungumne guddo ch'ubbu tolchine. Amma AABBO Waaqa nu kad'ad'u, aka inni bofa kana nuraa balleesu. Duuba Musani Waaqa biyya kad'ate.

⁸ AABBO Waaqi waan jed'eeni, Bofa sibiila diima iraa mid'aasi, mukhati fannisi aka nami bofi nyaate, yo bofa sibiila suni millate, fayyu.

⁹ Jennaani Musani bofa sibiila diima iraa mid'aase mukhati fannise aka sila, nami bofi nyaate ch'ufti bofa sibiila suni millate fayyu.

Aka gaara Horiti kaani bale Moabuti qubatani

¹⁰ Worri Israeli godaane, Obothi qubate.

¹¹ Eegi Obothi godaanani Iye-Abarimu qubatani, lafa aloo ta gamooji ta lafa Moabutini ilaboru.

¹² Ammalle achi godaanani bale Zeredi qubatani.

¹³ Artile kaani, galaana Arnoni gama suni qubatani, lafa aloo ta lafa Amori ira baatu. (Galaani Arnoni sunini seera lafa Moabutifi Amori gargari baasa.)

¹⁴ Maro waan sunitifi kitaabi had'iisa AABBO Waaqa waan akana dubbata: dira Wahebu arda Sufatifi baleele keesa; galaana Arnonini,

¹⁵ goodo bale haga dira Aritifi seera Moabuti ejitu.

¹⁶ Arti kaani lafa Eellani jed'aniti godaanani, duuba AABBO Waaqi waan Musani jed'e, Biyya wolti yaami, bisaani obaasi.

¹⁷ Gaafasi worri Israeli faaru tana d'aate: Ee madoole, bisaani nu kenna. Nuleeni imfaarsina.

¹⁸ Eela hayyuuni qote ka jaaroleeni mid'aasite, ka ororo hayyutifi konfi jaaroletini qotani. Duuba lafa aloo suni kaani Matana qubatani,

¹⁹ Matanale kaani Nahalieli qubatani, Nahalieli kaani Bamothi qubatani,

²⁰ Bamothi kaani bale lafa Moabu keesa fiit'e gaara Pisga jala, ta lafa alooti qajeeltuti qubatani.

(Qaabacha Seera 2.26—3.11)

²¹ Jennaani worri Israeli gara hayyu Sioni, ka gosa Amori, nama erge waan jed'e,

²² Nu lafa tante keesa dabru feena, nu dabarsi. Nu kara iraa gore, oobru teesani ta mid'aanitifi ta zabibule, inseenu, ammalle eellani teesanile bisaani keesaa ind'unnu, haga lafa tante keesaa baanuti kara kanke gudda iraa ingorru.

²³ Ammo Sihonini aka worri Israeli lafa isaa keesa dabru ee jechu dide. Inni duula baase lafa Yahasa ta aloo d'aqe worra Israeli had'e.

²⁴ Ammo worri Israeli worra suni had'e fit'e, lafa worra haga galaana Arnoniti fud'ate galaana Yabokiti d'aabe, akasi jechaani haga lafa gosa Amoni: wonti akanatiifi seera gosa Amoni guddo jabeesani eegani.

²⁵ Duuba worri Israeli dira worra Amori ch'ufa had'e dabsate, Heshbonifi dira d'aatu suni ch'ufa woliini fud'ate keesa qubate.

²⁶ Heshbonini sunini dira gudda ka hayyuuni Amori, ka Sioni jed'ani keesa tau hayyuuni sunini hayyu Moabu ka duri lafa suni fide had'e, lafa isaa ch'ufa haga galaana Arnoni iraa fud'ate.

²⁷ Tanaafi nami sirba sirbu waan jed'u: Heshboni koota, dira hayyu Sioni! Nu isa deebisani jaarani argu feena.

²⁸ Duri dira Heshboni kana keesa; duuli Sioni aka ibida gabahe dira Ari ka Moabu balleese, gaareeni galaani Arnoni iraa d'ufu hobaase.

²⁹ Gaargala keesani, worra Moabu! Isani worra Kemoshi kad'atani ya badiini iti d'ufte! Waaqi keesani nama isaa, ka d'iira nyaapati lakise, ka uwale aka Sihonini hayyuuni Amori boojiu iti lakise.

³⁰ Ammo amatana ilmaani worra la balleesani, haga Heshboni fudd'ani Diboriti d'aabani, ammalle haga Nashimu fuud'ani Nofati ta d'aatu Medebati d'aabani.

³¹ Duuba worri Israeli lafa Amori keesa qubate,

³² Musani dooya erge, ta dira Yazeri dooyate oduuni galtu. Ammalle worri Israeli dira sunifi dira d'aatu jirule had'e worra Amori ka keesa taule baase, dira suni fud'ate.

³³ Duuba eege worri Israeli garagale, kara Bashani deemu gula yae; jennaani hayyu Oguni ka lafa Bashani gabahe, duula ufi fud'ate, aka Edreti worra had'u kurfefate.

³⁴ Ammo AABBO Waaqi waan Musani jed'e, Isa insodaatini, anini isaafi worra isaatiifi lafa isaale harka keesaniti kenna. Waan atini Sioni, hayyu Amori, ka Heshboni tau, tolchite isale tolchi.

³⁵ Duuba worri Israeli Ogufi ilmaani isaatiifi worra isaa ch'ufa, ka nama tokole inhambisini, fit'e. Duuba eege lafa isaani fud'ate.