Henna 19 - KITAABA WAAQA

¹ AABBO Waaqi waan Musafi Harunini jed'e,

² Tunini aadaafi seera AABBO Waaqi kenne; waan atini worra Israelitini jettu, saa diima aabo womatu inqamne ka takaa lenjisani qaampara ira inkayinini kooti,

³ qaallicha Eleazariti kenni. Duuba ha olla keesaa baasani isa durati qalaniti.

⁴ Eegi suni Eleazarini ha d'iiga isaa haga toko qubaani tuqe, fuula Waaro Woyyumati deefate, maro torba fifit'uti.

⁵ Nafa saa suni goga, fooni, d'iiga, marumaani qaallu durati ha Gubani.

⁶ Eegi suni inni dame mukha hind'eesatifi dame urgotiifi mat'ari liilana diimtu ha fuud'e ibida keesa buusuti.

⁷ Eegi suni ha woya miich'ate, bisaani d'iqatuti, duuba eege dandae olla seene; ammo haga aduuni d'iituti inni inqulqulloomne.

⁸ Nami saa suni gubeleeni ha woya miich'ate nafa d'iqatuti, ammo innileeni haga aduuni d'iituti inqulqullau.

⁹ Eegi suni nami qulqullooni d'ibiini ha daara fulla saa suni iti gubani guure, olla keesaa baase fulla qulqullooti naquuti, achiti ha olkayani, aka gumiini Israeli hojja bisaani ch'ubbuuni ufi ira qulqulleesani kurfeesitu hojattuuni. Wonti aada tana tolchanifi aka ch'ubbu balleesani.

¹⁰ Namichi daara suni guureleni ha woya miich'atuti, ammo haga aduuni d'iituti innileeni inqulqullau. Aadaani tunini ta worra Israelitiifi worri gosa d'ibii ka worra keesa tauleeni, haga jiru tolfatu.

Nama reefa qabate

¹¹ Nami reefa qabate haga bulti torba qulqullooma inqabu.

¹² Inni guyya sadeesotifi ka torbeesole ha bisaanini ufi qulqulleesuti, duuba inqulqullaa. Ammo yo inni guyya sadeesotifi ka torbeeso ufi inqulqulleesini, inni qulqullooniti.

¹³ Nami reefa qabate duuba ufi inqulqulleesini qulqullooniti; wonti akanatiifi bisaani nama qulqulleesa isa ira imbumne. Inni Waaro Woyyuma AABBO Waaqa t'ureesa, tanaafi herega gumi Israeli keesa injiru.

¹⁴ Yo nami waaro keesati due, nami hojja suni isa bira jiru yokhaani ka hojja suni iti olseenu, haga bulti torba qulqullooma inqabu.

¹⁵ Miha waaro suni wonti qadaada inqamne ch'ufti qulqullooma d'abdi.

¹⁶ Yo nami nama nami ijeese qabate yokhaani nama alati due, yokhaani ammalle yo nami lafe namaa yokhaani awaala nama qabate, nami suni haga bulti torba qulqullooma d'aba.

¹⁷ Aki nama suni qulqulleesani, ha daara saa diima gubani dabaani nama iraa baasani kaani fuud'ani okote keesa kayani, bisaani guraacha iti daraniti.

¹⁸ Duuba nami qulqullooni ha dame urgo fuud'e, bisaani suni keesa buuse, waarofi waan keesa jiru ch'ufafi nama keesa jiru ch'ufati fifit'uti. Ammalle nami qulqullooni ha namicha lafe nama yokhaani reefafi awaala nama qabate, bisaani iti fifit'uti.

¹⁹ Guyya sadeesotifi ka torbeesole, namichi qulqullooni kaani ha nama qulqullo intahini kaani bisaani iti fifit'uti. Guyya torbeeso inni ha namicha suni qulqulleesuti, duuba namicha qulqulleesani kaani, eegi woya miich'ate bisaani d'iqate, hojja aduuni d'iitu, qulqullo taha.

²⁰ Nami qulqullo intahini, ka ufi inqulqulleesini, qulqullooma inqabu; wonti akanatiifi bisaani namaani qulqulleesani iti imfifinne. Inni Waaro Woyyuma ta AABBO Waaqa t'ureesa, tanaafi isa gumi Waaqa keesaa kutu malani.

²¹ Aada tana bara ch'ufa jabeesa. Namichi bisaani namaani qulqulleesani fifit'uleni ha woya ufi miich'atuti; nami bisaani suni tuqu ch'ufti, haga aduuni d'iituti, qulqullooma inqabu.

²² Wonti nami qulqullo intahini tuqu ch'ufti qulqullooniti, yokhaani nami d'ibiini waan suni qabatuleeni, haga aduuni d'iituti, qulqullooma inqabu.