Amosi 7 - KITAABA WAAQA

¹ AABBO Waaqi daayyani waan kana na agarsiise. Wonti anini arge isa tuuta awaanisaa mid'aase, eegi okhaya hayyu haamani, ta buuyooni maro lameeso baate.

² Daayya suni keesa awaanisa waan doti ch'ufa nyaatu arge; jennaani anini waan jed'e, AABBO Waaqa Gudda, gumi tanteeti araarami, gumiini Yakobo akami waan kana iraa hafti? Gumiini sunini diqo ammalle laaftu.

³ AABBO Waaqi herega isaa garagalfate waan jed'e, Wonti atini agarte sunini intaatu.

Ibida daayyani argani

⁴ AABBO Waaqi Guddaani ammalle daayya keesa woi na agarsiise, Wonti anini arge isa gumi ufii ibidaani balleesa kurfefatu arge. Ibidi suni qile, d'immu bisaani gube lafale gube.

⁵ Jennaani anini waan jed'e, AABBO Waaqa, lakisi! Gumiini Yakobo akami dandeete waan kana iraa hafti? Gumiini sunini diqo ammalle laaftu!

⁶ Ammalle AABBO Waaqi herega ufii garagalfate waan jed'e, Wonti atini agarte kunileeni intaatu.

Haada manaani jaarani ka daayyani argani

⁷ AABBO Waaqi ammalle daayya keesa woi na agarsiise. Wonti anini arge isa mana haadaani qajeelchani d'akhaani jaarani, d'aatu eju, ka haada qajeelchaniini suni harkaa qabu, arge.

⁸ Inni, Amosi, maani agarta? jed'e na gaafate. Anini waan jed'eeni, Haada mana jaaraniini qajeelchani arga. Jennaani inni waan naani jed'e, Anini haada kanaani, aka gumiini tiyya ta Israeli qajeela injirre, garsiisa. Anini deebie worraa araarame biraa indeemuufi.

⁹ Fulla ilmaani Isaaqo iti Waaqa kad'atu balleesani fulla qulqullo Israelile ch'ach'absani. Anini worra hayyu Yeroboamu goraadeeni had'e balleesa.

Amosifi Amazia

¹⁰ Amaziani, qaalluuni Betheli, qonqo gara Yeroboamu, hayyu Israeli, erge waan jed'eeni, Amosiini si jala jira, inni gumi Israeli keesa dedeeme si balleesu fed'a. Dubbini isaa suni lafa balleesiti.

¹¹ Wonti inni jed'u tana: Yeroboamuni lola keesati due, gumi Israelile boojiani lafa d'ibii geesani.

¹² Jennaani Amaziani waan Amosiini jed'e, Atini ka woi himtu, beeni deemi, lafa Yudati baqad'i, achi tai, achiti woi himi.

¹³ Betheli keesati deebite woma inhimini, wonti akanatiifi fullaani tunini mana hayyuuni Waaqa iti kad'atu, yokhaani fulla gumiini lafa teenna ch'ufti Waaqa iti kad'attu.

¹⁴ Jennaani Amosiini waan jed'e, Anini raaganiti, yokhaani abbaani kiyyaleeni raaganiti; ammo anini tissitufi nama mukha oda oobru.

¹⁵ Jennaani AABBO Waaqi huji tiyya ta tikha keesaa na fuud'e waan naani jed'e, Beeni, gumi tiyya ta Israeliti woi himi.

¹⁶ Tanaafi amma dubbi Waaqaa ch'aqasi. Atini waan naani jette, Worra Israeliti woma imfagiini, hameenna ilmaani Isaaqo inodeesiini.

¹⁷ Tanaafi Amazia, AABBO Waaqi waan siini jed'u. Niitiini tante dira kana keesa sharmut'a taate, ilmaani tante goraadeeni fit'ani. Lafa tante qoodani biyyaa kennani, atileeni lafa nama Waaqa imbeenneti doota. Ammalle worra Israeli boojiani lafa d'ibiti geesani.